Ah yaw yaꞌ Job tet isyaꞌtajil
16
Istaqꞌwikanh yaꞌ Job, yalni yaꞌ hakaꞌ tiꞌ:2 «Txꞌiꞌalxa el chiwabꞌehan tzotiꞌ hakaꞌ hatzotel tiꞌ.
Sunil hex tiꞌ cheyaqꞌ yaqꞌlobꞌal inkꞌulan heyalni,
yajaꞌ hanhechꞌan heyanayo isyaꞌtajil wibꞌanhan, haꞌ cheyu.
3 ¿Tom machi iskachnabꞌal hunteqꞌan tzotiꞌ matzet chal yelapno cheyal wettiꞌan?
¿Bꞌaytet chaxhiptzen hapajtzen wetan?
4 Ta hex cheyaqꞌle isyaꞌtajil hakaꞌ chiwaqꞌletiꞌan,
chimyu intzotelpaxojan hakaꞌ hetzotelpaxo tiꞌ,
katmi walnihan txꞌiꞌal tzotiꞌ machi iskachnabꞌal teyet, chinyumni inwiꞌan yinh hesat.
5 Yajaꞌ xin chimyiqꞌkanh yip heyanma yu tzotiꞌ chiwalan,
haꞌ tzotiꞌ chꞌelti yul intiꞌan chꞌaqꞌni yaqꞌlobꞌal hekꞌul, chimnumi isyaꞌil heyabꞌil yu.
6 Hayet chintzotelan mach chinumi isyaꞌtajil inyabꞌilan,
taka chinbꞌejan intzotelan xin machi linhipaxo isyaꞌil.
7 Yajaꞌ wal tinanh Komam Dios chꞌinilo wipan,
yebꞌ xin haꞌ Komam inipaxilo ebꞌnaj wamigohan.
8 Kaw matxa ischibꞌehal innimanilan yu kaw bꞌajinxahan,
yuxin chihal-laxi tato mulum hinan.
9 Kinisxitnitojan ishowal Komam, pakꞌiko Komam winhan,
isnhetxꞌlapaxo ye winhan yu ishowal, ok tꞌanhno Komam winhan hakaꞌto hunu mak howal wehan yebꞌi.
10 Chiꞌok anma tzotelo winhan,
kat ispaqꞌlaxilto inqꞌotxan chinyinayojan,
chiskutxbꞌaniko isbꞌa sunil winhan.
11 Kinyakojan Komam yul isqꞌabꞌ ebꞌnaj leqꞌtiꞌ,
kinyaqꞌni aykꞌayojan yul isqꞌabꞌ ebꞌnaj txꞌoj isbꞌeybꞌal.
12 Ayxatikꞌa inqꞌalomalan, istanhtzenilo Komam wetan,
yok tzabꞌno yinh innuqꞌan kinisxitnitojan,
kokꞌ kinyutetojan, yilwenti islitꞌ winhan.
13 Bꞌajxanhetuꞌwal titiko islitꞌ winhan,
kabꞌebꞌ ayiko inqꞌejtxꞌotxꞌan yu islitꞌ tuꞌ, matxa xin yaqꞌ nimankꞌulal winhan,
toxanhe tixhmokanto sunil yul inkꞌulan sat txꞌotxꞌ.
14 Holchakantoj, istzilmotoj, lahwi tuꞌ isxitchakantoj,
yok tzujno wintajan yinh anhe hakaꞌ hunu anma kaw nimejal istel.
15 Intzꞌisayojan huneꞌ qꞌap xilqꞌape yet bꞌiskꞌulal, wanikojan qꞌap winhan,
wanayo inwiꞌan xol pojoj.
16 Chimal yibꞌanh isbꞌaqꞌ insatan,
woqꞌan, matxa yip isbꞌaqꞌ insatan.
17 Yajaꞌ xin machi istxꞌojal chinwatxꞌehan,
sajpaxo intxahan chiwaqꞌan tet Komam Dios.
18 ¡Haꞌ isyaꞌtajil chiwaqꞌletiꞌan chiꞌawi, chisqꞌanni iskꞌulal selelo isyaꞌtajil tiꞌ!
¡Machojabꞌ chiyebꞌato txꞌo txꞌotxꞌ tiꞌ isyaꞌtajil chiwaqꞌletiꞌan!a
19 Haꞌ yul satkanh ay huneꞌ mak chaqꞌ isbꞌa winhan,
haꞌ yul satkanh tuꞌ ay huneꞌ mak chinkolnihan.
20 Wal ebꞌnaj wamigohan ayko ebꞌnaj bꞌuchwal winhan,
yajaꞌ wal yul sat Komam Dios chinoqꞌan yu inbꞌiskꞌulalan.
21 ¡Ayxikꞌa chu yok naj winaj bꞌuchwal yinh Komam Dios,
hakaꞌ chu isbꞌuchwa naj yinh yet anmahil!
22 Yajaꞌ wal habꞌil chinekꞌan sat yibꞌanhqꞌinal tiꞌ bꞌisbꞌilxa, lanhanxa xin istzꞌajnahi,
lanhanxa intohan yul isbꞌelal kamikal,
matxa xin chinmeltzohan hunelxa.