Yaꞌ Job ismanhkꞌo yaꞌ tzet yal yamigo
6
Lahwi tuꞌ ispajtzen yaꞌ Job, yalni yaꞌ hakaꞌ tiꞌ:2 «¡Hantam saqꞌal tato chimalelax inqꞌajxihan yebꞌ inyaꞌtajilan, kat yalxico yul malbꞌal!
3 Yuxinto haꞌ tinanh ekꞌbꞌal yalil yibꞌanh yarenahil haꞌ mar,
yuxin ay tzotiꞌ tiꞌ kaw yinh anhe ahti yul intiꞌan.
4 Yuto haꞌ islitꞌ Komam Dios, Komam kaw aykano yip xahul winhan,
haꞌ xin veneno ayko yinh iswiꞌ litꞌ tuꞌ xaꞌapni yinh wanmahan.
Yaniti Komam Dios xiwkilal, yu yok howal winhan.
5 ¿Tom chꞌel yaw noꞌ xoltelajil burro ta ay ischꞌim noꞌ?
¿Tom chiꞌelpaxo yaw noꞌ wakax tato ayayo istelaj noꞌ yinh sat?
6 ¿Chimkoloh jitah tato machi yatzꞌamil aykoj?
¿xuqꞌmi koloni issajil noꞌ hos ta machipaxo yatzꞌamil noꞌ?
7 Haꞌ tzet mach chiwochehan inlobꞌoꞌan,
haꞌ ayko witahojan tinanh.
8 ¡Maktaxka chiyijen yaqꞌni tzet chinqꞌanan,
haꞌojabꞌ Komam Dios chꞌaqꞌni tzet chiwochehan,
9 kꞌul ta chꞌel yinh iskꞌul Komam Dios chinisxanhobꞌtanhehan,
kat isbꞌejtzonayo isqꞌabꞌ wibꞌanhan kat intanhkanilojan yu!
10 Tato kaw chislahkanayo isyaꞌtajil wibꞌanhan,
waxanhka hak tuꞌ kaw chintzalahan, yuto haꞌ huneꞌ tuꞌ chiꞌok yipo wanmahan;
hanintiꞌan machi bꞌay inmanhkꞌohan Istzotiꞌ Komam Dios, Komam pohbꞌililo isbꞌa xol istxꞌojal.
11 ¿Bꞌaytaxkatuꞌwal chititiko hunteqꞌanxa yaqꞌbꞌil wipan yu wechmanan?
Tato niman chiwute inkꞌulan, ¿tzettaxka chintanhkanojan?
12 ¿Tom lahan wipan hakaꞌ iskawil chꞌen chꞌen? maka
¿tom lahan inchibꞌehan hakaꞌ chꞌen bronce?
13 ¿Aymi hunu wipan chu kiniskolnihan?
Machi bꞌay chikawistitiko tzet chinkolnilojan.
14 Haꞌ mak ayko yinh isyaꞌtajil chiꞌaqꞌlax yaqꞌlobꞌal iskꞌul yu hunuxa maka,
waxanhka bꞌejbꞌilkano yu huneꞌ mak tuꞌ isxiw tet Komam Dios, Komam sunilal chisje yu.
15 Yajaꞌ wal hex wuxhtanhe hinbꞌahan yebꞌ hex xin, makexpakꞌiko winhan,
lahan hex yebꞌ haꞌ nimeta elomaꞌ chibꞌelwi yinh sunil yip.
16 Haꞌ elomaꞌ tuꞌ xin kaw how yaqꞌni yu soman ye haꞌ yebꞌ chꞌen chew,
yet chiꞌulito chꞌen yu yoj tzꞌayik.
17 Haxa yet ay qꞌaꞌ kat istajkanh, hayet chiqꞌaxnakanh yu yoj tzꞌayik,
kat iskꞌaykanh haꞌ yul isbꞌeh.
18 Ebꞌnaj chiꞌekꞌ yinh isbꞌel chishekꞌilo isbꞌa yul isbꞌeh yu isto issayno haꞌ,
lahwi tuꞌ kat iskꞌaykanikꞌo yul desierto.
19 Haꞌ ebꞌnaj txonhom chitit bꞌulbꞌon bꞌey Temán, chꞌekꞌ tꞌanhla ebꞌnaj yinh haꞌ, haxapaxo ebꞌnaj chitit bꞌey Sabá,
ayiko yinh iskꞌul ebꞌnaj issaynikꞌo haꞌ.
20 Haxa yet yapni ebꞌnaj bꞌay ay haꞌ, yilni ebꞌnaj ta matxa haꞌ,
issomchakanh isnabꞌal ebꞌnaj yu txꞌixwilal yuto ha haꞌ bꞌay chikawxi iskꞌul ebꞌnaj tuꞌ, xakꞌaykanh haꞌ yu tajinxa txꞌotxꞌ.
21 Wal tinanh xin yinh kaw isyelal lahan hex yebꞌ ebꞌnaj,
yuto heyil ishowal isyaꞌtajil winhan, yuxin chexxiw tet.
22 ¿Tom ay tzet inqꞌanan teyet, Walnipaxojan tato ay tzet cheyiti wetan,
makato hetohlah yu inkolchahan tet isyaꞌtajil ayko winhan?
23 Yebꞌ xin ¿tom inqꞌanan teyet tato chinhekolilojan yul isqꞌabꞌ anma chinetanan,
makato chinhekolilojan yul isqꞌabꞌ ebꞌnaj howalnhetikꞌa chu winhan?
24 Aqꞌwe inkuybꞌanilan, kat wok tuknojan wabꞌenan,
aqꞌwe wohtanhelojan bꞌaytet yinh mach kꞌulo wekojan.
25 Haꞌ kachbꞌanile tohol yekoj, machi hunu mak tiꞌ chiyahni, yajaꞌ hex tiꞌ
¿tzet cheyiqꞌ yinh hebꞌalnikanh mule winhan?
26 ¿Tom cheyoche chijilwe kobꞌa yu hunu tzotiꞌ mawaltiꞌan, haꞌ tzotiꞌ chiwalan yu inbꞌiskꞌulaltiꞌan,
lahan hakaꞌ jaqꞌeqꞌ chiꞌekꞌi, hak tuꞌ ye heyu?
27 Yebꞌpaxo xin kaw chextzala heyetan makta mebꞌaꞌ unin matxa mak ay yu,
chewatxꞌen holan bꞌay chꞌaykꞌaytoj heyamigo.
28 Wal tinanh xin, ta cheyoche, okanhwe tꞌanhno winhan,
kat kam heyilni tato ay leqꞌtiꞌal chiwalan teyet.
29 Txumwe hunelxa, hemeltzo yinh yakꞌtohal.
Matxahojabꞌ chelahiko heyilni yinh tzet chinelikojan.
30 ¿Tom ay istxꞌojal tiꞌ maꞌelti yul intiꞌan?
¿Tom mach yohtajo intiꞌan bꞌaytet istxꞌojal chala?» xhi yaꞌ Job.