3 Yapnipaxo ix Ester sata naj rey tzoteloj, yay jahno ix yich yoj naj, chixin oqꞌ ix, chisqꞌanni ix tet naj tato chꞌoqꞌ iskꞌul naj isbꞌutni tanho huneꞌ chejbꞌanile kaw how yaqꞌni halbꞌililto yu naj Amán naj Agagueo, yinh ebꞌnaj judío bꞌay chala tato chitanhtzelaxilo sunil ebꞌnaj judío. 4 Yanilto naj rey isqꞌojoch oro tet ix Ester, yahwano ix, yah linhno ix sata naj. 5 Yalni ix tet naj:

—Mam rey, tato kꞌul hakꞌul winhan yebꞌ ta chachtzala winhan yebꞌ ta chischah hawiꞌ chatxumni tato tohol tzet chinqꞌanan tawet tiꞌ, chiwochehan chachej manhkꞌolaxo tzet hal-laxto yul teꞌ carta yu naj Amán agagueo iskꞌahol naj Hamedata, bꞌay chala tato chitanhtzelaxilo ebꞌnaj judío ay sunil yulajla konhobꞌ ayko yalanh hawip. 6 Yuto, ¿tom tonhe chꞌekꞌ insatan chiwilnihan yul isyaꞌtajil yibꞌanh wet konhobꞌan? ¿Tzet kinchihan chiwilnihan istanhtzelaxilo wet konhobꞌan? xhi ix tet naj.

7 Istaqꞌwi naj rey tet ix Ester yebꞌ tet yaꞌ Mardoqueo, yaꞌ ah Judá, yalni hakaꞌ tiꞌ:

—Naj Amán tuꞌ, inchejan tꞌunhkabꞌalaxokanh naj, yuto istxum naj iswatxꞌen istxꞌojal yinh ebꞌnaj judío. Waqꞌnihan yatut naj Amán tuꞌ tawet, reina Ester. 8 Wal tinanh xin tzꞌibꞌnheto carta tet ebꞌnaj judío hakaꞌ chal hekꞌul. Haꞌ carta tuꞌ chito yinh inbꞌihan, kat yok issello injolqꞌabꞌan yinh, haꞌ tzet cheyalto yul carta tuꞌ xin machi mak chu ismanhkꞌoni, xhi naj rey.

9 Hak tuꞌ yu yawtelax ebꞌnaj istzꞌibꞌlom naj rey yinh 23 (oxebꞌ iskawinaj) tzꞌayik yinh yox ixahaw, haꞌ ton ixahaw Siván. Istzꞌibꞌnhen ebꞌnaj yul carta sunil tzet chiyalto yaꞌ Mardoqueo tet ebꞌnaj judío yebꞌ tet ebꞌnaj iswiꞌehal konhobꞌ, yebꞌ tet ebꞌnaj capitán, yebꞌ tet ebꞌnaj yahaw yinh 127 konhobꞌ ayko yul ismajul txꞌotxꞌ konhobꞌ tuꞌ. Chiꞌichiti bꞌey India masanta chꞌapni bꞌey txꞌotxꞌ Etiopía. Haꞌ carta tuꞌ tzꞌibꞌnhelaxto yinh istzꞌibꞌ yebꞌ yinh yabꞌxubꞌal hunun konhobꞌ, istzꞌibꞌnhelaxpaxto carta tuꞌ yinh istzꞌibꞌ yebꞌ yinh yabꞌxubꞌal ebꞌnaj Judío. 10 Tzꞌibꞌnhelax carta tuꞌ yinh isbꞌi naj rey Asuero, yok issellohal isjolqꞌabꞌ naj yinh. Lahwi tuꞌ yalaxto carta tuꞌ yinh correo yibꞌanh noꞌ cheh, yahto ebꞌnaj inito carta tuꞌ yibꞌanh noꞌ cheh kaw anhe chibꞌelwi. Haꞌ noꞌ tuꞌ xol noꞌ ischeh naj rey el noꞌ. 11 Haꞌ yul carta tuꞌ hal-laxto chejbꞌanile tet ebꞌnaj judío ay yulajla konhobꞌ yul ismajul naj rey tato chiskutxbꞌa isbꞌa ebꞌnaj yu iskolni isbꞌa tet anma yebꞌ konhobꞌla iqꞌbꞌil ischꞌen yet howal chiꞌaniko howal yinh. Chiskolni isbꞌa ebꞌnaj judío tuꞌ, chismaqꞌnikamo ebꞌnaj, kat istanhtzenilo ebꞌnaj sunil mak chiꞌaniko howal yinh, yebꞌ nixhte yuninal yebꞌ yixal ebꞌnaj chul howal yinh tuꞌ, kat yinilo ebꞌnaj sunil tzet ay hunteqꞌan anma tuꞌ. 12 Haꞌ huneꞌ tiꞌ yu yinh huneꞌnhe tzꞌayik sunil yulajla konhobꞌ ayko yul ismajul naj rey, yinh 13 (yoxlahonhebꞌ) tzꞌayik yinh ixahaw 12 (kabꞌlahonhebꞌ), haꞌ ton ixahaw Adar.

13 Haꞌ iscopiahil huneꞌ chejbꞌanile tuꞌ alaxto yulaj hunun konhobꞌ yu yohtanhenilo anma ay yul hunun konhobꞌ. Haꞌ chejbꞌanile tuꞌ chala tato helan chiyute isbꞌa ebꞌnaj judío yinh huneꞌ tzꞌayik tuꞌ yu iskolni isbꞌa ebꞌnaj, chismaqꞌnikamo ebꞌnaj ebꞌnaj chiꞌaniko howal yinh. 14 Hak tuꞌ yu isto ebꞌnaj aqꞌom correo bꞌay ayayto iscopiahil carta tuꞌ yibꞌanh noꞌ cheh kaw anhe chibꞌelwi hakaꞌ yalni naj rey. Yal-laxpaxikꞌo huneꞌ chejbꞌanile tuꞌ bꞌey konhobꞌ Susa, iscapital txꞌotxꞌ konhobꞌ tuꞌ.

15 Yelti yaꞌ Mardoqueo yul palacio sata naj rey, ayko xin xilqꞌape yet rey yinh yaꞌ, haꞌ xilqꞌape ayko yinh yaꞌ tuꞌ yaxtzꞌantzꞌonhe yebꞌ saj jilni. Aypaxahto huneꞌ corona oro yinh iswiꞌ yaꞌ, haxa iscapa yaꞌ aykoj, nabꞌa lino yebꞌ qꞌap qꞌap kajmutzꞌmunhe. Hayet yilni anma ay konhobꞌ Susa yaꞌ Mardoqueo tuꞌ kaw tzalakanokanh sikꞌlebꞌil. 16 Haxa ebꞌnaj judío apni sajilqꞌinal yilaꞌ ebꞌnaj, yok niman tzalahilal yinh ebꞌnaj, yok ismay ebꞌnaj. 17 Haꞌ yul hunun konhobꞌ yebꞌ hunun departamento bꞌay apni huneꞌ chejbꞌanile yalilto naj rey tuꞌ kaw tzalakanh ebꞌnaj judío yabꞌeni. Yekꞌtzen ebꞌnaj qꞌinh, yok ebꞌnaj waꞌoj yu tzalahilal. Hayet hunel tuꞌ txꞌiꞌal anma nan konhobꞌal yuteko isbꞌa judiosal yu xiwkilal tet ebꞌnaj judío tuꞌ.