Tzotel yaꞌ Job yibꞌanhilo istxannhehal yoj iskawil anma
14
»Haꞌ naj winaj chipitzkꞌa yinh ix ix,kaw txannhechꞌan yoj iskawil naj sat yibꞌanhqꞌinal tiꞌ,
yebꞌ xin kaw yaꞌtanhetikꞌa chꞌekꞌ yilaꞌ naj.
2 Lahan iskawil naj hakaꞌ teꞌ kaj kaw chiꞌel chꞌitnahi,
yinh anhe xin chitajnaloj,
kat iskꞌaynakanh hakaꞌ hunu yenhel moyan, mach chinahatli.
3 Mamin ¿Tom xin chachok tꞌanhno yinh naj winaj?
¿Tom chito hawoche hawilaꞌ yinh tzet chꞌeliko naj?
4 ¿Aymi hunu mak tiꞌ chu issajnhen mak mach sajoj?
Machi maka.
5 Yinh kaw yeli hachnhechꞌan hawohta hanta tiempo chꞌekꞌ naj sat yibꞌanhqꞌinal tiꞌ,
yebꞌ hach chawala hanta isbꞌisil ixahaw iskawil naj.
Hach chawala bꞌay chikachna iskawil naj, machi xin chu ispalkꞌon naj yibꞌanh bꞌay chawal tuꞌ.
6 Tato chabꞌejkano naj chitanhilo naj,
yajaꞌ xin chitzala naj yinh ismunil hakaꞌ naj kꞌamteꞌ.
7 Hayet chiqꞌajlaxayo hunu teꞌ qꞌebꞌtaj ayto bꞌay chikawxi iskꞌul naj yahaw teꞌ,
yuto chiwolni teꞌ hunelxa.
8 Waxanhka chiꞌichambꞌilo xeꞌ teꞌ yul txꞌotxꞌ yebꞌ lanhan isqꞌato teꞌ xol pojoj,
9 yajaꞌ haxa yet chiyaqꞌni haꞌ nhabꞌ, kat isyaxbꞌikanh teꞌ,
haxa iswol teꞌ tuꞌ, chito lehno isqꞌabꞌ hakaꞌ hunu teꞌ qꞌebꞌtaj uninto.
10 Yajaꞌ wal naj winaj chikam naj,
machi xin yanhal iskamikal naj.
Hayet chikam naj tuꞌ ¿bꞌaytuꞌwal chitokano naj?
11 Hakaꞌ chu yapni yojomal ha haꞌ xol haꞌ mar,
yebꞌ hakaꞌ chu ispaxayo ha haꞌ kat istajkanh haꞌ,
12 hak tuꞌ chu iskam naj winaj, matxa xin chiꞌahwano naj.
Haꞌ yulbꞌal istiempohal ay huneꞌ satkanh tiꞌ, machi hunu mak kamna chꞌel iswayanh,
matxa chiꞌahwano bꞌay chiway tuꞌ.a
13 ¡Ayxikꞌa chu webꞌan hinbꞌahan yul kambꞌal masanto chikꞌayto hahowal winhan.
Ayxikꞌa chawalkano yinh hunu tzꞌayikal bꞌay chinhanatijan!
14 Hayet chikam naj winaj, ¿chitom meltzopaxo naj hunelxa?
Haꞌ yinh sunilbꞌal tiempo itzitz hinan chiwechmanan masanto chihul inkolbꞌanilan.
15 Wal tuꞌ chinhawawtehan, kat intaqꞌwihan tawet,
chachtzala winhan yuto haqꞌabꞌ watxꞌenhe hinan.
16 Yajaꞌ wal tinanh kaw ayachiko hawilni bꞌay chiwato inxalabꞌan,
haxa yinh tuꞌ xin machmi chabꞌisa hanta inmulan.
17 Haꞌ inmulan yebꞌ intxꞌojalan hakaꞌto ayayto yul hunu saco,
kaw xin tzꞌisbꞌil istiꞌ saco tuꞌ hawu.
18 Yinh kaw yeli haꞌ witz chꞌelto bꞌuynahi,
kat ishekꞌnilo isbꞌa chꞌen nimeta chꞌen yul yehobꞌal.
19 Hakaꞌ chu ispohto chꞌen chꞌen yu haꞌ nime haꞌ yet chibꞌelwi,
yebꞌ hakaꞌ chu yijlaxto txꞌo txꞌotxꞌ yu haꞌ, hak tuꞌ chu hatanhtzenilo tzet ayko yipo iskꞌul naj winaj.
20 Hach tiꞌ aynhetikꞌa hawip yibꞌanh naj winaj, wal naj winaj chitanhilo naj;
chahelni issat naj, chachejnito naj.
21 Chꞌalaxiko ismay ebꞌnaj iskꞌahol naj,
yajaꞌ matxa chohtanhelo naj,
maka xin ta chiꞌilaxilo ispixan ebꞌnaj matxa chiyabꞌeꞌ naj mame tuꞌ.
22 Hanhechꞌan naj chꞌabꞌen isyaꞌil yebꞌ isnimanil ischukil,
kat yabꞌen naj bꞌiskꞌulal ischukil,» xhi yaꞌ Job.