Yal yaꞌ Job tet Komam Dios tato haꞌ ye yu yaꞌ yinh tzet chala
7
Yalni yaꞌ Job tet Komam:«¿Tom mach isyaꞌtajil chaqꞌle naj winaj yinh iskawil sat txꞌo txꞌotxꞌ tiꞌ?
Haxa istzꞌayik naj winaj lahan hakaꞌ isyaꞌtajil chaqꞌle hunu kꞌamteꞌ.
2 Lahanpaxo hakaꞌ hunu naj mach istohol chischah, chiyoche chꞌayna numnahi,
yebꞌ hakaꞌ hunu naj munlawom, kaw chiyechma yorahil ischahni istohol.
3 Hak tuꞌ yu inchahnihan isyaꞌtajil yinh txꞌiꞌalxa ixahaw,
kat yaqꞌlaxpaxo isyaꞌtajil wilaꞌan yinh ej aqꞌbꞌalil, yu hak tuꞌ winhbꞌalan.
4 Hayet hilan hinan chintxumnihan chiwalnihan:
“¿Hanikꞌ taxka chinahwanojan?” kinchihan.
Haꞌ aqꞌbꞌalil kaw nimajalkano yekꞌbꞌal chiwabꞌehan,
kaw xin txꞌiꞌal tzet chꞌekꞌkano yinh innabꞌalan masanto chꞌahilo sajbꞌes yet lanhanxa issajbꞌiloj.
5 Nohnako noꞌ ha haꞌ yebꞌ petaniko istxꞌakil yinh sunil innimanilan,
haꞌ intzꞌumalan kaw ayko islahwilal yebꞌ ispohowal.
6 Haꞌ inkawilan kaw yinh anhe chiꞌekꞌi hakaꞌ yekꞌ jel-la teꞌ chembꞌal yu isqꞌabꞌ mak chichemli.
Haꞌ tzet chinlahwikanojan xin, matzet chaqꞌkano wetan.
7 Mamin, natij tato haꞌ inkawiltiꞌan lahan hakaꞌ xobꞌ kotiꞌ.
Ta chintanhilojan matxa bꞌaqꞌinh chiyil isbꞌaqꞌ insattiꞌan iskꞌulal.
8 Haꞌ mak chinilnihan yu isbꞌaqꞌ sat matxa bꞌaqꞌinh chinyilan hunelxa.
Hayet chaxhekꞌ tꞌanhla winhan, matxa hinan.
9 Hakaꞌ chu yekꞌ hatxon moyan, kat iskꞌaykanh,
hak tuꞌ mak chiꞌayapno yul holan yet kamikal,
kat ismuji, matxa chiꞌahtij.
10 Matxa chimeltzo yatut,
matxa chimeltzopaxo yilaꞌ bꞌaytikꞌa aya.
11 Yuxin mach chinbꞌejan intzotelan yu intiꞌan,
wal xin chintzotelan yu bꞌiskꞌulal ay yul wanmahan,
chinqꞌajwihan yu isyaꞌil yabꞌil chꞌapni yinh wanmahan.
12 ¿Tom lahan hinan hakaꞌ haꞌ mar, maka hakaꞌ noꞌ monstruo chꞌekꞌ xol haꞌ,
yuxin chawako intanhemalan?
13 Hayet chiwalnihan ta chinxewninojan sat inbꞌatxteꞌan yu isnumi isyaꞌil ayinan,
haxapaxo intxꞌatan chꞌaqꞌni yaqꞌlobꞌal inkꞌulan yebꞌ xin yel wawan,
14 kat kinhaxibꞌtenan yu wayike,
chinxiwan yu tzetaj chiwilan yinh inwayik tuꞌan.
15 Ayxikꞌa kinhojlaxnakamojan,
ekꞌbꞌalto chiwochehan naj kamikal sata wehikꞌojan sat yibꞌanhqꞌinal tiꞌ.
16 ¡Kaw chinyahan inkawilan! ¡Mach yinh sunilbꞌalo tiempo chinehikꞌojan!
Mamin, bꞌejinkanojan yuto haꞌ tzꞌayik chinekꞌan sat yibꞌanhqꞌinal tiꞌ matzet chal yelapnoj.
17 ¿Tzet yelapno naj winaj yuxin kaw nahat aykanh naj hawu?
yebꞌ xin ¿tzet yelapno naj yuxin chawako hawanma yinh naj?
18 ¿Tzet yinh xin chatukle naj hunun sakꞌayal,
naunhe xin chaxhok hawilwenoj?
19 ¿Bꞌaqꞌinh chahekꞌilo habꞌa kinhawilnihan kat kinhabꞌejtzonan,
yu inbꞌiqꞌnihan nichꞌano intzubꞌan?
20 Tato ay inmulan wakojan,
¿tzettaxka chu inwatxꞌilojan hawu, hach istanhemal ebꞌnaj winaj?
¿tzet yinh xin chawilweti halitꞌ winhan?
¿tzet yinh xin chimeltzoko isyaꞌtajil tiꞌ hakaꞌ hunu ijatz kaw al wibꞌanhan?
21 ¿Tzet yinh xin mach chawilo istxꞌojal ayko winhan,
chawaqꞌnikano nimankꞌulal yinh inmulan?
Yuto yinh anhe chintohan wayo xol pojoj,
waxanhka xin chinhasayikꞌojan yinh sahabꞌ sakꞌayal,
matxa chinixtanhwihan hawu,» xhi yaꞌ Job.