Haꞌ Komam Dios yahawil yinh sunil
12
Istaqꞌwi yaꞌ Job, yalni yaꞌ hakaꞌ tiꞌ:2 «Yinh kaw istꞌinhanil, hex tiꞌ chextzotel yinh isbꞌi konhobꞌ,
hayet chexkamilo xin,
kat iskampaxilo helanile teyintaj.
3 Hakinpax tuꞌan ay inhelanilan hakaꞌ hex tiꞌ,
hex tiꞌ mach ekꞌbꞌalo hex wibꞌanhan.
¿Mak hunu mach yohtajo sunil hunteqꞌan cheyal tiꞌ?
4 Hayet chintxahlihan tet Komam Dios chispajtzen tzet chinqꞌanan,
yajaꞌ chinbꞌuchlaxan yu ebꞌnaj wamigohan;
yuto ebꞌnaj tohol yebꞌ kꞌul isbꞌeybꞌal chitzeyelax ebꞌnaj.
5 Ebꞌnaj tꞌinhan yekoj chiyintanhelto ebꞌnaj ebꞌnaj lanhanxa yaykꞌayi,
ebꞌnaj hakaꞌ hunu lámpara matxa tzet chiꞌoknikoj.
6 Haꞌ ebꞌnaj elqꞌom tzetkꞌa tzet ay ebꞌnaj yul yatut,
yebꞌ ebꞌnaj chꞌaniko ishowal Komam Dios yinh iskꞌul, tꞌinhan yeko ebꞌnaj,
haꞌ sunil tzet ay yul isqꞌabꞌ, haꞌ Komam aqꞌni tet ebꞌnaj.
7 Chaqꞌambꞌe tet no noqꞌ tinanh, kat kach iskuyni noꞌ,
chaqꞌambꞌe tet noꞌ chꞌik chꞌekꞌ purpun satkanh, kat yalnilo noꞌ tawet.
8 Maka chaqꞌambꞌe tet txꞌo txꞌotxꞌ, kat kach iskuyni txꞌotxꞌ,
maka tet noꞌ kay ay xol haꞌ mar, kat yalnipaxo noꞌ tawet.
9 Haꞌ sunil hunteqꞌan tiꞌ,
¿tom mach chitxumcha yu tato haꞌ isqꞌabꞌ Komam Jahawil watxꞌeni?
10 Yul isqꞌabꞌ Komam ayko yanma sunil anma itzitz,
yu Komam yuxin chꞌelti xobꞌ istiꞌ sunil anma.
11 Yinh kaw yeli haꞌ kotxikin chꞌabꞌen tzet yok tzotiꞌ,
hakpax tuꞌ ishomal kotiꞌ chiyabꞌe isxuqꞌal tzet chikolo.
12 Haꞌ ebꞌnaj ichamta winaj ayxa yitzꞌatil iswiꞌ,
haꞌ mak ayxakanh istiempohal, ayxapaxokanh ishelanil.
13 Haꞌ Komam Dios iqꞌnhe helanile yebꞌ ipehal;
yet Komam ye kuybꞌanile yebꞌ nabꞌale.
14 Tato ay hunu tzet chiyuchkꞌayo Komam,
machi hunu mak tiꞌ chu iswatxꞌenkanh hunelxa,
haꞌ mak chismajche Komam Dios, machi hunu mak tiꞌ chu ishajniltij.
15 Tato matxa chati Komam Dios haꞌ nhabꞌ sunil chitajkanokanh,
ta chishajchayti Komam nhabꞌ xin chiꞌetaxto txꞌo txꞌotxꞌ.
16 Haꞌ Komam Dios ay yip yebꞌ yet Komam kuybꞌanile,
yet Komam ye anma aqꞌbꞌil subꞌchahoj yebꞌ mak chꞌaqꞌni subꞌchaho yet anmahil.
17 Haꞌ Komam chꞌetanto isnabꞌal ebꞌnaj ay ishelanil,
chꞌaqꞌni sukbꞌo ebꞌnaj juez.
18 Komam chitꞌijnito chꞌen cadena xakꞌalbꞌan ebꞌnaj mebꞌaꞌ yu ebꞌnaj rey,
kat iskꞌalbꞌalax yikta ebꞌnaj mebꞌaꞌ yu hunu qꞌap.
19 Chiyilo Komam ebꞌnaj sacerdote,
kat xin yaqꞌni aykꞌayo ebꞌnaj winaj kaw ay yip, chiꞌelkano ebꞌnaj yinh ismunil.
20 Chiyilo Komam isyelal yinh istiꞌ ebꞌnaj chihalni isyelal,
kat yinilo Komam yitzꞌatil iswiꞌ ebꞌnaj ichamta winaj.
21 Chiyaqꞌ elo Komam ispixan ebꞌnaj yahaw,
chiyinilo Komam yip ebꞌnaj winaj kaw ay yip.
22 Yohta Komam tzet ewan ye xol qꞌejholo nahat yehayto yich,
haꞌ tzet ay xol qꞌejholo bꞌay kamikal chako Komam xol issajilqꞌinal.
23 Haꞌ Komam chꞌaqꞌni chibꞌokanh konhobꞌ,
haꞌ Komam xin chꞌuchkꞌanpaxtoj.
Haꞌ Komam chꞌaqꞌni sajlemoto konhobꞌ,
kat iskutxbꞌanpaxiko hunelxa.
24 Haꞌ Komam chꞌinilo isnabꞌal ebꞌnaj iswiꞌehal konhobꞌ ay sat yibꞌanhqꞌinal tiꞌ,
yuxin chikꞌayikꞌo ebꞌnaj hakaꞌ sat txꞌotxꞌ desierto bꞌay matxa bꞌeh.
25 Toxanhe chꞌekꞌ matxmon ebꞌnaj hakaꞌto xol qꞌejholoj,
machi istzejtah iqꞌbꞌil yu, tekton yekꞌ ebꞌnaj hakaꞌ ukꞌum.