Yal naj Zofar isyaꞌtajil chitit yibꞌanh ebꞌnaj txꞌoj isbꞌeybꞌal
20
Istaqꞌwi naj Zofar, naamatita, yalni naj hakaꞌ tiꞌ:2 «Yinh kaw yeli haꞌ tzet chiyal innabꞌalan,
haꞌ chiwaqꞌan ispajo hatzotiꞌ tiꞌ; chixin inlahikojan waqꞌnihan ispaj tzet chawala:
3 Mawabꞌehan kinhabꞌuchnihan yu tzotiꞌ txꞌoj yoki,
yajaꞌ haꞌ ishelanil innabꞌalan chꞌaqꞌni ispaj tzet chawal tiꞌ.
4 ¿Tom mach hawohtajoj tato haktikꞌa tuꞌ
chaqꞌle naj winaj yichtaxtikꞌa yalaxkano naj sat txꞌo txꞌotxꞌ tiꞌ,
5 haꞌ istzalahilal ebꞌnaj txꞌoj isbꞌeybꞌal hunepchꞌan chaqꞌa,
yebꞌ istzalahilal ebꞌnaj mulum machi nahatli?
6 Waxanhka kaw chiyikanh isbꞌa, aykanh satkanh yalni,
kat yahpaxapno iswiꞌ ebꞌnaj yalanh moyan.
7 Chitanhayoj ebꞌnaj yinh hunelnhe,
hakaꞌ chu istanhayo istzaꞌ no noqꞌ, haxa ebꞌnaj ilnhe ebꞌnaj yalanhtokano xin chal ebꞌnaj hakaꞌ tiꞌ:
“¿Bꞌay makaw istoko ebꞌnaj loloꞌ?” xhi ebꞌnaj.a
8 Hakaꞌ hunu wayike chꞌekꞌtoj matxa xin chiꞌilchahi;
chikꞌaykanh ebꞌnaj hakaꞌ iskꞌaykanh hunu tzet ye tuꞌ chijil yinh wayike.b
9 Haꞌ ebꞌnaj ilni ebꞌnaj tuꞌ yu isbꞌaqꞌ sat matxa chil ebꞌnaj ebꞌnaj hunelxa,
matxa chimeltzopaxo ebꞌnaj bꞌaytikꞌa ekꞌlenaj.
10 Haꞌ ebꞌnaj iskꞌahol ebꞌnaj xin,
chiꞌaqꞌni meltzoho tet anma mebꞌaꞌ tzet yelqꞌa ismam ebꞌnaj.
11 Hayet ayto yip ebꞌnaj, yet aytoko ebꞌnaj yinh istzehal,
kat yul kamikal yinh ebꞌnaj, hun chikankano isbꞌajil ebꞌnaj yebꞌ pojoj.
12 Yuto kaw chiꞌ istxꞌojal chiyabꞌe ebꞌnaj yul istiꞌ,
hakaꞌto chiyebꞌato ebꞌnaj yalanh yaqꞌ,
13 kaw chitzala ebꞌnaj yinh istxꞌojal tuꞌ, yuxin mach chisbꞌejkano ebꞌnaj,
wal xin tzetkano isxuqꞌal chiyabꞌe ebꞌnaj.
14 Yajaꞌ wal yet chiꞌayapno yul iskꞌul ebꞌnaj xin,
kat ismeltzoko howla itahil hakaꞌ ishowal yal istiꞌ noꞌ labꞌa.
15 Haꞌ qꞌalomal elqꞌabꞌil yu ebꞌnaj ayayto yul iskꞌul, haꞌ chꞌok ebꞌnaj isxayetij,
yajaꞌ Komam Dios aqꞌni isxayeti ebꞌnaj.
16 Lahan hakaꞌto chisbꞌiqꞌayto ebꞌnaj ishowal yal istiꞌ noꞌ labꞌa,
haꞌ xin ishowal tuꞌ chꞌaqꞌni kamo ebꞌnaj.
17 Matxa chil ebꞌnaj haꞌ nixhte haꞌ, yebꞌ haꞌ nime haꞌ.
Matxa chil ebꞌnaj noꞌ kabꞌ, yebꞌ noꞌ lech yinh kaw niman, hakaꞌ haꞌ nime elomaꞌ.
18 Haꞌ sunil tzet ye tuꞌ yelqꞌa ebꞌnaj chiyaqꞌ meltzoho ebꞌnaj, yuxin matxa chisbꞌiqꞌayto ebꞌnaj isqꞌalomal tuꞌ, mach chaqꞌpaxo tzalaho iskꞌul ebꞌnaj yinh.c
19 Yuto etli ebꞌnaj yinh anma mebꞌaꞌ, yinilo ebꞌnaj tzetaj aya,
yelqꞌanpaxilo ebꞌnaj teꞌ nha maxhtaj ebꞌnaj watxꞌenhe.
20 Maxhtikꞌa chinoh iskꞌul ebꞌnaj, machi hunu tzet kolcha tet ebꞌnaj,
yuto sunil tzet ye tuꞌ tiꞌ chiyocheko ebꞌnaj.
21 Matxa nichꞌano tzet ye tuꞌ tiꞌ yakano ebꞌnaj,
wal xin sunil tzet ye tuꞌ islohto ebꞌnaj,
yuxin mach chinahatli isqꞌalomal ebꞌnaj.
22 Waxanhka kaw niman tzet ay ebꞌnaj, yajaꞌ machi aqꞌankꞌulal yul yanma ebꞌnaj,
kat yalaxayo isyaꞌtajil yibꞌanh ebꞌnaj yu ebꞌnaj txꞌoj isbꞌeybꞌal.
23 Haxa yet chistxumni ebꞌnaj isnohtzen iskꞌul,
chiyanayti Komam Dios ishowal yibꞌanh ebꞌnaj hakaꞌ yay yaxnhabꞌ,
yebꞌ yibꞌanh tzet chislo ebꞌnaj.
24 Hayet chꞌelkanh ebꞌnaj tet chꞌen hierro yet howal,
kat istzabꞌcha ebꞌnaj yu chꞌen litꞌ bronce,
kat isqꞌaxpon chꞌen yul isnimanil ebꞌnaj.
25 Chiqꞌaxpon chꞌen yul isnimanil ebꞌnaj,
kat yelapno xixiꞌal iswiꞌ chꞌen qꞌan hatxonhe istxam,
chiꞌekꞌto yul iskꞌah ebꞌnaj, hak tuꞌ xin chu yul xiwkilal yinh ebꞌnaj.
26 Haꞌ sunil qꞌejholo chimajchenayo sunil isqꞌalomal ebꞌnaj, kat isnhusnito qꞌa qꞌaꞌ.
Haxa tzet chikan yatut ebꞌnaj haꞌ qꞌa qꞌaꞌ chinhusnipaxtoj.
27 Haꞌ satkanh chihalnilo istxꞌojal ebꞌnaj,
hakpax tuꞌ txꞌo txꞌotxꞌ chiꞌok txꞌotxꞌ aqꞌokꞌule yinh ebꞌnaj.
28 Haꞌ yuninal ebꞌnaj chikan yul yatut,
chiꞌilaxto preso nan konhobꞌal;
kat issajlemito ebꞌnaj yinh istzꞌayikal bꞌay chitit ishowal Komam Dios.
29 Haꞌ sunil hunteqꞌan isyaꞌtajil tiꞌ, haꞌ yinhbꞌal ebꞌnaj txꞌoj watxꞌebꞌilxa yu Komam Dios,
haꞌ ismajul ebꞌnaj chischah tet Komam Dios,
yuto hak tuꞌ yalnikano yinh Istzotiꞌ,» xhi naj Zofar.