Chiskol isbꞌa yaꞌ Job chalni yaꞌ tato yinh isyelal chibꞌelwi
13
»Haꞌ sunil hunteqꞌan tiꞌ xawilan yu isbꞌaqꞌ insatan;wabꞌenpaxojan yu intxikinan, istxumchalo wuhan.
2 Haꞌ tzet heyohta, hex tiꞌ wohtapaxojan,
mach ekꞌbꞌalo hex wibꞌanhan.
3 Yajaꞌ hanintiꞌan chiwochehan chintzotelan tet Komam Dios,
Komam sunil chisje yu, chiwochehan chintzotelan yibꞌanhilo hunteqꞌan tzet ye tuꞌ yebꞌ Komam.
4 Hex tiꞌ, cheyako yenhel isyelal yet cheyalni leqꞌtiꞌal,
sunil hex tiꞌ lahan hex hakaꞌ ebꞌnaj anhlom machi anhcha anma yu.
5 Ayxikꞌa chekach hetiꞌ yinh hunelnhe,
haxinwal haknhe tuꞌ xin chu isyenilo isbꞌa tato ay henabꞌal.
6 Wal tinanh xin abꞌewe tzet chꞌekꞌ yinh innabꞌalan,
kat kam heyabꞌen tzet chꞌelti yul intiꞌan.
7 ¿Tajka chetxumiloj tato chu hekolnilo Komam Dios yu leqꞌtiꞌal?
¿Tajka chetxumpaxo ta ay tzet chischah Komam yu tzet cheyala?
8 ¿Tom chu heyaniko hebꞌa yetbꞌiho Komam yinh tzet chiswatxꞌe?
¿Tom chu hetzotel yibꞌanhilo tzet chal Komam yu hekolwa yinh?
9 ¿Tzettaxka cheyute hetxumni tato chꞌok Komam yilaꞌ tzet chexelikoj?
¿Chimyu hebꞌuchwa yinh Komam hakaꞌ chu hebꞌuchwa yinh hunu anma?
10 Machi ekꞌto yet kexiskachni Komam tato ay hunu heyet anmahil ekꞌbꞌal yelapno yibꞌanh hunuxa mak yul hesat.
11 Yinh kaw yeli chexxiwkanh tet Komam Dios yuto kaw niman yelapnoj,
kat yok xiwkilal teyinh yu Komam.
12 Haꞌ hunteqꞌan payat kuybꞌanile cheyalobꞌtanhe tiꞌ,
matzet chal yelapnoj, lahan hakaꞌ tanh,
ta yinh hunteqꞌan kuybꞌanile tuꞌ chikawxi hekꞌul,
lahan hakaꞌta tzꞌotzꞌew cheyako kꞌubꞌal.
13 Abꞌewe tzet chiwaltiꞌan,
yuto chintzotelan,
lahwi tuꞌ ta chitit tzet chitit wibꞌanh tuꞌan, tijabꞌi.
14 ¿Tzet chiwiqꞌan yinh yu inkolnilo inkawilan?
Ekꞌbꞌalto kꞌul waniko hinbꞌahan yul isqꞌabꞌ huchanil.
15 Waxanhka chinismaqꞌkamojan Komam Dios,
haꞌ yinh Komam chikawxi inkꞌulan,
yajaꞌ xin chinkol hinbꞌahan sata Komam yu ej inbꞌeybꞌalan.
16 Yinh Komam chiꞌilchalo inkolbꞌanilan,
yuto anma txꞌoj mach chꞌapni bꞌay ay Komam.
17 Kam abꞌewe kuybꞌanile chiwaltiꞌan,
haꞌ tzet chiwaltotiꞌan okojabꞌweto yul hetxikin.
18 Tato chiwalatijan tzet wehan tet Komam tinanh,
kaw wohtajan tato chinkanan kꞌulal sata Komam.
19 ¿Mak hunu mak chihalnati inmulan?
Ta hak tuꞌ wokxa tuknojan, kat inkaman.
20 Mamin, ay kabꞌebꞌ tzet ye tuꞌ tiꞌ chinqꞌanan tawet ta chawatxꞌe,
hak tuꞌ xin mach chiwebꞌa hinbꞌahan tasataj.
21 Bꞌej hawanayo isyaꞌtajil wibꞌanhan,
yebꞌ xin mach chinhawaqꞌ xiwojan.
22 Awte hinan yinh anhe, kat intaqꞌwihan tawet,
makato hankawinan chinokan tzotelo tawet, pajtze wetan.
23 ¿Hanta intxꞌojalan yebꞌ inmulan?
Mamin, haꞌ intxꞌojalan yebꞌ inmul tuꞌan aqꞌ wohtanhelojan.
24 ¿Tzet yinh xin chawebꞌato hasat wetan,
chawuteko habꞌa hakaꞌto ayko hahowal winhan?
25 Hanintiꞌan lahan hinan hakaꞌ hunu xaj te teꞌ chꞌijlaxikꞌo yu jaqꞌeqꞌ,
yuxin ¿tzet yinh xin chawayo isyaꞌtajil wibꞌanhan?
Lahan inpaxojan hakaꞌ teꞌ tajin chꞌim,
yuxin ¿tzet yinh xin chinhatzumbꞌekꞌojan?
26 ¿Tzet yinh xin chawalilto isyaꞌtajil wibꞌanhan,
yu intohlanan inmulan wakojan yet tzeh hinan?
27 Chawanikto wojan yul teꞌ cepo,
kat hatꞌanhxi yinh sunil inbꞌeybꞌalan,
chawaniko peyabꞌ yinhla ispaqꞌanil wojan.
28 Lanhan islowto innimanilan,
holkixhtaxanhe hakaꞌ hunu xilqꞌape yu noꞌ ih.