Yal naj Bildad yinhbꞌal ebꞌnaj txꞌoj isbꞌeybꞌal
18
Istaqꞌwi naj Bildad suhita, yalni naj hakaꞌ tiꞌ:2 «¿Bꞌaqꞌinh chalinhbꞌa hatzoteli?
Istxumabꞌ isbꞌa hakꞌul yinh tzet chawala, lahwi tuꞌ kat kotzoteli.
3 ¿Tzet yinh xin chonhhal-lax noqꞌal,
yebꞌ xin kaw txꞌojonhpaxo yul kosat?
4 Hach tiꞌ chawoche chakokꞌnheyo hanimanil yu hahowal,
¿tom yu huneꞌ chawu tuꞌ yuxin chikanokano tzꞌinhno txꞌo txꞌotxꞌ tiꞌ,
maka xin chishekꞌilo isbꞌa chꞌen nimeta chꞌen yul yehobꞌal?
5 Haꞌ naj txꞌoj isbꞌeybꞌal chitanhilo istzejtah naj,
matxa xin chitzejtzon xaj istzejtah naj tuꞌ.
6 Chitanhpaxilo xin istzejtah naj yul yatut,
kat istanhpaxilo istzejtzon istah naj yibꞌanh.
7 Haꞌ isxalabꞌ naj kaw ay yip tinanh, chipáxilo yip,
haꞌtikꞌa xin ishelanil naj chꞌaqꞌni aykꞌayoj.
8 Chiꞌalaxayo latzꞌabꞌ yul isbꞌeh naj, hayet chibꞌelwi naj xin,
kat yaykꞌay naj yul hakꞌ.
9 Chꞌalaxayo txꞌanh lasu yul isbꞌeh naj,
kat iskꞌal-laxiko txꞌanh yinh isnuqꞌ yoj naj.
10 Haꞌ txꞌanh lasu ebꞌabꞌilto txꞌanh yul isbꞌeh naj bꞌay chꞌekꞌtoj,
hakpax tuꞌ teꞌ latzꞌabꞌ ebꞌabꞌilto teꞌ yul isbꞌeh naj yu yaykꞌay naj yul,
hak tuꞌ xin mach chu yilni naj yaykꞌayi.
11 Bꞌajxanhetuꞌwal chꞌekꞌi ayxanhetikꞌako xiwkilal yinh,
tzumbꞌebꞌilnhetikꞌa bꞌay chꞌekꞌ chute isnahni.
12 Nixhtejal ispaxilo yip yu wahil,
watxꞌebꞌilxa isyaꞌtajil chitit yibꞌanh.
13 Chilolaxto isnimanil naj yu yabꞌil,
haꞌ yabꞌil tuꞌ yetbꞌi isbꞌa yebꞌ naj kamikal.a
14 Kat yilaxpaxilo aqꞌankꞌulal yul yatut naj,
kat yilaxto tet naj yahaw xiwkilal.
15 Ayikto naj yul yatut, yaj hakaꞌtanhe matxa yatuto naj,
chiqꞌojlaxayo chꞌen azufre, chitixhmoto chꞌen yibꞌanh yatut naj.b
16 Lahan hakaꞌ hunu teꞌ qꞌebꞌtaj chitajilo xeꞌ yul txꞌotxꞌ, kat istzokꞌlaxilto isqꞌabꞌ.
17 Matxa chꞌaqꞌlax bꞌinaho sat txꞌo txꞌotxꞌ tiꞌ,
matxa xin chꞌaqꞌlax bꞌinaho isbꞌi yulaj bꞌeh.
18 Ayko naj xol issajilqꞌinal kat isqꞌojlaxto xol qꞌejholo,
kat isqꞌojlaxpaxilto yinhtajilto sat yibꞌanhqꞌinal tiꞌ.
19 Haꞌ naj txꞌoj isbꞌeybꞌal tuꞌ, machi hunu iskꞌahol pitzkꞌanaj,
machipaxo hunu yuninal iskꞌahol chipitzkꞌa yul iskonhobꞌ.
Machi hunu mak tiꞌ chikan selelo yul yatut.
20 Hayet chiꞌohtanhelaxilo tzet chiꞌalaxayo yibꞌanh naj txꞌoj isbꞌeybꞌal tuꞌ,
kat isxiwkanh anma ay yetkꞌulal bꞌay chiꞌahilo tzꞌayik,
kat isxiwpaxokanh anma ay yetkꞌulal bꞌay chito tzꞌayik.
21 Yinh kaw yeli hak tuꞌ chu istanhkano naj txꞌoj isbꞌeybꞌal,
yebꞌ naj mach chiꞌohtanhenilo Komam Dios,» xhi naj Bildad.