Naj Elifaz kachwa naj yinh yaꞌ Job
15
Lahwi tuꞌ, ispajtzen naj Elifaz temanita, yalni naj tet yaꞌ Job hakaꞌ tiꞌ:2 «¿Tom haꞌ anma kaw ay ishelanil chipajtzen tzotiꞌ mach istzanoj,
chalni helanile machi yelapnoj,
chinikanh isbꞌa, kat isnohtzen yul iskꞌul yu jaqꞌeqꞌ chitit bꞌey este?
3 Haꞌ mak ay isnabꞌal ¿tom chiyal tzotiꞌ matzet chal yelapnoj?
maka ¿tom chiyal tzetaj ye tuꞌ matzet chaqꞌkanoj?
4 Hakachpax tuꞌ, matxa chaxhxiw tet Komam Dios,
yebꞌ xin kaw machi yelapno huneꞌ hawinayo habꞌa tet Komam.
5 Yu hatxꞌojal yuxin hak tuꞌ chawute tzotelo habꞌa yu hatiꞌ.
Hawochen hawalni leqꞌtiꞌal tzotiꞌ.
6 Tajka chatxumu ta haninan chiwalilojan hamul, wal xin machoj.
Haꞌ xaj hatiꞌ chachhalniloj.
7 ¿Tom bꞌabꞌel kach pitzkꞌa sata naj Adán? mato
¿bꞌabꞌel kach watxꞌelax sata ej witz?
8 ¿Tom txalaniko hatxikin hawabꞌeni yet isnahni Komam Dios yinh tzet chiswatxꞌe? mato
¿Tom hachnhechꞌan ay hahelanil yul sat yibꞌanhqꞌinal tiꞌ?a
9 ¿Tzet hawohtanhen hach tiꞌ yinh tzet mach johtajojanh?
¿Haꞌ tzet chatxumu mach chitxumcha juhanh?
10 Haꞌ koxolanh hanhonhtiꞌanh ay ebꞌnaj winaj kaw sajxa xil iswiꞌ ichamil,
ay ebꞌnaj ekꞌbꞌal ichamxa sata hamam.
11 ¿Tom machi yelapno yaqꞌlobꞌal hakꞌul chiyaqꞌ Komam Dios,
yu iskꞌulchꞌanil isxahanil chachyil Istzotiꞌ Komam?
12 ¿Tzet yinh xin chaxhelkanh iskꞌatanh Komam Dios yu txꞌixwilal,
kat xin iskajpulilo hasat yu hahowal?
13 ¿Tzet yinh xin chitit ishowal hawanma yinh Komam Dios,
kat xin haqꞌojnito tzotiꞌ yu hatiꞌ yinh Komam?
14 ¿Tom ay hunu naj winaj tiꞌ kaw yelaꞌ kaw kꞌul?
¿Tom ay hunu naj winaj pitzkꞌana yinh ix ix mach mulumoj?
15 Tolabꞌ ebꞌnaj ángel machi kawxi iskꞌul Komam yinh ebꞌnaj,
yebꞌ xin satkanh mach sajo yul sat Komam.
16 ¿Hajxam naj winaj, tom ay iskꞌulal naj yu isyahbꞌetajil yuto xaꞌishin isbꞌa naj tet ismul?
Lahanxa chute naj yukꞌnayto isyahbꞌetajil hakaꞌ yukꞌlax ha haꞌ.
17 Abꞌe tzet chiwalan kat inyenihan tawet,
chiwalnihan tawet tzet ilbꞌilxa wuhan,
18 haꞌ ton hunteqꞌan kuybꞌanile yaqꞌ ebꞌnaj ay ishelanil jetanh, kuybꞌanile ischah ebꞌnaj tet yichmam,
mach xin yebꞌa ebꞌnaj hunteqꞌan kuybꞌanile tuꞌ.
19 Haꞌ ebꞌnaj ichmame tuꞌ, hanhe tet ebꞌnaj aqꞌlaxkano txꞌo txꞌotxꞌ,
machi xin ischahko ebꞌnaj anma nan konhobꞌal xol.
20 Haꞌ naj txꞌoj isbꞌeybꞌal sunilbꞌal tzꞌayik chꞌekꞌyaꞌ yanma naj yu isyaꞌtajil,
haꞌ isbꞌisil ishabꞌilal naj txannhechꞌan yoj,
yajaꞌ isyaꞌtajilnhe chulikꞌo yubꞌ naj.
21 Chiyabꞌe naj isbꞌili tzetaj ye tuꞌ yu istxikin, kat isxiwkanh naj,
hayet kaw ayxa isqꞌalomal naj, kat yapni naj elqꞌom yelqꞌanolo tzet ay naj.
22 Haꞌ naj tuꞌ mach chayto naj yul yanma tato chitomeltzo naj xol qꞌejholo,
yokxa chꞌen espada yinh naj.
23 Chikꞌayikꞌo naj, yekꞌ hoyon issayni tzet chislo, chisqꞌambꞌeni:
“¿Bꞌaytuꞌwal ay tzet chikolo?” xhi naj.
Yohtaxapaxo naj tato watxꞌebꞌilxa istzꞌayikal bꞌay chitokano naj xol qꞌejholo.
24 Haꞌ isyaꞌtajil yebꞌ bꞌiskꞌulal chꞌaqꞌni kabꞌkonkanh iskꞌul naj;
chul lemna isyaꞌtajil yibꞌanh naj, hakaꞌ hunu naj rey hinan isto yinh howal.
25 Hak tuꞌ chiyu yul yibꞌanh naj yu chiyikanh isqꞌabꞌ yinh Komam Dios,
kat xin islinhbꞌankanh isbꞌa sata Komam, Komam sunil chisje yu.
26 Istxalbꞌanikꞌo isnuqꞌ yilwento isflecha yinh Komam,
isto yinh anhe yanoko howal yinh Komam yebꞌ huneꞌ niman escudo.
27 Yuto haꞌ naj tuꞌ kaw bꞌaqꞌich sat naj, kaw bꞌaqꞌichpaxo yinh qꞌaxqꞌepal ismotx naj.
28 Haꞌ konhobꞌ bꞌay chiꞌehikꞌo naj chiꞌuchkꞌalaxkantoj, haꞌ konhobꞌ tuꞌ kaw chitzꞌinhtzꞌoni,
matxa anma, haꞌ teꞌ nha bꞌey yulaj konhobꞌ tuꞌ uchkꞌabꞌilxato teꞌ.
29 Haꞌ naj tuꞌ matxa chu yahwano naj,
matxa chinahatlipaxo isqꞌalomal naj yinh sunilbꞌal ej tiempo.
Mach nimano ismajul naj sat txꞌo txꞌotxꞌ tiꞌ.
30 Matxa chu iskolchalo naj tet qꞌejholo,
lahan naj hakaꞌ isqꞌabꞌ te teꞌ chitzꞌato yu qꞌa qꞌaꞌ; haxa xin isxobꞌ istiꞌ Komam Dios chitanhtzenilo naj.
31 Matzet chaliloj ta chako naj isnabꞌal yinh tzet matzet yelapnoj,
yuxin matzet chischah naj ispajoj.
32 Chikam naj yalanhto maxhto istiempohal,
lahan chu naj hakaꞌ iswol te teꞌ matxa chiyaxbꞌikanh.
33 Lahan naj hakaꞌ sat teꞌ uva machi qꞌanbꞌiloj,
lahanpaxo naj hakaꞌ isxumakil teꞌ olivo tonhe chiꞌaykꞌayi.
34 Haꞌ ebꞌnaj txꞌoj isbꞌeybꞌal chitanhtzelaxilo ebꞌnaj bꞌay chiskutxbꞌa isbꞌa,
kat istzꞌato yatut ebꞌnaj chiskutxbꞌa isqꞌalomal yiqꞌ yinh leqꞌtiꞌal.
35 Yabꞌe ebꞌnaj isyaꞌil pitzkꞌati yinh, isyenilo ebꞌnaj istxꞌojal,
hanhkꞌanhe leqꞌtiꞌal chꞌekꞌ yinh iskꞌul iswatxꞌeni,» xhi naj Elifaz.b