—¿Tzet yinh xin kaw bꞌiskꞌulal jilni hasat? Hach tiꞌ mach yabꞌilo chachuteni, wal xin ay tzet chawako yinh hakꞌul yuxin bꞌiskꞌulal hawehi, xhi naj wetan.

Hayet wabꞌenan yalni naj hakaꞌ tuꞌ, inxiwkanhan. 3 Walnihan tet naj:

—Mam rey, nimanojabꞌ tiempo chachekꞌ sat yibꞌanhqꞌinal tiꞌ. ¿Tzikꞌanabꞌ yinh mach isyelo isbꞌa bꞌiskꞌulal yinh insatan? Yuto konhobꞌ bꞌay mujan wichmaman etabꞌiltoj, nhusbꞌilpaxkanto ispultahil, kinchihan.

4 Isqꞌambꞌen naj wetan:

—¿Tzet xin chawoche haqꞌanaꞌ wetan? xhi naj. Hak tuꞌ xin yu wokan txahlo tet Komam Dios, isDiosal satkanh. 5 Lahwi tuꞌ, walnihan tet naj:

—Mamin, tato chischah hawiꞌ, yebꞌ tato kꞌul hakꞌul winhan, chejintojan bꞌey Judá, bꞌey konhobꞌ bꞌay mujan ebꞌnaj wichmaman, kat inwatxꞌenkanhan konhobꞌ tuꞌ, kinchihan.

6 Naj rey tuꞌ tzꞌonhanayo naj, tzꞌonhanpaxayo yixal naj iskꞌatanh. Isqꞌambꞌen naj wetan:

—¿Hanta tiempo chachtohi? Yebꞌ xin, ¿bꞌaqꞌinh chachmeltzohi? xhi naj.

Hak tuꞌ yel yinh iskꞌul naj rey tuꞌ kinischahnitojan, yet walnihan tet naj bꞌaqꞌinh chinmeltzohan. 7 Walnipaxojan tet naj rey tuꞌ:

—Mamin, ta chiꞌel yinh hakꞌul chej tzꞌibꞌnhelaxo hunu carta chiwitojan tet ebꞌnaj gobernador ay isqꞌaxebꞌikꞌto haꞌ Éufrates, haxinwal chinischaktojan ebꞌnaj masanta chinapnihan bꞌey Judá. 8 Chiwinipaxtojan carta tet naj Asaf, naj yilomal haqꞌepta ay bꞌey tuꞌ, yu yaqꞌni naj te teꞌ chiꞌokniko yinh ispultahil palacio, yebꞌ te teꞌ chiꞌokniko yinh iskꞌubꞌal konhobꞌ, yebꞌ te teꞌ chiꞌokniko yinh teꞌ nha bꞌay chinehan, kinchihan.

Hak tuꞌ yu yaqꞌni naj sunil tzet inqꞌanan, yu iskꞌulal iskꞌul Komam Dios winhan.

9 Ischejnito naj rey ebꞌnaj yahawil soldado wintajan yebꞌ ebꞌnaj soldado chiꞌahto yibꞌanh cheh; haxa yet wapnihan yebꞌ ebꞌnaj bꞌay ay ebꞌnaj gobernador isqꞌaxebꞌikꞌti haꞌ Éufrates, waqꞌnihan teꞌ carta tet ebꞌnaj. 10 Yajaꞌ hayet yabꞌen naj Sanbalat horonita, yebꞌ naj Tobías naj chejabꞌ amonita, huneꞌ tuꞌ, istit ishowal ebꞌnaj yuto mach isje ebꞌnaj tato ay hunu mak chikolwa yinh ebꞌnaj Israel.^b

11 Hak tuꞌ yu wapnihan bꞌey Jerusalén. Oxebꞌxa tzꞌayik wapnihan bꞌey tuꞌ xin, 12 wahwanojan yet aqꞌbꞌalil yebꞌ haywanh ebꞌnaj; yajaꞌ xin machi hunu mak tet bꞌay walan tzet yako Komam Dios yinh innabꞌalan yinh tzet chinwatxꞌehan bꞌey Jerusalén. Machi xin hunuxa noꞌ cheh yito ebꞌnaj tzujan wintajan, kachannhe noꞌ bꞌay ayinahtojan. 13 Weltijan yul pulta chiyij ispultahil Akꞌal, yetkꞌulal haꞌ Dragón; wekꞌpaxtojan yul pulta bꞌay chibꞌeykano qꞌalem, wilnihan tato xaꞌaywuyna iskꞌubꞌal Jerusalén yebꞌ xin nhusbꞌilpaxkanto ispultahil. 14 Lahwi tuꞌ wekꞌtojan yul pulta bꞌay ay ha haꞌ, bꞌay ay ispila yaꞌ rey. Haꞌ bꞌey tuꞌ matxa chu yekꞌto noꞌ cheh bꞌay ayinahtojan. 15 Aqꞌbꞌalilto xin yet wahtojan istiꞌla haꞌ nichꞌan haꞌ Cedrón, islahwi inbꞌeytzenan kꞌubꞌ tuꞌ. Lahwi tuꞌ inmeltzohan, woktojan yul pulta chiyij ispultahil akꞌal. 16 Mach xin yohtajo ebꞌnaj oficial bꞌay kinbꞌeykꞌojan, mach xin yohtahopaxo ebꞌnaj tzet bꞌey wubꞌan, yuto maxhto tzet chiwalan tet ebꞌnaj Judá, tet ebꞌyaꞌ sacerdote, tet ebꞌnaj yahaw yehi, yebꞌ tet ebꞌnaj oficial, maxhto tzet chiwalpaxojan tet ebꞌnaj tꞌinhanxa ismunlahi. 17 Lahwi tuꞌ walnihan tet ebꞌnaj hakaꞌ tiꞌ:

—Hex tiꞌ, hex kaw hex cheyila tato kaw yaꞌta yekaniko konhobꞌ tiꞌ, yuto haꞌ konhobꞌ Jerusalén tiꞌ, xaꞌuchkꞌakantoj, tzꞌanaxapaxto ispultahil, yuxin yilal kowatxꞌenkanh iskꞌubꞌal Jerusalén tiꞌ, matxahojabꞌ xin chitzebꞌi anma jinh, kinchihan.

18 Wokan walnojan tet ebꞌnaj yinh tzet yu iskolwa Komam Dios winhan, isyenilo iskꞌulal iskꞌul winhan, walnipaxojan tet ebꞌnaj tzet yal naj rey wetan.

Hayet yabꞌen ebꞌnaj tzet waltuꞌan, yalni ebꞌnaj:

—¡Okojonhwe munil, kat kowatxꞌenkanh kokonhobꞌ tiꞌ! xhi ebꞌnaj.

Hak tuꞌ yu yiqꞌni yip yanma ebꞌnaj, yok ebꞌnaj yiptzeno isbꞌa yinh munil tuꞌ.

19 Yajaꞌ hayet yabꞌen naj Sanbalat horonita, yebꞌ naj Tobías chejabꞌ amonita, yebꞌ naj Gesem, naj árabe huneꞌ tuꞌ, yok ebꞌnaj tzebꞌo jinhanh, yok ebꞌnaj bꞌuchwal, yalni ebꞌnaj hakaꞌ tiꞌ:

—¿Tzet cheyoche chewatxꞌe tiꞌ? ¿Tom cheyoche heyaqꞌaꞌko howal yinh naj rey? xhi ebꞌnaj.

20 Intaqꞌwihan tet ebꞌnaj:

—Haꞌ Komam Dios, isDiosal satkanh chikolwa jinhanh, yuxin hanhonh konhischejabꞌ tiꞌanh chonhokanh munil, chikowatxꞌekanhanh kꞌubꞌ, wal hex tiꞌ xin machi heyok jinhanh, mach chu heyokpaxo koxolanh, yuto mach chexbꞌinapaxo bꞌey Jerusalén tiꞌ, kinchihan tet ebꞌnaj.^c