Yaniko naj rey Asuero chꞌen tohlabꞌal yibꞌanh sunil anma ayikꞌto yalanh yip naj; yibꞌanh anma yulajla sunil konhobꞌ yul ej departamento masanta bꞌey ej konhobꞌ ay istiꞌla haꞌ mar. 2 Haꞌ xin sunil tzet iswatxꞌe naj rey tuꞌ, yebꞌ yip naj, yebꞌ ishelanil naj yebꞌ yet yaniko naj ismay yaꞌ Mardoqueo, tzꞌibꞌnhebꞌilkano sunil hunteqꞌan tuꞌ yul libro chitzotel yinh ebꞌnaj isreyal txꞌotxꞌ Media yebꞌ Persia. 3 Yuto haꞌ yaꞌ Mardoqueo, yaꞌ judío, haꞌ yaꞌ iskabꞌ rey yinta naj rey Asuero, yuxin kaw ay yelapno yaꞌ Mardoqueo tuꞌ yul sat ebꞌnaj judío, yebꞌ xin kaw xahan ay yaꞌ yu sunil yet konhobꞌ tuꞌ, yuto yako yaꞌ yinh iskꞌul iswatxꞌen iskꞌulal yinh yet konhobꞌ, yochenpaxo yaꞌ aqꞌankꞌulal xol yet konhobꞌ tuꞌ.