Yaꞌ Job chiqꞌ bꞌiskꞌulal yu isyaꞌtajil ayayo yibꞌanh
10
»¡Matxa chisje inkꞌulan chinehikꞌojan sat yibꞌanhqꞌinal tiꞌ!Chiꞌaqꞌlo inkꞌulan chiwalnihan isyaꞌtajil chiwaqꞌlehan;
chinokan tzoteloj yibꞌanhilo iskꞌahil ayayto yul wanmahan.
2 Chiwalnihan tet Komam Dios:
“Mamin, matxahojabꞌ chawayo isyaꞌtajil wibꞌanhan.
Aqꞌ wohtanhelojan tzet yinh xin chawaqꞌiko howal winhan.
3 ¿Tom kꞌul chawabꞌe, yu chinhayachꞌayojan?
Hanintiꞌan hach watxꞌenhe hinan,
¿tzet yinh xin chachok kinhawetaꞌpaxtojan,
walpaxo ebꞌnaj txꞌoj xin chaxhtzala yinh ebꞌnaj?
4 ¿Tom lahan isbꞌaqꞌ hasat hakaꞌ isbꞌaqꞌ sat ebꞌnaj sat txꞌotxꞌal?
¿Tom chawil hakaꞌ yilni ebꞌnaj winaj?
5 ¿Tom lahan istzꞌayikal hakawil hakaꞌ naj winaj,
maka hahabꞌilal hakaꞌ ishabꞌilal anma sat yibꞌanhqꞌinal tiꞌ,
6 yuxin kaw chaxhok hawilaꞌ intxꞌojalan,
kat hasaynikꞌoj yinh bꞌaytet inmulan,
7 waxanhka xin hawohtaj tato hanintiꞌan machi inmulan,
hawohtapaxo xin ta machi mak chu kiniskolnilojan yul haqꞌabꞌ?
8 Kꞌulchꞌan yu kinhawatxꞌenan yu haqꞌabꞌ, haxa tinanh xin
¿tzet yinh xin chachmeltzoko kinhawuchkꞌantojan?
9 Mamin, natij tato haꞌ txꞌo txꞌotxꞌ hawakoj yet kinhawatxꞌenan,
¿tom xin pojojxa chu kinhawaqꞌni meltzohojan hunelxa?
10 ¿Tom xin kinhajobꞌaytojan yul hunu net hakaꞌ noꞌ lech,
kinhasomnihan welikojan quesohal?
11 Hahunbꞌanayo inbꞌajilan yu intxꞌanhalan.
12 Hawaqꞌni inkawilan, istzꞌaypaxo hakꞌul winhan,
kinhatanhenan, hakꞌubꞌan wanmahan.
13 Ay hunteqꞌan tzet ye tuꞌ tiꞌ kꞌuwan yul hawanma, ewanyehi,
wohtajan tato haꞌ hunteqꞌan tuꞌ ayko yul hanabꞌal.
14 Hach tiꞌ hawila tato wako inmulan,
mach xin chinhawalan kꞌulal yu intxꞌojalan.
15 Tato txꞌoj hinan ¡Kaw kꞌanchꞌan hinan!
Ta xin kꞌul hinan mach chiwikanh inwiꞌan yuto kaw chꞌel inpixanan yu isyaꞌtajil chiwaqꞌlehan.
16 Tato chiwikanh inwiꞌan, chinhatzabꞌayojan hakaꞌ chu istzabꞌnayo noꞌ bꞌalam no noqꞌ iskꞌuxuꞌ,
lahwi tuꞌ kat hawatxꞌenpaxo kꞌaybꞌalkꞌule winhan.
17 Aynhetikꞌayo ilwebꞌal wibꞌanhan hawu,
kaw chiꞌahkanh istit hahowal winhan,
hakaꞌ chu istit nhirnhon ebꞌnaj soldado yaqꞌaꞌ howal, mach iskachnabꞌal.
18 ¿Tzet yinh xin kinhawaqꞌ pitzkꞌahotijan yinh inmiꞌan?
Ayxikꞌa kinkaman yet maxhto hunu mak chinilnihan.
19 Ayxikꞌa yet inpitzkꞌahan yinh inmiꞌan wilaxtojan bꞌay chimuji kamom,
hak tuꞌ xin machi hinan yul sat yibꞌanhqꞌinal tiꞌ.
20 ¿Tom mach hayebꞌxanheho tzꞌayik wekꞌojan?
¡Bꞌejinkanojan xin! Hekꞌilo habꞌa inkꞌatanhan,
hak tuꞌ xin chu wiqꞌni wipan hunepoj,
21 yalanhto maxhto chintohan bꞌey bꞌay matxa bꞌaqꞌinh chinmeltzohan,
sat txꞌo txꞌotxꞌ bꞌay ay qꞌejholo yebꞌ yenhel kamikal.
22 Haꞌ ton bꞌey huneꞌ txꞌotxꞌ bꞌay ay qꞌejholo yebꞌ bꞌay ay tzetaj ye tuꞌ mach ayoko yinh istxolal,
yebꞌ yenhel txꞌotxꞌ yet kamikal,
yebꞌ bꞌay ay issajilqꞌinal lahan hakaꞌ qꞌejholoj,” kinchihan tet Komam,» xhi yaꞌ Job.