Naj Bildad, halni istoholal Komam Dios
8
Istaqꞌwi naj Bildad, naj suhita yalni naj hakaꞌ tiꞌ:2 «¿Bꞌaqꞌinhtaxka chabꞌej hatzoteli?
Hatiꞌ lahan hakaꞌ nime howla jaqꞌeqꞌ chꞌekꞌi.
3 ¿Tom chiskotxbꞌa Komam Dios tzet tohol yehi?
¿Tom chetapaxto Komam Dios yilni yinh tzet chꞌelikoj tzet ye tuꞌ,
Komam sunil chisje yu?
4 Tato ebꞌnaj hakꞌahol yako ismul tet Komam Dios,
haꞌ Komam xin aniti isyaꞌtajil yibꞌanh ebꞌnaj, ispajo selel ismul yakoj.
5 Tato kaw sahabꞌ chasayilo Komam Dios,
kat haqꞌanni tet Komam, kaw aykano yelapno,
6 yebꞌ tato saj hawanma yebꞌ tohol habꞌeybꞌal,
yinh kaw isyelal haꞌ Komam chꞌok kachtanhenoj,
kat yanayo isyaxil yibꞌanh bꞌay ayach yu istoholal chawatxꞌe.
7 Yinh hakaꞌ tuꞌ waxanhka kaw nichꞌanchꞌan chu hawichikoj,
haxa yinh islahobꞌal kaw nimanxa tzet chachahkanoj.
8 Qꞌambꞌe tzet yaqꞌle anma yet yalanhtokanoj,
qꞌambꞌe kat haqꞌaytzen habꞌa yinh helanile aqꞌbꞌil tet ebꞌnaj mame.
9 Hanhonh tiꞌ hakaꞌto ewito konhpitzkꞌahi, matzet johtaj,
haꞌ kokawil sat txꞌo txꞌotxꞌ tiꞌ lahan hakaꞌ hunu yenhel hunu tzet ye tuꞌ.
10 ¿Mataxka mach chachiskuy ebꞌnaj tuꞌ,
kat istzotel ebꞌnaj tawet,
kat yalni ebꞌnaj tzotiꞌ chipitzkꞌati yinh yanma tawet?
11 ¿Tom chichꞌibꞌ teꞌ ah bꞌay machi tzꞌotzꞌew? Yebꞌ xin
¿tom chichꞌibꞌpaxo teꞌ papiro bꞌay machi haꞌ haꞌ? Machoj.
12 Ta machi ha haꞌ bꞌay ay teꞌ tuꞌ waxanhka kaw yax jilni teꞌ yebꞌ xin waxanhka machi tzokꞌlaxkanh teꞌ,
haꞌ teꞌ chitajilo bꞌabꞌel sata sunil ej teꞌ telaj.
13 Hak tuꞌ isbꞌeybꞌal sunil mak chinahulnhento Komam Dios,
hakpax tuꞌ ebꞌnaj txꞌoj, haꞌ tzet ayko yipo iskꞌul ebꞌnaj chitanhiloj.
14 Haꞌ tzet ayko yipo iskꞌul tuꞌ machi yip,
lahan hakaꞌ txꞌal txꞌal, haꞌ tzet bꞌay chikawxi iskꞌul,
lahan hakaꞌ ischem noꞌ xim.
15 Chiꞌok qꞌehno yinh yatut, yajaꞌ haꞌ yatut tuꞌ mach linhanonhetikꞌa;
chꞌok tzabꞌno yinh yatut tuꞌ,
yajaꞌ haꞌ yatut machi yip.
16 Haꞌ ebꞌnaj txꞌoj lahan ebꞌnaj hakaꞌ hunu qꞌebꞌtaj kaw yax chichꞌibꞌ yu yoj tzꞌayik,
kat isto lehno isqꞌabꞌ yibꞌanh peyabꞌ,
17 kat yanayto xeꞌ istiꞌla ha haꞌ,
kat islaqꞌlen isbꞌa xeꞌ teꞌ yebꞌ hunuxa xeꞌ yet teꞌal,
kat yanayto xeꞌ yich txꞌotxꞌ xolaj chꞌen chꞌen.
18 Hayet chihokꞌlaxkanh teꞌ bꞌay ayayo tuꞌ xin, haꞌ huneꞌ bꞌay ayayo teꞌ tuꞌ chimanhkꞌon tet teꞌ hakaꞌ tiꞌ:
“Maxhtikꞌa hunelo ilbꞌil hach wuhan,” xhi.
19 Yinh kaw yeli hak tuꞌ chu yaqꞌni tzalaho iskꞌul ebꞌnaj txꞌoj yinh tzetaj chiswatxꞌe,
tzujan tuꞌ xin nanxa mak chikan yul yehobꞌal ebꞌnaj, hakaꞌ te teꞌ tuꞌ.
20 Haꞌ Komam Dios mach chisyah Komam makta kꞌul isbꞌeybꞌal,
mach chikolwa Komam yinh anma txꞌoj.
21 Haꞌ Komam chinohtzen hatiꞌ hatzebꞌi,
kat yaqꞌni tzalahilal yinh tzet chawala.
22 Haꞌ ebꞌnaj chichiwako iskꞌul tawinh chisomchalaxkanokanh isnabꞌal ebꞌnaj;
haxa yatut ebꞌnaj txꞌoj, chitanhtzelaxkaniloj,» xhi naj Bildad.