Istanhtzelo ebꞌnaj judío ebꞌnaj aqꞌni howal yinh
9
Haꞌ yinh 13 (yoxlahonhebꞌ) tzꞌayik yinh 12 (iskabꞌlahonhebꞌ) ixahaw, haꞌ ton ixahaw Adar yet tꞌinhanxa yijni isbꞌa chejbꞌanile yalilto naj rey tato chitanhtzelaxilo ebꞌnaj judío yu ebꞌnaj ayko ishowal yinh. Haꞌ yinh huneꞌ tzꞌayik tuꞌ echmabꞌilxa yu ebꞌnaj istanhtzenilo ebꞌnaj judío, yajaꞌ haxa eliko xin haꞌ ebꞌnaj judío tuꞌ qꞌoji yinh ebꞌnaj ayko ishowal yinh. 2 Haꞌ ebꞌnaj judío tuꞌ iskutxbꞌako isbꞌa ebꞌnaj yulaj hunun konhobꞌ ayko yul ismajul naj rey Asuero yu yaniko ebꞌnaj howal yinh ebꞌnaj yoche yaqꞌaꞌ tanholo tuꞌ. Machi xin hunu ebꞌnaj ayko ishowal yinh ebꞌnaj judío tuꞌ qꞌoji yinh ebꞌnaj, yuto sunil hunteqꞌan nan konhobꞌal tuꞌ xiwkanh tet ebꞌnaj. 3 Sunil xin ebꞌnaj yahaw konhobꞌ yebꞌ ebꞌnaj gobernador yulaj departamento yebꞌ ebꞌnaj capitán, ebꞌnaj oficial yet naj rey kolwa yinh ebꞌnaj judío, yuto xiwkanh ebꞌnaj tet yaꞌ Mardoqueo. 4 Yuto haꞌ yaꞌ Mardoqueo tuꞌ kaw niman yelapno yaꞌ yul sat naj rey yul palacio, ispujnakanh isbꞌina yaꞌ yulajla konhobꞌ, hunun tzꞌayik xin yiqꞌnikanh yip ismunil yaꞌ yul palacio.5 Hak tuꞌ yu yaqꞌni ebꞌnaj judío isyaꞌtajil tet ebꞌnaj ayko ishowal yinh, ismaqꞌnikamo ebꞌnaj ebꞌnaj yu espada, istanhtzenkanilo ebꞌnaj judío tuꞌ ebꞌnaj, iswatxꞌe ebꞌnaj tzet yoche iskꞌul yinh ebꞌnaj. 6 Haꞌ bꞌey konhobꞌ Susa iscapital txꞌotxꞌ konhobꞌ tuꞌ, ispotxꞌkamo ebꞌnaj judío tuꞌ 500 ebꞌnaj winaj. 7 Ispotxꞌnipaxokamo ebꞌnaj naj Parsandata, naj Dalfón, naj Aspata, 8 naj Porata, naj Adalía, naj Aridata, 9 naj Parmasta, naj Arisai, naj Aridai, yebꞌ naj Vaizata. 10 Haꞌ ton ebꞌnaj tuꞌ ebꞌnaj 10 (lahonhwanh) iskꞌahol naj Amán, naj iskꞌahol naj Hamedata, naj ok ishowal yinh ebꞌnaj judío, yajaꞌ mach istzabꞌ ebꞌnaj tzet ay ebꞌnaj tuꞌ.
11 Haꞌtikꞌa yinh huneꞌ tzꞌayik tuꞌ hal-lax tet naj rey hanta ebꞌnaj winaj ispotxꞌkamo ebꞌnaj judío bꞌey konhobꞌ Susa, iskonhobꞌ naj rey tuꞌ. 12 Yuxin yal naj rey tet ix reina Ester:
—Bꞌey konhobꞌ Susa tiꞌ ismaqꞌkamo ebꞌnaj judío 500 ebꞌnaj winaj yebꞌ ebꞌnaj 10 (lahonhwanh) iskꞌahol naj Amán, hajxam yul hunteqꞌanxa konhobꞌ ayko yul ismajul konhobꞌ ayko yul inqꞌabꞌan. Wal tinanh xin, ¿tzet hunuxa chaqꞌana? chiwaqꞌan tawet. ¿Aymi hunuxa tzet chawoche chiwaqꞌan tawet? xhi naj.
13 Istaqꞌwi ix Ester:
—Mam rey, tato chischah hawiꞌ, chinqꞌanan tawet tato chachejpaxo ebꞌnaj judío tiꞌ hunuxa tzꞌayik yet hekal bꞌey konhobꞌ Susa tiꞌ yaqꞌni howal yinh ebꞌnaj ayko ishowal yinh, hakaꞌ mayu ebꞌnaj yinh huneꞌ tzꞌayik tiꞌ, hakaꞌ yalni chejbꞌanile, yebꞌ xin chinqꞌanan tato chitꞌunhbꞌalaxkanh ebꞌnaj 10 (lahonhwanh) iskꞌahol naj Amán yinh te teꞌ, xhi ix.
14 Isyijen naj rey hakaꞌ yu yalni ix Ester, yalnilto naj huneꞌ chejbꞌanile tuꞌ bꞌey konhobꞌ Susa. Istꞌunhbꞌalaxkanh isnimanil ebꞌnaj 10 (lahonhwanh) iskꞌahol naj Amán. 15 Iskutxbꞌanpaxo isbꞌa ebꞌnaj judío yinh 14 (iskanhlahonhebꞌ) tzꞌayik yinh ixahaw Adar, ispotxꞌnikamo ebꞌnaj oxebꞌxa ciento ebꞌnaj winaj bꞌey Susa, yajaꞌ xin mach istzabꞌ ebꞌnaj tzetaj ay ebꞌnaj tuꞌ.
Ekꞌtzelax qꞌinh Purim
16 Haxa hunteqꞌanxa ebꞌnaj judío ay yulajla konhobꞌ ayko yul ismajul isnación naj rey, iskutxbꞌapaxiko isbꞌa ebꞌnaj yu iskolni isbꞌa tet ebꞌnaj ayko ishowal yinh; ispotxꞌnikamo 75 (holanhebꞌ iskanhwinaj) mil ebꞌnaj tuꞌ, yajaꞌ wal tzet ay ebꞌnaj maqꞌlaxkamo tuꞌ matzet istzabꞌ ebꞌnaj judío. 17 Haꞌ huneꞌ tiꞌ yu yinh 13 (yoxlahonhebꞌ) tzꞌayik yinh ixahaw Adar, yokkano ebꞌnaj judío tuꞌ yinh aqꞌankꞌulal yinh tzꞌayik 14 (kanhlahonhebꞌ) yinhtikꞌa huneꞌ ixahaw tuꞌ, yekꞌtzen ebꞌnaj qꞌinh yinh huneꞌ tzꞌayik tuꞌ yu tzalahilal. 18 Yajaꞌ wal ebꞌnaj judío ay bꞌey konhobꞌ Susa iskutxbꞌa isbꞌa ebꞌnaj yulbꞌal tzꞌayik 13 (oxlahonhebꞌ) yebꞌ tzꞌayik 14 (kanhlahonhebꞌ) yul huneꞌ ixahaw tuꞌ, haxa yinh tzꞌayik 15 (holanhebꞌ) yokkano ebꞌnaj yinh aqꞌankꞌulal yekꞌtzen ebꞌnaj qꞌinh yu tzalahilal. 19 Yajaꞌ wal ebꞌnaj judío ay yulajla aldea yebꞌ yulajla konhobꞌ machi iskꞌubꞌal aykoj, yekꞌtze ebꞌnaj qꞌinh tuꞌ yinh tzalahilal yinh tzꞌayik 14 (kanhlahonhebꞌ) yinh ixahaw Adar, iswaꞌ ebꞌnaj yinh kaw kꞌul, issahni ebꞌnaj tzettaj ye tuꞌ yinh tzalahilal tet hunun.
4. TꞌINHBꞌALAXKANO HUNEꞌ QꞌINH PURIM
(9:20–10:3)
20 Istzꞌibꞌnhen yaꞌ Mardoqueo sunil hunteqꞌan tiꞌ, yanito yaꞌ carta tet sunil ebꞌnaj judío ay yulajla konhobꞌ ayko yalanh yip naj rey Asuero, ebꞌnaj kawil aya yebꞌ ebꞌnaj nahat aya. 21 Yalnito yaꞌ Mardoqueo tuꞌ tato chiꞌekꞌtzelax qꞌinh yinh 14 (iskanhlahonhebꞌ) tzꞌayik yebꞌ yinh 15 (isholanhebꞌ) tzꞌayik yinh ixahaw Adar yulbꞌal hunun habꞌil, 22 yu isnahniti ebꞌnaj tato haꞌ yinh huneꞌ tzꞌayik tuꞌ istanhtzelo ebꞌnaj judío ebꞌnaj ayko ishowal yinh, yebꞌ yu isnahniti ebꞌnaj huneꞌ ixahaw tuꞌ yu meltzoko isbꞌiskꞌulal ebꞌnaj yebꞌ oqꞌil yinh tzalahilal; chiyekꞌtzen ebꞌnaj qꞌinh, kat iswaꞌ ebꞌnaj yinh tzalahilal kat issahni ebꞌnaj tzet chislo tet hunun, kat yaqꞌni sabꞌehal tet anma mebꞌaꞌ. 23 Hak tuꞌ yu isbꞌeybꞌalnhen ebꞌnaj judío, yekꞌtzen ebꞌnaj qꞌinh tuꞌ yinh hunun habꞌil hakaꞌ yu yekꞌtzelax yinh bꞌabꞌelal tuꞌ, chisyijen ebꞌnaj tzet istzꞌibꞌnheto yaꞌ Mardoqueo. 24 Yuto naj Amán, iskꞌahol naj Hamedata, naj agagueo ok ishowal naj yinh sunil ebꞌnaj judío xaxin iswatxꞌe naj yinh tzet chu istanhtzenilo naj ebꞌnaj; yuxin yilwen naj huneꞌ tzꞌayik chiyij Pur, haꞌ chal yelapnoj suerte, huneꞌ tzꞌayik bꞌay chu ispotxꞌlaxkamo ebꞌnaj judío yu istanhtzelaxkanilo ebꞌnaj yu naj. 25 Yajaꞌ hayet yapni ix Ester sata naj rey, ischejni naj tzꞌibꞌnhelaxo carta bꞌay chala tato haꞌ sunil istxꞌojal istxum naj Amán yinh ebꞌnaj judío, haꞌ yibꞌanh naj Amán tuꞌ chiꞌaykꞌayi, hak tuꞌ yu istꞌunhbꞌalaxkanh naj Amán tuꞌ yebꞌ 10 (lahonhwanh) iskꞌahol yinh te teꞌ. 26 Wal xin haꞌ hunteqꞌan tzꞌayik qꞌinh tuꞌ alaxiko isbꞌi Purim, haꞌ bꞌihe tuꞌ pitzkꞌati yinh huneꞌ tzotiꞌ Pur.a
Yuxin yu tzet yal carta tuꞌ yebꞌ yu tzet yil ebꞌnaj judío, yebꞌ tzet yabꞌe ebꞌnaj, 27 istaqꞌwenkaniko ebꞌnaj tuꞌ huneꞌ qꞌinh yibꞌanh sunil yikꞌatil, yebꞌ yibꞌanh sunil mak chiyako isbꞌa judiosal; kat yekꞌtzen ebꞌnaj kabꞌ tzꞌayikal qꞌinh yinh hunun habꞌil hakaꞌ yu istzꞌibꞌnhelaxkanoj yul carta. 28 Iskankanoj tato chinahlaxti yu sunil ebꞌnaj judío, kat yekꞌtzen ebꞌnaj istzꞌayikal qꞌinh chiyij Purim yinh hunun habꞌil, yu ebꞌnaj mame, yebꞌ yu ebꞌix miꞌe, yebꞌ yu ebꞌnaj uninale, ay yulajla nación yebꞌ yulajla konhobꞌ. Machi xin chiꞌekꞌto yet yekꞌtzen ebꞌnaj huneꞌ qꞌinh tuꞌ, yebꞌ yu isnahniti yikꞌatil ebꞌnaj yinh sunilbꞌal ej tiempo.
29 Haꞌ ix reina Ester iskutzꞌin naj Abihail, yebꞌ yaꞌ Mardoqueo, yaꞌ judío, istzꞌibꞌnheto huneꞌ iskabꞌ carta tuꞌ yinh qꞌinh Purim yalanh sunil yip naj rey. 30 Yalaxto carta tuꞌ tet sunil ebꞌnaj judío, yul 127 konhobꞌ ayko yalanh yip naj rey Asuero. Haꞌ carta tuꞌ alaxto yinh aqꞌankꞌulal yebꞌ yinh kaw isyelal. 31 Alaxto carta tuꞌ yu istꞌinhbꞌalaxkano yekꞌtzelax qꞌinh Purim, yinh istiempohal bꞌay ischejkano yaꞌ Mardoqueo, yaꞌ judío yebꞌ ix reina Ester. Yal-laxi tato yilal isyijen ebꞌnaj judío yebꞌ yuninal chipohchakanh yinh, tzujaniloxa huneꞌ qꞌinh yu isnahnitij ta ekꞌayo huneꞌ bꞌiskꞌulal yelpaxkaniko yinh tzalahilal. 32 Haꞌ chejbꞌanile yal ix Ester tuꞌ, haꞌ ton chihalni yinh tzet chu yekꞌtzelax qꞌinh Purim, haꞌ sunil tuꞌ tzꞌibꞌnhelaxkano yul hum kaw kꞌul yukanoj.