17
Matxa chu inhiqꞌnihan jaqꞌeqꞌ, lanhan yul sutsun istzꞌayikal inkamikalan,wal xin watxꞌebꞌilxa bꞌay chinmujihan.
2 Machi hunu mak ayiko inkꞌatanhan,
kachannhe ebꞌnaj chinbꞌuchnihan chiyil insatan,
kaw xin chiwiqꞌ bꞌiskꞌulalan yu bꞌuchwal tzotiꞌ chal ebꞌnaj.
3 Yajaꞌ hach tiꞌ Mamin, Dios hach, hach chawaqꞌ habꞌa winhan, haꞌ hakawilal xin chu inkolni hinbꞌahan,
yuto ¿maktaxka chisje istaqꞌwi winhan ta machi hach?
4 Yuto haꞌ tet hunteqꞌan ebꞌnaj tiꞌ chawebꞌalo hahelanil,
yuxin hawu mach chꞌalaxiko ismay ebꞌnaj.
5 Ta ay hunu mak chipakꞌiko yinh yamigo yu chꞌen melyu,
haxa yuninal chꞌaqꞌlen isyaꞌtajil.
6 Haꞌ Komam kinaniktojan yul istiꞌ konhobꞌ chalni bꞌuchwal tzotiꞌ winhan,
lahan hinan hakaꞌ nixhte tinabꞌ chiqꞌanhi yul sat anma.
7 Lanhan istanhilo yip isbꞌaqꞌ insatan yu isyaꞌil,
toxanhe chiqꞌejxopilo yul innabꞌalan yu.
8 Ebꞌnaj tohol isbꞌeybꞌal chikꞌay iskꞌul yilni hunteqꞌan tiꞌ,
chitit ishowal ebꞌnaj yinh ebꞌnaj txꞌoj.
9 Chibꞌelwi ebꞌnaj tohol yinh isbꞌeybꞌal.
Haxa ebꞌnaj mach istxꞌojal chiswatxꞌe xin, chiꞌahkanokanh yip ebꞌnaj.
10 Yajaꞌ titanhwe hesunil inkꞌatanhan,
kat xin yilchaloj tato machi hunu hex tiꞌ ay hehelanil.
11 Lanhan yekꞌto bꞌelbꞌon tzꞌayik wibꞌanhan,
hokꞌbꞌilxatij tzet chiwochehan yinh innabꞌalan, yebꞌ tzet choche wanmahan.
12 Yajaꞌ wal ebꞌnaj tuꞌ chismeltzoko ebꞌnaj aqꞌbꞌalil yinh tzꞌayikal,
chal ebꞌnaj tato lanhanxa yul sajilqꞌinal yet lanhan yok qꞌejholoj.
13 Nabꞌxanhe chiwechmahan, haꞌ kamikal watutxahan yehi,
haꞌ bꞌey tuꞌ chinokan inwatxꞌeꞌan intxꞌatan xol qꞌejholo.
14 Haꞌ tet kambꞌal chiwalan: “Inmaman hawehi,” yebꞌ xin tet noꞌ ha haꞌ chiwalan:
“Inmiꞌan hawehi, yebꞌ wanabꞌan hawehi,” kinchihan.
15 ¿Bꞌaytuꞌwal ayiko huneꞌ bꞌay chikawxi inkꞌulan tinanh?
Haꞌ tzet ayko yipo wanma tuꞌan, ¿maktaxka chu yilni?
16 Haꞌ tzet ayko yipo wanmahan chiwitojan wintajan yichayto kambꞌal bꞌay nahat yehayto yich,
hun xin chu inxewan xol pojoj yebꞌi,» xhi yaꞌ Job.