Isbꞌalkanh naj Zofar mule yinh yaꞌ Job
11
Istaqꞌwi naj Zofar naamatita, yalni naj hakaꞌ tiꞌ:2 «¿Haꞌ sunil hunteqꞌan tzotiꞌ tiꞌ, tom mach yilalo chipajtzelaxi?
Haꞌ naj winaj kaw tzetkꞌa tzotiꞌ chala,
¿tom yu huneꞌ tuꞌ chikan naj kꞌulal?
3 ¿Tom chanah tato chiskach istiꞌ ebꞌnaj winaj yu sunil hunteqꞌan tzotiꞌ maxawal tiꞌ?
¿Tom machi xin hunu mak chipajtzen hunteqꞌan bꞌuchwal tzotiꞌ chawu tiꞌ?
4 Hach tiꞌ chawal tet Komam Dios hakaꞌ tiꞌ:
“Haꞌ kuybꞌanile chiwalan kaw tzꞌajan,
yuxin machi inmulan yul hasat,” kachi.
5 Ayxikꞌa chishaj Komam Dios istiꞌ, kat istzotelti tawet,
6 kat kach iskuyni yinh helanile ewan ye yu,
haꞌ ishelanil tuꞌ kayelto ekꞌbꞌal ay yelapno sata qꞌalomal.
Ta chawohtanhe ishelanil Komam tuꞌ,
chitxumchalo hawu tato mach chaqꞌ Komam Dios isyaꞌtajil tawibꞌanh hakaꞌ hamul.
7 ¿Tom chachqꞌoji hatxumnilo tzet ewan ye yu Komam Dios?
¿Tom chisje hawok kꞌulal hakaꞌ iskꞌulal Komam Dios,
Komam sunil chisje yu?
8 Haꞌ ishelanil Komam ekꞌbꞌal nahat yekanh sata satkanh,
yuxin ¿tzet wal hawuten habꞌa yu istxumchalo hawu?
Haxa yich ishelanil tuꞌ ekꞌbꞌal nahat yehayto sata bꞌay ay kambꞌal,
yuxin ¿tzet chu hawohtanheniloj?
9 Ekꞌbꞌal nimajalpaxo ishelanil tuꞌ sata txꞌo txꞌotxꞌ,
yebꞌ xin ekꞌbꞌal sat sata haꞌ mar.
10 Ta chihul Komam Dios kat kach istzabꞌnayoj yu yilni yinh tzet chachelikoj.
¿Maktaxka chu iskachwa yinh Komam?
11 Haꞌ Komam yohta makta ebꞌnaj winaj leqꞌtiꞌ,
chilnipaxo istxꞌojal chiswatxꞌe ebꞌnaj,
¿mato chatxumu tato mach chiyil Komam tzet chawatxꞌe?
12 Yuto mach chu ispitzkꞌati anma yinh noꞌ xoltelajil burro,
haktikꞌapax tuꞌ naj winaj machi isnabꞌal, machi tzujcha apno helanile yu.
13 Ta chahin hawanma tet Komam,
kat hawanikanh haqꞌabꞌ tet Komam,
14 ta xin ay hunu istxꞌojal tawinh, chixin habꞌejkano istxꞌojal tuꞌ,
yebꞌ ta mach chachtzala yinh tzet mach toholo ay yul hawatut,
15 wal tuꞌ chu hawinikanh hasat yinh sunil hakꞌul, yuto machi hamul,
hak tuꞌ xin kaw ay hawip yebꞌ matxa chaxhxiwi;
16 kat hanahulnhento isyaꞌtajil tiꞌ,
chanahulnheto hakaꞌ ha haꞌ chikꞌaykanh yul isbꞌeh.
17 Hakawil ekꞌbꞌal kaw saj hakaꞌ issajilqꞌinal yet chuman tzꞌayik,
waxanhka qꞌejholiloj hasajqꞌinal chawilaꞌ, lahan hakaꞌ sajilqꞌinal yet sahabꞌ sakꞌayal.
18 Matzet chal hakꞌul yet chachekꞌ tꞌanhtꞌoni,
kat haway yinh aqꞌankꞌulal.
19 Chaxhok wayoj, machi mak xin chachxibꞌteni yet chaxhwayi,
tzetkꞌa mak xin chihul kaxhtukꞌlenoj yu yok ebꞌnaj hawamigohoj.
20 Yajaꞌ wal ebꞌnaj txꞌoj chitanhtzelaxilo ebꞌnaj,
machi bꞌay wal istoko iskolno isbꞌa,
huneꞌ ayko yipo iskꞌul haꞌ ton istokano ishaqꞌo,» xhi naj Zofar.