Pohlaxkanh munil yinh ebꞌnaj ok watxꞌenokanh kꞌubꞌ yinh yakꞌtohal
3
Hak tuꞌ yu yok yaꞌ yahawil sacerdote Eliasib yebꞌ ebꞌyaꞌ yuxhta yet sacerdotehal, iswatxꞌeniko ebꞌyaꞌ ispultahil kꞌubꞌ chiyij ispultahil noꞌ Meꞌ. Iswatxꞌenpaxokanh ebꞌyaꞌ kꞌubꞌ ichiti bꞌey torre Hamea masanta bꞌey huneꞌxa torre chiyij Hananeel. Haꞌ ebꞌyaꞌ watxꞌenkanh kꞌubꞌ tuꞌ, yaniko ebꞌnaj ispultahil. 2 Tzujan tuꞌ iswatxꞌenkanh ebꞌnaj ah Jericó hunxa majan kꞌubꞌ. Haxa hunxa majan xin haꞌ ebꞌnaj iskꞌahol naj Zacur, iskꞌahol naj Imri watxꞌenkanh. 3 Haxa ebꞌnaj iskꞌahol naj Senaa iswatxꞌeko ebꞌnaj pulta chiyij ispultahil noꞌ Kay, yaniko ebꞌnaj isteꞌal yebꞌ ispultahil kꞌubꞌ tuꞌ, yaniko ebꞌnaj chꞌen hierro isqꞌanho pulta. 4 Haꞌ bꞌay kachna ebꞌnaj tuꞌ xin, haꞌ tuꞌ yichepaxokanh yaꞌ Meremot iskꞌahol yaꞌ Urías iskꞌahol naj Cos yanikanh hunxa majan kꞌubꞌ. Haꞌ bꞌay kachna naj tuꞌ, haꞌ tuꞌ yichepaxokanh naj Mesulam iswatxꞌen kꞌubꞌ, naj iskꞌahol naj Berequías, iskꞌahol yaꞌ Mesezabeel. Haꞌ bꞌay kachna naj tuꞌ yichepaxokanh iswatxꞌenkanh naj Sadoc, iskꞌahol naj Baana, hunxa majan chꞌen kꞌubꞌ. 5 Tzujan tuꞌ xin ichipaxokanh iswatxꞌenkanh ebꞌnaj tecoíta chꞌen kꞌubꞌ, yajaꞌ wal ebꞌnaj nime winaj xol ebꞌnaj tecoíta mach isje ebꞌnaj kolwaho yinh ebꞌnaj ijbꞌalom yinh munil tuꞌ. 6 Haxa naj Joiada, iskꞌahol naj Paseah yebꞌ naj Mesulam, iskꞌahol naj Besodías, haꞌ ebꞌnaj ok watxꞌeno huneꞌ pulta chihal-lax Icham Pultahil, yanikanh ebꞌnaj isteꞌal, yaniko ebꞌnaj ispultahil, yanipaxiko ebꞌnaj chꞌen hierro ok isqꞌanhoj. 7 Haꞌ bꞌay kachna ebꞌnaj tuꞌ xin yichepaxokanh naj Melatías gabaonita, yebꞌ naj Jadón meronotita, yebꞌ ebꞌnaj ah Gabaón, yebꞌ ah Mizpa, haꞌ ej konhobꞌ tuꞌ ayko yalanh yip naj gobernador ay isqꞌaxebꞌikꞌti ha haꞌ. Haꞌ ebꞌnaj tuꞌ watxꞌenkanh hunxa majan kꞌubꞌ. 8 Haxa hunxa majan kꞌubꞌ xin, iswatxꞌekanh naj Uziel, iskꞌahol naj Harhaía naj chakꞌom plata, tzujanil yinta naj tuꞌ iswatxꞌenkanh naj Hananías iskꞌahol huneꞌ naj watxꞌem anh kaw xuqꞌ sam, haꞌ ebꞌnaj kawanh tuꞌ watxꞌenkanh huneꞌ majanxa iskꞌubꞌal Jerusalén, masanta bꞌey kꞌubꞌ nimajal sat. 9 Haxa hunxa majan kꞌubꞌ xin iswatxꞌekanh naj Refaías, iskꞌahol naj Hur, gobernador yinh yikta majan konhobꞌ Jerusalén. 10 Tzujan yinta naj tuꞌ iswatxꞌekanh naj Jedaías, iskꞌahol naj Harumaf hunxa majan kꞌubꞌ ayko sata yatut. Tzujan yinta naj tuꞌ, iswatxꞌekanh naj Hatús, iskꞌahol naj Hasabnías hunxa majan kꞌubꞌ.11 Haxa naj Malquías iskꞌahol naj Harim, yebꞌ naj Hasub, iskꞌahol naj Pahat-moab, iswatxꞌekanh naj hunxa majan kꞌubꞌ, iswatxꞌenpaxokanh naj torre chiyij Hornos. 12 Tzujan tuꞌ xin iswatxꞌenkanh naj Salum, huneꞌxa majan kꞌubꞌ, kolwa ebꞌix iskutzꞌin naj yintaj. Haꞌ naj Salum tuꞌ iskꞌahol naj Halohes, gobernador yinh yikta majan konhobꞌ Jerusalén. 13 Haxa pulta chiyij ispultahil Akꞌal, haꞌ naj Hanún yebꞌ ebꞌnaj ah Zanoa watxꞌenkanh. Yanipaxkanh ebꞌnaj isteꞌal, yaniko ebꞌnaj ispultahil, yaniko ebꞌnaj chꞌen hierro isqꞌanho pulta tuꞌ, iswatxꞌenpaxiko ebꞌnaj kꞌubꞌ 450 metro yuko masanta bꞌey huneꞌ pulta bꞌay chiꞌilaxilto qꞌalem. 14 Haxa naj Malquías iskꞌahol naj Recab gobernador yul ismajul konhobꞌ Bet-haquerem, haꞌ naj watxꞌen pulta bꞌay chiꞌilaxilto qꞌalem, yaniko naj pulta tuꞌ, yaniko naj chꞌen hierro isqꞌanho pulta.
15 Naj Salum, iskꞌahol naj Colhoze, gobernador yinh txꞌotxꞌ Mizpa, haꞌ naj watxꞌeniko pulta bꞌay ay isnuqꞌ ha haꞌ. Haꞌ naj watxꞌenkanh, yanikanh naj isteꞌal, yaniko naj pulta tuꞌ, yaniko naj chꞌen hierro isqꞌanho. Iswatxꞌenpaxokanh naj pulta bꞌey haꞌ Siloé, kat xin yekꞌto bꞌay ay istzꞌunubꞌ yaꞌ rey masanta bꞌey qꞌoch chiꞌayapno bꞌey iskonhobꞌ yaꞌ David. 16 Tzujan tuꞌ xin iswatxꞌenkanh naj Nehemías, iskꞌahol naj Azbuc, gobernador yinh yikta majan konhobꞌ Bet-sur hunxa majan kꞌubꞌ chiꞌekꞌ yamaqꞌil ispantionh yaꞌ David chitaapni bꞌay majankanh ha haꞌ yebꞌ bꞌey iscuartel ebꞌnaj soldado kaw helan yinh howal.
17 Tzujan tuꞌ iswatxꞌenkanh ebꞌnaj levita hunxa majan kꞌubꞌ, haꞌ ton naj Rehum iskꞌahol naj Bani; tzujan yinta naj tuꞌ iswatxꞌenkanh naj Hasabías, hunxa majan kꞌubꞌ selelo iskonhobꞌ. Naj Hasabías tuꞌ, gobernador yinh yikta majan txꞌotxꞌ Keila. 18 Tzujan yinta tuꞌ xin iskolwa ebꞌnaj yuxhtaj, haꞌ ton ebꞌnaj tiꞌ, naj Bavai, iskꞌahol naj Henadad, gobernador yinh yiktaxa konhobꞌ Keila. 19 Haxa hunxa majan kꞌubꞌ xin, haꞌ naj Ezer iskꞌahol naj Jesúa gobernador yinh Mizpa watxꞌenkanh, haꞌ kꞌubꞌ iswatxꞌekanh naj tuꞌ, haꞌ ayko sata bꞌay kꞌuwan chꞌen chꞌen yet howal masanta yinh istxikin kꞌubꞌ. 20 Tzujan tuꞌ xin, haxa naj Baruc, iskꞌahol naj Zabai yinh sunil iskꞌul naj ok naj iswatxꞌenokanh hunxa majan kꞌubꞌ, ichitati yinh istxikin kꞌubꞌ masanta sata istiꞌ ispultahil yatut yaꞌ Eliasib, iswiꞌehal sacerdote. 21 Tzujan tuꞌ iswatxꞌenkanh yaꞌ Meremot iskꞌahol yaꞌ Urías iskꞌahol naj Cos huneꞌxa majan kꞌubꞌ, ichiti sata istiꞌ yatut yaꞌ Eliasib, masanta apni yinh istxikin yatut yaꞌ.
22 Tzujan tuꞌ xin iswatxꞌekanh ebꞌyaꞌ sacerdote, ay satla akꞌal hunxa majan kꞌubꞌ. 23 Tzujan tuꞌ xin iswatxꞌenkanh naj Benjamín yebꞌ naj Hasub hunxa majan kꞌubꞌ sata istiꞌ yatut. Tzujan tuꞌ naj Azarías, iskꞌahol naj Maasías iskꞌahol naj Ananías watxꞌenkanh hunxa majan kꞌubꞌ iskawilal yatut. 24 Tzujan tuꞌ xin iswatxꞌenkanh naj Binúi iskꞌahol naj Henadad huneꞌxa majan kꞌubꞌ ichiti bꞌey iskawilal yatut naj Azarías masanta apni yinh istxikin kꞌubꞌ tuꞌ. 25 Haxa naj Palal iskꞌahol naj Uzai, iswatxꞌenkanh naj huneꞌxa majan kꞌubꞌ bꞌey istxikin, masanta bꞌey iskawilal huneꞌ torre nahat yekanh. Aykanh bꞌey iskapil yaꞌ rey, haꞌ ton bꞌey yibꞌanh yamaqꞌil yatut ebꞌnaj soldado chitanhen bꞌey tuꞌ. Tzujan yinta naj tuꞌ iswatxꞌekanh naj Pedaías, iskꞌahol naj Faros huneꞌxa majan. 26 Haxa ebꞌnaj chimunla yul Yatut Komam Dios, ebꞌnaj ay bꞌey Ofel, iswatxꞌekanh ebꞌnaj hunxa majan kꞌubꞌ masanta bꞌey bꞌay ay ha haꞌ yetkꞌulal bꞌay chiꞌahilo tzꞌayik; iswatxꞌenpaxokanh ebꞌnaj huneꞌ torre kaw nahat yekanh. 27 Tzujan tuꞌ xin iswatxꞌenkanh ebꞌnaj tecoíta hunxa majan kꞌubꞌ sata huneꞌ niman torre kaw nahat yekanh masanta bꞌey kꞌubꞌ Ofel.
28 Haꞌ hunun ebꞌyaꞌ sacerdote tuꞌ watxꞌenkanh kꞌubꞌ sata yatut masanta bꞌey pulta bꞌay chiꞌokto noꞌ cheh. 29 Tzujan tuꞌ xin iswatxꞌenkanh naj Sadoc, iskꞌahol naj Imer hunxa majan kꞌubꞌ sata yatut. Tzujan yinta naj tuꞌ iswatxꞌenkanh naj Semaías iskꞌahol naj Secanías naj chitanhen pulta ayko yinh yetkꞌulal bꞌay chiꞌahilo tzꞌayik. 30 Tzujan tuꞌ xin iswatxꞌenkanh naj Hananías iskꞌahol naj Selemías yebꞌ naj Hanún iswaj kꞌahol naj Salaf hunxa majan kꞌubꞌ. Tzujan tuꞌ xin, iswatxꞌenkanh naj Mesulam, iskꞌahol naj Berequías huneꞌxa majan kꞌubꞌ sata yatut. 31 Tzujan tuꞌ xin, iswatxꞌenkanh naj Malquías, iskꞌahol naj chakꞌom plata hunxa majan kꞌubꞌ masanta sata yatut ebꞌnaj chimunla yul Yatut Komam Dios, yebꞌ sata yatut ebꞌnaj txonhwom chitaapni yinh huneꞌ cuarto ayko yinh yamaqꞌil istxikin kꞌubꞌ. 32 Haxa ebꞌnaj chakꞌom plata yebꞌ ebꞌnaj txonhwom, iswatxꞌenkanh ebꞌnaj hunxa majan, ichiti yinh istxikin kꞌubꞌ masanta bꞌey ispultahil noꞌ Meꞌ.