Chikawxi iskꞌul yaꞌ Job tato haꞌ Komam Dios chiꞌaniko yaꞌ yinh iskꞌulal
19
Lahwi tuꞌ istaqꞌwi yaꞌ Job, yalni yaꞌ hakaꞌ tiꞌ:2 «¿Bꞌaqꞌinh chebꞌej heyaqꞌni ekꞌoyaꞌ wanmatiꞌan,
yebꞌ kinhekachꞌobꞌtanhenan yu tzotiꞌ kaw yaꞌ cheyal winhan?
3 Lahonhelxa chexbꞌuchwa winhan.
¿Tom mach chextxꞌixwi heyaniko isyaꞌtajil winhan?
4 Ta xin yeli ay inmulan,
haꞌ wibꞌanhan chꞌay isyaꞌtajil yu inmul tuꞌan.
5 Hex tiꞌ kaw cheyikanh hebꞌa winhan, chinhemaynihan,
cheyalniko yinh insatan tato txꞌoj inbꞌeybꞌalan.
6 Yajaꞌ wal tinanh, yilal heyohtanheniloj tato haꞌ Komam Dios kinaqꞌni aykꞌayojan,
kinyanayojan yul hakꞌ.
7 Chiꞌel wawan hakaꞌ tiꞌ:
“Ay mak chiꞌetliko winhan,” kinchihan, yaj machi mak chiꞌabꞌen tzet chiwalan.
Chinqꞌanan kolwal, yajaꞌ machi mak chiꞌilni tzet chinelikojan.
8 Ismajche Komam Dios inbꞌehan yu matxa chu wekꞌtojan,
yanayo qꞌejholo yul inbꞌehan.
9 Yikanilo Komam inmayan yebꞌ xin yinilo incoronahan yinh inwiꞌan.
10 Yetanto Komam sunil tzet ayinan, yilni intanhkanilojan,
istanhtzelo tzet ayko yipo inkꞌulan hakaꞌ istanhilo hunu teꞌ qꞌebꞌtaj chꞌekꞌ wakna yu jaqꞌeqꞌ.
11 Yaniti Komam isqꞌaqꞌal ishowal winhan,
kinyanikojan xol ebꞌnaj winaj ayko ishowal yinh Komam.
12 Tit bꞌulna sunil ebꞌnaj issoldado Komam winhan,
ishoynayo ebꞌnaj watutan, yaniko ebꞌnaj howal winhan.
13 Yilo Komam Dios ebꞌnaj wuxhtajan inkꞌatanhan,
haxa ebꞌnaj ohtabꞌil hinan yu, hakaꞌxa komon anma kinyutehan ebꞌnaj.
14 Haꞌ mak ayto wuh hinbꞌahan yebꞌi kinisbꞌejkanojan,
makta ohtabꞌil hinan yu, matxa chinisnapaxtijan.
15 Komon anmaxapaxo wekojan yul sat makta ay yul watutan yebꞌ yul sat ebꞌix inchejabꞌan,
hakaꞌ toxanhe chinekꞌ tuklahan, hakxanhe tuꞌ wehan yul sat.
16 Hayet chiwawtenan inchejabꞌan machi taqꞌwi naj wetan,
waxanhka yu intiꞌan chinqꞌanan hunu tzet ye tuꞌ tet.
17 Haꞌ xobꞌ intiꞌan lahanxa hakaꞌ isxobꞌ istiꞌ komon anma yul sat wixalan,
hakpax tuꞌ xin wuninalan, mach chabꞌe tzet chiwalan.
18 Kat inyahlaxpaxojan yu ebꞌnaj nixhte tzehtaj,
hayet chinahwanojan chinyilnikojan ebꞌnaj, kat isbꞌuchwa ebꞌnaj winhan.
19 Sunil ebꞌnaj inmam wuxhta hinbꞌahan yebꞌi chinisyahan ebꞌnaj,
haꞌ ebꞌnaj kaw xahan chiwil hinbꞌahan yebꞌi,
ayxako ishowal ebꞌnaj winhan.a
20 Haꞌ ischibꞌehal innimanilan lanhan istajkaniko yinh inbꞌajilan,
kaw hanikꞌxanhe machi kinkaman.b
21 ¡Hex wamigotiꞌan, tzꞌayojabꞌ hekꞌul winhan!
¡Tzꞌayojabꞌ hekꞌul winhan yuto isqꞌabꞌ Komam Dios kinpitnhenan!
22 ¿Tzet yinh xin chinhetzumbꞌekꞌojan hakaꞌ kinistzumbꞌenikꞌojan Komam Dios?
¿Tom mach chiyiqꞌ hekꞌul hekꞌuxnayto inchibꞌehalan?
23 ¡Majaltam ay mak chitzꞌibꞌnhen tzet chiwalan!
¡Majaltam ay mak chitzꞌibꞌnhen tzet chiwaltiꞌan yul hunu hum!
24 ¡Majaltam ay mak chitzꞌibꞌnheniko yu hunu chꞌen tzꞌujubꞌ yebꞌ yu chꞌen plomo yinh hunu chꞌen chꞌen,
kat iskankano yinh sunilbꞌal ej tiempo!
25 Hanintiꞌan wohtajan tato itzitz Inkolomalan,
haꞌ yinh islahobꞌal haꞌ chinkolnilojan sat txꞌo txꞌotxꞌ tiꞌ.
26 Lahwi tuꞌ haxa yet xaꞌetaxto innimaniltiꞌan chiwilnihan yinh Komam Dios.
27 Hankawinan chiwilikojan yinh Komam,
haꞌ isbꞌaqꞌ insatan chiꞌilniko yinh, maxhtaj hunuxa maka.
Yaj tinanh lanhan ispaxayto yip inkꞌulan.
28 Ayxikꞌa chetxumu cheyalni hakaꞌ tiꞌ: “¿Tzet chijiqꞌ yinh yet chikotzumbꞌenikꞌo yaꞌ Job tiꞌ,
yuto yinhtikꞌa yaꞌ ayko xeꞌ huneꞌ isyaꞌtajil tiꞌ?” estam kexchi.
29 ¡Nanonanhwe tet chꞌen espada, yuto haꞌ chꞌen chiyaqꞌbꞌalnhe Komam Dios yu ishowal,
yu tzetaj ye tuꞌ mach toholoj!
¡Yu heyohtanheniloj tato ay huneꞌ tzꞌayikal bꞌay chiyil Komam tzet chonhelikoj!» xhi yaꞌ Job.