Chiꞌahkanh isqꞌalomal ebꞌnaj txꞌoj isbꞌeybꞌal yebꞌ isyaꞌtajil chihul yibꞌanh ebꞌnaj
21
Lahwi tuꞌ istaqꞌwi yaꞌ Job, yalni yaꞌ hakaꞌ tiꞌ:2 «Kaw hajbꞌawe hetxikin heyabꞌen tzet chiwaltiꞌan,
haxinwal cheyaqꞌ yaqꞌlobꞌal inkꞌulan.
3 Niman cheyute hekꞌul winhan yet chintzoteltiꞌan,
lahwi tuꞌ xin waxanhka chexok tzebꞌo winhan.
4 ¿Tom yebꞌ ebꞌnaj winaj chiwaqꞌ howalan?
Yebꞌ xin ¿tom mach chiqꞌ bꞌiskꞌulal wanmahan?
5 Okanhwe tꞌanhno winhan, kat hexiwkanh,
kat hemajchen hetiꞌ yu heqꞌabꞌ yu hesukal.
6 Haꞌ hun hinan chinokan yinh kꞌaykꞌulal yet chinnanitijan huneꞌ yabꞌil ayko winhtiꞌan,
kat isluylunkanh innimanilan yu xiwkilal.
7 ¿Tzet yinh xin ay iskawil ebꞌnaj txꞌoj isbꞌeybꞌal, kat xin yokpaxo ebꞌnaj ichamil,
kat ischꞌibꞌpaxokanh isqꞌalomal ebꞌnaj?
8 Chiyil ebꞌnaj ischꞌibꞌkanh yuninal yebꞌ yuninal yuninal,
chikutxiko yuninal ebꞌnaj tuꞌ iskꞌatanh yinh tzalahilal.
9 Kaw matzet chal iskꞌul ebꞌnaj yul yatut,
mach xin chiyayo Komam Dios isyaꞌtajil yibꞌanh ebꞌnaj.a
10 Kaw saqꞌal ispitzkꞌa yunin iswakax ebꞌnaj,
machi bꞌay tonhe chꞌel yunin noꞌ.
11 Chiwejcha yuninal ebꞌnaj yinh hunta bꞌulan, kat yekꞌ tꞌujlahi,
hakaꞌ yekꞌ wejwon nixhte yunin noꞌ meꞌ.
12 Kaw xin chꞌah tꞌujlahi yu tzalahilal yet chiyabꞌen yok teꞌ tinabꞌ,
yebꞌ yok teꞌ arpa yebꞌ teꞌ suꞌ.
13 Kaw kꞌul chꞌekꞌ tzꞌayik yilaꞌ ebꞌnaj yuto kaw ay isqꞌalomal ebꞌnaj,
mach yaꞌtajo chu iskam ebꞌnaj, kat ismujlax ebꞌnaj.b
14 Ebꞌnaj txꞌoj isbꞌeybꞌal tuꞌ, chal ebꞌnaj tet Komam Dios: “Elanh kokꞌatanhanh, yuto mach chijochehanh huneꞌ bꞌeh chawala.
15 ¿Mak anmahil huneꞌ Mak Sunil Chisje Yu, yuxin chonhokanh koyijeꞌanh tzet chala?
yebꞌ xin ¿Tzet chijiqꞌanh yinh jokanh txahlo tet?” xhi ebꞌnaj.
16 Ebꞌnaj txꞌoj tuꞌ, mach yahawo ebꞌnaj yinh tzet ay yul isqꞌabꞌ.
Nahat yehilo winhan tzet chal ebꞌnaj txꞌoj tuꞌ.
17 ¿Tom ay bꞌay chitanhilo istzejtah ebꞌnaj txꞌoj isbꞌeybꞌal?
¿Tom chiꞌaykꞌay ebꞌnaj yul isqꞌabꞌ isyaꞌtajil?
¿Tom komon chitit ishowal Komam Dios yinh ebꞌnaj,
kat yabꞌen ebꞌnaj isyaꞌil? ¡Machoj!
18 Yajaꞌ xin lahan ebꞌnaj hakaꞌ teꞌ chꞌim chꞌijobꞌtanhelax yu jaqꞌeqꞌ,
yebꞌ hakaꞌ matzꞌik chiꞌijotto yu kajtuxkum.
19 Komam Dios chikꞌubꞌanto isyaꞌtajil chꞌaqꞌlax tet iskꞌahol ebꞌnaj,
yajaꞌ kaw ekꞌbꞌalto kꞌul tato haꞌ ebꞌnaj txꞌoj isbꞌeybꞌal tuꞌ chitohlan ismul,
yunhe chaqꞌ yul iswiꞌ ebꞌnaj yinh istxꞌojal tzet chiswatxꞌe.
20 Haꞌ kaw isbꞌaqꞌ sat ebꞌnaj chiꞌilni isyaꞌtajil tuꞌ,
kat yabꞌlen ebꞌnaj isyaꞌtajil chꞌaqꞌlax tet yu Komam Sunil Chisje Yu.c
21 Yuto ¿Tzet yok ebꞌnaj yinh ta kꞌul chꞌekꞌ yilaꞌ nixhte unin maka machoj yet tzujanilxa yet xakamto ebꞌnaj?
22 ¿Tom ay hunu mak chu yaqꞌni yitzꞌatil wiꞌe tet Komam Dios,
Komam chiꞌilni tzet chꞌeliko makta ay yul satkanh?d
23 Ay mak tiꞌ ayto yip yu istzehal yet chul kamikal yinh, kaw tzalahilal yehi yebꞌ aqꞌankꞌulal yehi.
24 Kaw kꞌul chꞌekꞌ yilaꞌ, kawpaxoj.
25 Aypaxo mak tiꞌ kaw chito ekꞌkano yaꞌ yanma katto iskami,
kaw xin yaꞌtanhetikꞌa chꞌekꞌ yilaꞌ.
26 Yajaꞌ lahannhe chu istanhilo kabꞌ majan tuꞌ xol pojoj,
chinohiko noꞌ ha haꞌ yinh.
27 Hanintiꞌan wohtajan tzet chꞌekꞌ yinh henabꞌal,
yebꞌ xin tzet istxꞌojal chetxum winhan.
28 Yuto cheyal hakaꞌ tiꞌ:
“¿Bꞌaytuꞌwal chikankano yatut huneꞌ naj txꞌoj isbꞌeybꞌal,
kaw yahaw yute isbꞌa naj?” kexchi.
29 ¿Tom maxhto chextzotel tet ebꞌnaj chꞌekꞌ yinh isbꞌel?
¿Tom maxhto cheyabꞌe yalni ebꞌnaj,
30 tato hayet chitit isyaꞌtajil yul sat yibꞌanhqꞌinal tiꞌ,
matzet chischah ebꞌnaj txꞌoj isbꞌeybꞌal?
31 ¿Tom ay bꞌay chihal-laxiko istxꞌojal ebꞌnaj yinh sat?
¿Tom chipajtzelax tet ebꞌnaj istxꞌojal chiswatxꞌe tuꞌ?
32 Haxa yet chikam ebꞌnaj xin, kat yilaxto ebꞌnaj mujuj,
kat yil-lax aqꞌbꞌal yinh bꞌay mujan ebꞌnaj tuꞌ.
33 Kaw xin mach alo txꞌotxꞌ tuꞌ chabꞌe ebꞌnaj,
hayet chiꞌilaxto ebꞌnaj mujuj kaw hantanhe anma tzujaniko yintaj yebꞌ xin sataj.
34 Haꞌ yaqꞌlobꞌal inkꞌulan cheyoche heyaqꞌaꞌ matzet chiswatxꞌe winhan,
haꞌ ispaj intzotiꞌan cheyaqꞌa, leqꞌtiꞌal yehi,» xhi yaꞌ Job.