Chal yaꞌ Job tato chitanhtzelaxilo ebꞌnaj txꞌojal isbꞌeybꞌal
24
Yalnipaxo yaꞌ Job:«Haꞌ yul sat Komam Dios, Komam Sunil Chisje Yu,
machi hunu tzet ye tuꞌ chiyuhi, ewanyehi; yajaꞌ
¿tzet yinh xin mach chiyaqꞌ Komam yohtanhelo istzꞌayikal bꞌay chiyu hunteqꞌan tiꞌ tet makta chꞌohtanhenilo Komam?
2 Ebꞌnaj txꞌoj isbꞌeybꞌal chishekꞌ ebꞌnaj isnajachil istxꞌotxꞌ,
chiyelqꞌan ebꞌnaj noꞌ meꞌ,
noꞌ wakax, kat yok ebꞌnaj istanheno noꞌ.a
3 Chiyelqꞌanto ebꞌnaj isburro ebꞌnaj mebꞌaꞌ unin,
chiyinilo ebꞌnaj iswakax ebꞌix hunix iskꞌambꞌanilo melyu.
4 Chishekꞌilo ebꞌnaj anma ayko yinh manhtzetal yul isbꞌeh,
chiyebꞌan isbꞌa sunil anma mebꞌaꞌ ay sat txꞌo txꞌotxꞌ tet ebꞌnaj.
5 Ebꞌnaj mebꞌaꞌ tuꞌ lahan ebꞌnaj hakaꞌ noꞌ xoltelajil burro sat txꞌotxꞌ desierto,
sahabꞌ chꞌelto ebꞌnaj issayaꞌ tzet chiꞌokniko yu.
Haꞌ bꞌey txꞌotxꞌ desierto chiyiqꞌ ebꞌnaj tzet chislo yuninal.
6 Chꞌelto ebꞌnaj mebꞌaꞌ issikꞌaꞌ iswiꞌ ixim trigo xolaj ismunil anma mach ohtabꞌiloj,
yebꞌ xin chiꞌokpaxo anma mebꞌaꞌ tuꞌ issayaꞌ sat teꞌ uva xol istzꞌunubꞌ ebꞌnaj txꞌoj.
7 Haꞌ anma mebꞌaꞌ, tꞌilan chislanhni wayo isbꞌa yu manh xilqꞌapehal,
hak tuꞌ xin matzet chakanh yibꞌanh xol chew.
8 Xol telaj chiꞌakꞌilo ebꞌnaj yu haꞌ nhabꞌ,
chislaqꞌnayo ebꞌnaj chꞌen chꞌen yu machi bꞌay chiꞌehayo ebꞌnaj.
9 Ebꞌnaj txꞌoj isbꞌeybꞌal, chilo ebꞌnaj nixhte mebꞌaꞌ unin matxa ismam, yinh yim ismiꞌ,
chiyinilo ebꞌnaj nixhte unin tet anma mebꞌaꞌ ay iskꞌas tet ebꞌnaj.
10 Haꞌ mak mebꞌaꞌ tuꞌ chꞌekꞌ yinh manh xilqꞌapehal, chiꞌekꞌpaxo ijo trigo,
yaj kaw chinhocha sikꞌlebꞌil.
11 Chisbꞌaqꞌolti ebꞌnaj mebꞌaꞌ aceite yul chꞌen molino, chisxanhilti ebꞌnaj yal teꞌ uva,
chiswatxꞌen ebꞌnaj vino, yajaꞌ chikam ebꞌnaj sikꞌlebꞌil yu tajintiꞌal.
12 Haꞌ yul konhobꞌ chiqꞌajwi ebꞌnaj lanhanxa iskami, kat yelpaxo yaw ebꞌnaj lanhan iskam yu lahwilal,
yajaꞌ xin mach chabꞌe Komam Dios istxah ebꞌnaj.
13 Ay ebꞌnaj mach ochen sajilqꞌinal, yuxin mach chinachalo isbꞌelal sajilqꞌinal yu ebꞌnaj,
machi ehikꞌo ebꞌnaj yul isbꞌeh.
14 Haꞌ naj maqꞌom anma sahabꞌ chiꞌahwanoj,
kat isto naj ismaqꞌnokamo anma mebꞌaꞌ yebꞌ anma matzet aya,
haxa yet chꞌah aqꞌbꞌal, kat isto naj eleqꞌ.
15 Haꞌ naj ixlom kaw ayko naj yechman yah aqꞌbꞌal, chalni naj:
“Machi mak chinilnihan,” xhi naj, chebꞌanto sat naj.
16 Haꞌ ebꞌnaj elqꞌom tuꞌ hayet aqꞌbꞌalil chito ebꞌnaj eleqꞌ yulajla nha,
bꞌay nabꞌilxa yu yok yinh eleqꞌ.
Ebꞌnaj tuꞌ mach yohtajo ebꞌnaj issajilqꞌinal.
17 Yuto hayet chisajbꞌilo yinh sakꞌayal,
lahan hakaꞌ yenhel kamikal yul sat ebꞌnaj,
ekꞌna chitzala ebꞌnaj yinh qꞌejholo bꞌay ay xiwkilal.
18 Ebꞌnaj tuꞌ chꞌelkanh ebꞌnaj yinh anhe hakaꞌ isbꞌelwi yojomal ha haꞌ,
haꞌ istxꞌotxꞌ ebꞌnaj tzꞌaktiꞌnhebꞌilkanoj,
matxa hunu mak chimeltzo munil xol yuva ebꞌnaj.
19 Hakaꞌ chu iskꞌaykanh yal chꞌen chew yu yoj tzꞌayik,
hak tuꞌ chu istanhkanilo ebꞌnaj mulum yul kambꞌal.
20 Chinahulnhelaxto ebꞌnaj yu ismiꞌ,
haxa noꞌ ha haꞌ chilonito isnimanil ebꞌnaj,
machi hunu mak tiꞌ chinaniti ebꞌnaj.
Chitanhilo ebꞌnaj txꞌoj isbꞌeybꞌal tuꞌ hakaꞌ chu isqꞌajlaxkanh teꞌ qꞌebꞌtaj.
21 Ebꞌnaj tuꞌ chiyeta ebꞌnaj ebꞌix ix machi yunin,
mach chikolwapaxo ebꞌnaj yinh ebꞌix hunix.
22 Yajaꞌ wal Komam Dios chistanhtzelo Komam ebꞌnaj nime winaj yu yip.
Hayet chisyenilo Komam yip, machi hunu mak tiꞌ tꞌinhan yeko yinh iskawil.
23 Komam chiꞌaqꞌni istꞌinhanil yebꞌ iskawxobꞌal iskꞌul ebꞌnaj,
yajaꞌ chil Komam isxalabꞌ ebꞌnaj.
24 Kaw hanikꞌchꞌan tiempohal chꞌalaxiko ismay ebꞌnaj,
lahwi tuꞌ kat iskꞌaykanh ebꞌnaj.
Chꞌaqꞌlax ekꞌoyaꞌ yanma ebꞌnaj hakaꞌ chaqꞌle sunil anma,
kat ismajchelax ebꞌnaj, kat yilaxilo iskawil ebꞌnaj hakaꞌ chu iskꞌuplaxilo iswiꞌ ixim trigo.
25 Tato mach hako tuꞌ yehi, ¿maktaxka hunu mak chu yalni ta leqꞌtiꞌal tzet chiwalan?
Maktaxka hunu mak chu iskꞌotzbꞌan intzotiꞌan,
kat yalni ta intzotiꞌan matzet chaliloj. Machi maka,» xhi yaꞌ Job.