Isbꞌalkanh naj Elifaz istxꞌojal yinh yaꞌ Job
22
Istaqꞌwi naj Elifaz temanita, yalni naj hakaꞌ tiꞌ:2 «¿Tom ay tzet chiyiqꞌ Komam Dios yinh ebꞌnaj winaj? wal xin haꞌ naj winaj ay ishelanil,
haꞌtikꞌa naj chꞌelwal yinh ishelanil.
3 ¿Tom chitzala Komam Dios, Komam Sunil Chisje Yu,
tato chaxhkan kꞌulal yul sat?
maka ¿tzet chiqꞌ Komam yinh tato chatoholbꞌanheko habꞌeybꞌal?
4 ¿Tom yu hakꞌulal yuxin chayo isyaꞌtajil tawibꞌanh,
chilni tzet chachelikoj yu yijem hach tet?
5 Hach tiꞌ, yinh kaw yeli kaw nimankano hamul,
haꞌ hatxꞌojal mach isbꞌi bꞌay chilahwikanoj.
6 Machi bꞌaytet yinh yuxin hawilo xil isqꞌap ebꞌnaj hawuxhtaj,
hatꞌilbꞌankano ebꞌnaj manh xilqꞌapehal.a
7 Machi nino ha haꞌ hawaqꞌ yukꞌuꞌ makta kaw sikina aya,
hamanhkꞌon hawaqꞌni tzet chislo makta chinhochahi.
8 ¡Hach tiꞌ kaw qꞌalomach tikꞌa yebꞌ kaw aytikꞌa hawelapno sata sunil anma,
yuxin hatxumu tato yahaw hach yinh sunil txꞌo txꞌotxꞌ tiꞌ!
9 ¡Hachejnitopaxo ebꞌix hunix yinh manhtzetal,
hawinipaxilo tzet ay yul isqꞌabꞌ ebꞌnaj kamnaxa ismam, kamnapaxo ismiꞌ!
10 Yuxin hoybꞌil hachayo yu txꞌanh lasu,
kat yul lemna xiwkilal tawibꞌanh.
11 Yebꞌ xin hakaꞌta xol qꞌejholo ayach,
mach chawil bꞌay chachekꞌi,
yebꞌ hakaꞌto lanhan kach yijnito haꞌ nime haꞌ.
12 ¿Tom mach ayahto Komam Dios satkanh bꞌay kaw nahat yetoj?
Ilkꞌanabꞌi haꞌ txꞌumel nahat yekanokanh yul satkanh,
kaw nahat yekantoj.
13 Hach tiꞌ, hak tiꞌ hawalni: ¿Tzet yohtanhen Komam Dios?
¿Tzet chu yok Komam yilni tzet chꞌeliko anma xol qꞌejholo?
14 Chatxumnipaxoj tato mach chil Komam yu isqꞌejal moyan hoyaniko yinh,
yuto chꞌekꞌ istiꞌla satkanh.b
15 ¿Tom chawoche hawatxꞌeꞌ tzet iswatxꞌe ebꞌnaj winaj txꞌoj isbꞌeybꞌal ekꞌlena yet payat?
16 Ebꞌnaj tuꞌ yalanhto maxhto iskambꞌalo ebꞌnaj yilaxilo sat yibꞌanhqꞌinal tiꞌ,
haꞌ tzet ayko yipo ebꞌnaj tanhilo hakaꞌ chu istixhmokanto yojomal ha haꞌ.
17 Yalni ebꞌnaj tuꞌ tet Komam Dios: “¡Hitzanhilo kokꞌatanhanh!” xhi.
Yajaꞌ xin ¿tzet utelax ebꞌnaj yu Komam Sunil Chisje Yu?
18 Wal xin haꞌ Komam nohtzen yatut ebꞌnaj yu qꞌalomal.
Machojabꞌ chꞌekꞌ yinh innabꞌalan hakaꞌ chꞌekꞌ yinh isnabꞌal ebꞌnaj txꞌoj isbꞌeybꞌal tuꞌ.
19 Hayet chiyilni ebꞌnaj kꞌul isbꞌeybꞌal istanhtzelaxilo ebꞌnaj txꞌoj, kaw chitzalakano ebꞌnaj,
kat istzebꞌipaxo ebꞌnaj machi ismul, chalni ebꞌnaj hakaꞌ tiꞌ:
20 “Wal xin tanhkanilo ebꞌnaj ayko ishowal jinh,
haxa tzet ay ebꞌnaj kantokanoj tzꞌato yu qꞌa qꞌaꞌ,” xhi ebꞌnaj.
21 Meltzohanh yinh aqꞌankꞌulal yebꞌ Komam,
kat yaqꞌni Komam aqꞌankꞌulal tawet,
kat yaqꞌnipaxo Komam iskꞌulal tawet.
22 Chah chejbꞌanile tet Komam,
kat hawanayto Istzotiꞌ yul hawanma.
23 Ta chachmeltzo yul isqꞌabꞌ Komam,
Komam Sunil Chisje Yu chiyaqꞌayo Komam isyaxil tawibꞌanh,
hak tuꞌ chu hahitznilo isyaꞌtajil yul hawatut.
24 Ekꞌbꞌal chꞌen oro chawiqꞌaꞌ sata txꞌo txꞌotxꞌ,
yebꞌ xin ekꞌbꞌalpaxo chꞌen oro sata chꞌen chitit bꞌey Ofir,
chawiqꞌ hakaꞌ sunil chꞌen chꞌen ay xolaj ha haꞌ.
25 Haꞌ xin Komam Sunil Chisje Yu chꞌok haqꞌalomaloj hakaꞌ chꞌen oro yebꞌ hakaꞌ chꞌen plata.
Mach isbꞌi hanta chꞌelikoj.
26 Hak tuꞌ xin chu hatzala yinh Komam Sunil Chisje Yu,
kat hatꞌanhxikanh yinh Komam yinh sunil hakꞌul.
27 Hayet chachtxahli tet Komam chabꞌe tzet chawala, kat hayijen tzet chawalte tet Komam.
28 Haꞌ sunil tzet chawoche hawatxꞌeꞌ,
kꞌul chꞌelikoj, kat istzejtzon sajilqꞌinal yul habꞌeh.
29 Haꞌ mak ayko yinh isyaꞌtajil,
chaxhtzotel yinh tet Komam Dios, chawalni: “Chinqꞌanan tawet ta chawikanh ebꞌnaj,” kachi.
Hak tuꞌ xin haꞌ Komam chikolni ebꞌnaj chewchotanhe.
30 Haꞌ Komam chikolni makta machi ismul,
yuto haꞌ mak saj yanma yul sat Komam,
haꞌ chiskolilo Komam,» xhi naj Elifaz.