4 Hayet wabꞌenan yalni ebꞌnaj hakaꞌ tuꞌ, way tzꞌonhnojan wokan oqꞌoj, wokan yinh bꞌiskꞌulal oxebꞌ tzꞌayik, wokan txahloj mach xin kinwaꞌan yu intxahlihan sata Komam Dios, isDiosal yul satkanh. 5 Walnihan yinh intxahan tet Komam: «Mam Wahawil, kaw chiwalan tawet, hach isDiosal satkanh, hach tiꞌ kaw ay hawip, kaw aykano hawelapnoj yebꞌ kaw sunil mak chixiw tawet, chayijen tzet halbꞌil hawu tet mak chachocheni, yebꞌ mak chiyijen chejbꞌanile aykano hawu, chayenipaxo iskꞌulchꞌanil hakꞌul tet. 6 Mamin, chinqꞌanan tawet hajbꞌa hatxikin, kat hahajbꞌan hasat hawilni yet chintxahlihan tawet, hanin hachejabꞌ intiꞌan; huneꞌ intxahan chiwaqꞌan tawet tzꞌayik aqꞌbꞌal yinh ebꞌnaj Israel hachejabꞌ, chinqꞌannihan nimankꞌulal yinh komulanh jakojanh yul hasat hanhonh Israel honhtiꞌanh; yuto hanintiꞌan yebꞌ wichmaman jako komulanh. 7 Kaw jakaniko komulanh kowatxꞌenanh istxꞌojal kosunilanh yul hasat, mach koyijehanh tzet chawala, tzet ayayo yul hum, yebꞌ chejbꞌanile hawaqꞌkano tet yaꞌ Moisés hachejabꞌ. 8 Wal tinanh xin Mamin, nati tzet hawalkano tet yaꞌ Moisés hachejabꞌ yet hawalni hakaꞌ tiꞌ: “Tato cheyako hemul haninan chexwaqꞌ tixhchahotojan yulajla konhobꞌ yul sat yibꞌanhqꞌinal tiꞌ,^a 9 yajaꞌ ta chexmeltzoko yul inqꞌabꞌan, chekꞌubꞌan chejbꞌanile kat heyaniko yinh ismunil, waxanhka kaw nahatta pujanextoj chexinkutxbꞌakojan yul konhobꞌ sikꞌbꞌiliko wuhan, huneꞌ bꞌay chibꞌina inbꞌihan,” kachi.

10 »Mamin, hanhonhtiꞌanh hachejabꞌ jehanh, konhhakonhobꞌpaxojanh, konhhakolilojanh xol isyaꞌtajil yu sunil hawip yebꞌ yu yip haqꞌabꞌ. 11 Wal tinanh xin Mam Jahawil, chinqꞌanan tawet tato chahajbꞌa hatxikin yinh intxahan, hanin hachejabꞌ intiꞌan, chawabꞌenpax istxah ebꞌnaj hachejabꞌ tiꞌ, ebꞌnaj chiꞌochen yaqꞌaꞌko hamay; yuxin ayo hakꞌulal wibꞌanhan hanin hachejabꞌ intiꞌan, hak tuꞌ xin kꞌul chute iskꞌul naj rey winhan,» kinchihan yinh intxahan.

Yuto hanintiꞌan, haninan chinbꞌatxikꞌojan isvino naj rey Artajerjes.