Yaꞌ Job iskol isbꞌa sata Komam Dios
23
Istaqꞌwi yaꞌ Job, yalni yaꞌ hakaꞌ tiꞌ:2 «Haꞌ tinanh chinokpaxojan tzotelo yu inbꞌiskꞌulalan,
yuto kaw chinqꞌajwihan yu isyaꞌil txꞌak ayilti yinh innimanilan.
3 ¡Maktaxka chu yalni wetan yinh tzet chu yilcha Komam Dios wuhan!
Chimkintohan wilaꞌan Komam bꞌay tzꞌonhan yul isxhila,
4 katmi walnihan tet Komam sunil isyaꞌtajil chiwaqꞌletiꞌan,
kat isnohilo yul intiꞌan yu sunil tzet chiwalan tet Komam.
5 Chimtxumchalo wuhan tzet chispajtze wetan,
chimnachalo wuhan tzet chiyal wetan.
6 ¿Chimok Komam kinismayaꞌan,
kat yiniti ishowal winhan?
Machoj, wal xin chiꞌoktukno yabꞌe tzet chiwalan.
7 Chimistxumilo Komam ta haꞌ ye wuhan,
chalni tato machi inmulan, kat inkolchakanilojan yinh hunelnhe yul sat Komam Dios injuesalan.
8 Yajaꞌ waxanhka xin chinsayan Komam Dios yetkꞌulal bꞌay chꞌahilo tzꞌayik mach chiꞌilcha wuhan,
kat insaynipaxojan bꞌay chito tzꞌayik,
mach chiꞌilchapaxo bꞌey tuꞌ wuhan.
9 Tato chintohan yinh yetkꞌulal norte,
mach chiꞌilcha Komam wuhan;
tato chintopaxojan yinh sur, mach chiwilpaxojan yinh.
10 Yajaꞌ xin yohta Komam inbꞌeybꞌalan chinyilwehan,
kaw xin kꞌul chinelikojan yul sat hakaꞌ chꞌen oro.
11 Inbꞌeybꞌalnhehan isbꞌeybꞌal Komam,
inkꞌubꞌanan tzet chiyala, machi xin bꞌay inhekꞌilo hinbꞌahan yinh Komam.
12 Machi bꞌay inhekꞌilo hinbꞌahan yinh chejbꞌanile chꞌelti yul istiꞌ Komam,
ekꞌna inkꞌubꞌahan Istzotiꞌ Komam sata tzet chinlohan.
13 Yajaꞌ ta haꞌ Komam Dios chihalni hunu tzet ye tuꞌ,
¿mak hunu tiꞌ chu ishelni tzet chal Komam? Wal xin haꞌ tzet choche yanma iswatxꞌeꞌ haꞌ chiswatxꞌe.
14 Haꞌ tzet nabꞌilxa yu Komam Dios winhan, haꞌ chiswatxꞌe,
ay xin hunteqꞌan tzet ye tuꞌ lahan hakaꞌ tiꞌ nabꞌilxa yu.
15 Yuxin chinxiwan sata Komam.
Chinluylunkanhan sata Komam yet chinnanitijan.
16 Yu Komam Dios, Komam Sunil Chisje Yu,
yuxin chipax yip wanmahan yu chinxiwkanhan.
17 ¿Tzet yinh xin mach kintanhtzelaxilojan xol qꞌejholo?
yebꞌ xin ¿tzet yinh xin machi okkano qꞌejholo yinh insatan?» xhi yaꞌ Job.