Helanile yebꞌ xin yip Komam Dios
9
Istaqꞌwi yaꞌ Job, yalni yaꞌ hakaꞌ tiꞌ:2 «Yinh kaw yeli hanintiꞌan wohtajan tato hak tuꞌ yehi,
yajaꞌ ¿tzettaxka chu isqꞌoji naj winaj yapni yinh iskꞌulal sata Komam Dios?
3 Tato chiyoche naj winaj chiqꞌojiko yok tzotelo tet Komam Dios,
chisqꞌambꞌen Komam hunu mil qꞌambꞌebꞌal tet naj,
machi xin hunu chispajtzen naj.
4 Komam Dios kaw aykano isnabꞌal yebꞌ kaw aykano yip,
¿mak hunu tiꞌ chislutꞌnhe isbꞌa tet Komam Dios,
kꞌul chꞌelikoj?
5 Haꞌ Komam Dios chihekꞌnilo witz yul yehobꞌal yu ishowal,
mach xin yohtajo witz tuꞌ mak chiꞌiniloj.
6 Haꞌ Komam chihekꞌnilo txꞌo txꞌotxꞌ yul yehobꞌal,
chisbꞌilenpaxo Komam xeꞌ txꞌotxꞌ.
7 Tato chal Komam tato mach chiꞌahilo tzꞌayik,
mach chꞌahiloj, tato chala tato machi tzejla txꞌumel, mach chitzejlahi,
haꞌ Komam chimajchen sat.
8 Ischukil Komam watxꞌenhe satkanh,
kat yekꞌ Komam yibꞌanh isjaqꞌeqꞌal haꞌ mar.
9 Haꞌ Komam watxꞌenhe huneꞌ majan txꞌumel chiyij Osa,
yebꞌ Orión yebꞌ hunxa majan txꞌumel chiyij Pléyades.
Haꞌ watxꞌenpaxo hunteqꞌan txꞌumel ewanyehi, ay yinh yetkꞌulal sur.
10 Haꞌ Komam chiwatxꞌen tzetaj ye tuꞌ kaw aykano yelapnoj,
machi hunu mak tiꞌ chitxumchalo yu,
haꞌ kꞌaybꞌalkꞌule chiswatxꞌe matxa isbꞌi hanta isbꞌisil.
11 Chꞌekꞌ Komam insatajan yaj mach chiwilan yinh,
chꞌekꞌto Komam insatajan yajaꞌ mach chinachalo wuhan.
12 Tato ay hunu tzet tiꞌ chiyilo Komam
¿aymi hunu mak chalni tet Komam ta chaqꞌ meltzoho?
¿Aymi hunu mak tiꞌ chiqꞌambꞌen tet Komam yinh tzet chiswatxꞌe?
13 Hayet chitit ishowal Komam matxa chiꞌekꞌayo ishowal tuꞌ,
haꞌ ebꞌnaj chikolwa yinh makta kaw chiyikanh isbꞌa, chꞌokkanto ebꞌnaj yalanh yoj Komam.a
14 Hajxam intiꞌan ¿bꞌaytuꞌwal chintohan wiqꞌaꞌtijan intzotiꞌan chiwaqꞌan ispajo Istzotiꞌ Komam?
15 Waxanhka kaw kꞌul hinan mach chu intaqꞌwihan tet Komam,
wal xin kachannhe chu inqꞌannihan tet Komam ta chitzꞌay iskꞌul winhan, yuto haꞌ Komam chiꞌilni tzet chinelikojan.
16 Tato chꞌah wawan tet Komam, kat ispajtzen Komam wetan,
mach chiwaytojan yul wanmahan tato chabꞌe tzet inqꞌanan.
17 Yuto lanhan kinyaqꞌni ekꞌo yaꞌan yu hakaꞌ yekꞌ jaqꞌeqꞌ yebꞌ nime yaxnhabꞌ,
chislahniko yaniko lahwilal winhan, machi xin inmulan.
18 Mach chisje ta chinhiqꞌ inhaqꞌohan,
wal xin haꞌ bꞌiskꞌulal haꞌ chaqꞌ wetan.
19 Tato chonhtzotel yibꞌanhilo yip Komam, yinh kaw yeli kaw aykano yip.
Tato chiꞌawtelax Komam yu yil-lax tzet chiꞌelikoj,
¿maktaxka chito anhe awo yinh?
20 Tato chiwalan ta kꞌul inbꞌeybꞌalan, hatikꞌam intiꞌan chiꞌiniti isyaꞌtajil wibꞌanhan.
Tato chiwal hinbꞌahan kꞌulal, haꞌ Komam chihalniloj ta hankawinan ay inmulan.
21 Hanintiꞌan machi inmulan,
yajaꞌ machi welapnojan yul wetan, ¡xaꞌinyahpaxo hinbꞌahan!
22 Ayto huneꞌxa tzet chiwalan, haꞌ ton huneꞌ tiꞌ:
Haꞌ mak mach ismul yebꞌ mak ay ismul lahannhe chu istanhtzenilo Komam Dios.b
23 Hakaꞌ hunun kꞌax, kꞌuxan iskam hunu mak yu.
Chitzebꞌi Komam yinh isyaꞌtajil chul yibꞌanh mak mach ismul tuꞌ.
24 Haꞌ txꞌo txꞌotxꞌ aqꞌbꞌiliko txꞌotxꞌ yul isqꞌabꞌ ebꞌnaj txꞌoj,
chismajchen Komam sat ebꞌnaj juez.
Ta maxhtaj Komam chiwatxꞌen huneꞌ tuꞌ,
¿maktaxka chiwatxꞌeni?
25 Haꞌ inkawilan yul sat yibꞌanhqꞌinal tiꞌ kaw yinh anhe chiꞌekꞌtoj,
hakaꞌ isto ebꞌnaj aqꞌom correo yinh anhe,
kaw yinh anhe chꞌekꞌto tzꞌayik wibꞌanhan, machi xin iskꞌulal chiwilan.
26 Kaw yinh anhe chꞌekꞌto, hakaꞌ isto teꞌ barco yinh anhe yibꞌanh haꞌ mar,
yebꞌ hakaꞌ chu yay lemna noꞌ tꞌiw yibꞌanh no noqꞌ chistzabꞌayoj.
27 Ta chiwalan hakaꞌ tiꞌ: “Wal tinanh chinnahulnhetojan isyaꞌil inyabꞌilan,
matxa bꞌiskꞌulalo chiwute insatan, kat wanikojan yip wanmahan,” ta kinchihan,
28 kat issomchakanh yul inwiꞌan yu sunil isyaꞌil ayinan yu yabꞌil,
yuto wohtajan tato mach kꞌulo hinan sata Komam Dios.
29 Yuto ta mach kꞌulo hinan sata Komam,
¿tzet yinh xin ayko munil wuhan yinh isnabꞌnhehal, yu chiwalan tet Komam Dios ta mach inmulan?
30 Waxanhka chintxꞌah hinbꞌahan yu xapun,
maka chintxꞌah inqꞌabꞌan yu yal tanh,
31 masantikꞌa chinhaqꞌojaytojan yul holan bꞌay panhan tzꞌilal,
haꞌtikꞌa xin xil inqꞌapan ayko winhan chinyahnihan.
32 Yuto haꞌ Komam Dios mach anmaho hakaꞌ intiꞌan,
yuxin mach chu intaqꞌwihan tet,
nitam chu wokan yebꞌ Komam sata naj juez yul kapil.
33 Ayxikꞌa ay hunu mak tiꞌ chu yok koxobꞌalanh,
kat yanayo isqꞌabꞌ jibꞌanhanh kokawanhilanh.
34 Yunhe isbꞌejni Komam yaqꞌni kꞌax wijaꞌan,
yebꞌ xin matxa chinyaqꞌ xiwojan yu isyaꞌtajil.
35 Hak tuꞌ xin chu intzotelan tet Komam yinh sunil inkꞌulan,
yuto hanintiꞌan chiwabꞌehan tato machi inmulan.c