—¿Tzet chu hunteqꞌan ebꞌnaj Judío machi yip tuꞌ? ¿Tom chichahlax yaqꞌni ebꞌnaj isxahanbꞌal tet isDiosal hunelxa? ¿Tom chiwatxꞌokanh yu ebꞌnaj yinh huneꞌ tzꞌayik? ¿Tom chito ilcha chꞌen chꞌen xol tanh, chꞌen xatzꞌato xol qꞌa qꞌaꞌ? xhi naj.

3 Aypaxiko naj Tobías amonita iskꞌatanh naj Sanbalat tuꞌ, yuxin haꞌ hun naj Tobías tuꞌ ok bꞌuchwal hakaꞌ tiꞌ:

—Haꞌ huneꞌ kꞌubꞌ lanhan iswatxꞌenkanh ebꞌnaj tuꞌ, tato chiꞌahto hunu noꞌ wech yibꞌanh, chiꞌelto wuyna chꞌen yalanh noꞌ, xhi naj.

4 Yuxin kinokan txahlo tet Komam Dios, walnihan yinh intxahan: «Mamin, hach koDiosalanh, abꞌe isbꞌuchwa ebꞌnaj tiꞌ jinhanh; haꞌ bꞌuchwal chal ebꞌnaj tiꞌ, yinhojabꞌ ebꞌnaj chilowi, ako ebꞌnaj yul isqꞌabꞌ ebꞌnaj ayko ishowal yinh, kat yilaxto ebꞌnaj preso yul hunuxa konhobꞌ. 5 Machojabꞌ chawaqꞌ nimankꞌulal yinh ismul ebꞌnaj, machojabꞌ chiholaxkanh ismul ebꞌnaj yinh hasat, yuto matit ishowal ebꞌnaj yinh ebꞌnaj chiwatxꞌenkanh kꞌubꞌ tiꞌ,» kinchihan.

6 Hak tuꞌ yu komunlahanh kowatxꞌenkanhanh kꞌubꞌ tuꞌ, yinh anhe xin yikta yunakanh istel, yuto munla konhobꞌ yinh sunil yanma. 7 Yajaꞌ haxa yet yabꞌen naj Sanbalat yebꞌ naj Tobías yebꞌ ebꞌnaj árabe, yebꞌ ebꞌnaj amonita yebꞌ ebꞌnaj ah Asdod tato ayko ip yu ebꞌnaj iswatxꞌi iskꞌubꞌal Jerusalén, yebꞌ ta lanhan ismajchelax nimeta isholanil kꞌubꞌ tuꞌ, istit ishowal ebꞌnaj. 8 Islahtiꞌnhen isbꞌa ebꞌnaj istit yanoko howal yinh konhobꞌ Jerusalén, yu yuchkꞌanto ebꞌnaj. 9 Yuxin konhokanh txahlo tet Komam Dios, koDiosal, janikojanh istanhemal konhobꞌ yinh tzꞌayikal yebꞌ aqꞌbꞌal, yu kokolni kobꞌahanh tet ebꞌnaj ok ishowal jinh tuꞌanh. 10 Ay xin ebꞌnaj Judá halni hakaꞌ tiꞌ: «Haꞌ ebꞌnaj ijom chꞌen matxa yip ebꞌnaj, kaw xin nimanto isqꞌalemal huneꞌ icham kꞌubꞌ tiꞌ, yuxin matxa chonhqꞌoji kowatxꞌenkanh,» xhi ebꞌnaj.

11 Haꞌ ebꞌnaj ayko ishowal jinh tuꞌanh istxum ebꞌnaj hakaꞌ tiꞌ: «Hayet tona nahul ay ebꞌnaj Judá tuꞌ kat japni yinh, kat komaqꞌnikamoj kat yok linhno munil tzabꞌiliko yu ebꞌnaj tuꞌ,» xhi ebꞌnaj. 12 Yajaꞌ ebꞌnaj judío ay iskawilal ebꞌnaj tuꞌ, hul ebꞌnaj yalaꞌ kayel oxel jetanh hakaꞌ tiꞌ: «Bꞌayxanhetuꞌwal ay hex, masan chul ebꞌnaj teyinh,» xhi ebꞌnaj jetanh. 13 Yuxin wakojan hunun majan ebꞌnaj yuxhtanhe isbꞌa yulajla kꞌubꞌ hapantoj, yebꞌ yintakꞌti kꞌubꞌ bꞌay haman, yiqꞌni ebꞌnaj yespada yebꞌ islanza yebꞌ islitꞌ. 14 Yajaꞌ hayet wilnihan tato xiwkanh ebꞌnaj, wok linhnojan, walnihan tet ebꞌnaj yahaw konhobꞌ yebꞌ tet ebꞌnaj oficial yebꞌ tet sunil anma hakaꞌ tiꞌ:

—Mach chexxiw tet ebꞌnaj ayko ishowal jinh tiꞌ, wal xin naweti Komam Dios, Komam kaw niman yelapnoj, yebꞌ kaw ay ismay; aweko howal, kolwe ebꞌnaj juxhtaj, yebꞌpaxo kokꞌahol, yebꞌ kokutzꞌin, yebꞌ jixal yebꞌ jatut, kinchihan.

15 Yabꞌen ebꞌnaj ayko ishowal jinh tuꞌanh tato kowatxꞌe kobꞌahanh, yetanto Komam tzet chiyoche ebꞌnaj iswatxꞌe jinhanh; hak tuꞌ yu komeltzopaxikojanh munil, hunun majan mak yinh ismunil ichebꞌilikoj. 16 Haꞌtikꞌa yinh huneꞌ tzꞌayik tuꞌ, yikta ebꞌnaj winaj ok munil, haxa yiktaxa ebꞌnaj xin yiqꞌ ebꞌnaj islanza yebꞌ yescudo yebꞌ islitꞌ, yebꞌ xin chꞌen coraza, yok ebꞌnaj istanheno konhobꞌ. Haxa ebꞌnaj yahawil Judá, ok iptzeno ebꞌnaj konhobꞌ. 17 Haꞌ ebꞌnaj ayko munil yinh kꞌubꞌ tuꞌ yebꞌ ebꞌnaj ijom ijatz, yebꞌ ebꞌnaj chibꞌelnikꞌo tzet chiꞌokniko yinh munil, huneꞌ isqꞌabꞌ ebꞌnaj chimunlahi, haxa hunxa isqꞌabꞌ ebꞌnaj xin iqꞌnhe chꞌen espada. 18 Haꞌ ebꞌnaj chimunla tuꞌ ayko yespada hunun ebꞌnaj yinh yiktaj; wal naj chiꞌoqꞌtzen chꞌen trompeta ayko naj inkꞌatanhan. 19 Walnihan tet ebꞌnaj yahaw konhobꞌ yebꞌ tet ebꞌnaj oficial yebꞌ tet sunil anma hakaꞌ tiꞌ:

—Haꞌ huneꞌ munil tiꞌ, kaw niman yebꞌ xin kaw nimajal yekoj, yuxin kaw nahat koxol hununonh yet chonhmunlahi, 20 yuxin hayet cheyabꞌen yoqꞌtzelax chꞌen trompeta, kat hekutxiko kokꞌatanhanh, haxa Komam Dios, koDiosal chiꞌaqꞌni howal koseleloj, kinchihan.

21 Hak tuꞌ yu komunlahanh yinh munil tuꞌ kaw xin sahabꞌ chonhichikojanh komunlahanh masanto yet chiꞌah aqꞌbꞌal; wal yiktaxa majan ebꞌnaj winaj xin yiqꞌ ebꞌnaj islanza, yok ebꞌnaj istanheno konhobꞌ.

22 Lahwi tuꞌ walnipaxojan tet konhobꞌ tato chikankano yul konhobꞌ Jerusalén hunun anma yebꞌ ischejabꞌ, yu ismajwahi yet aqꞌbꞌalil, haxa yet tzꞌayikal xin, kat ismunla yinh kꞌubꞌ.

23 Yajaꞌ wal hanin tiꞌanh yebꞌ ebꞌnaj ayto wuh hinbꞌahan yebꞌi, yebꞌ ebꞌnaj tzehtaj tzujan wintajan, yebꞌ ebꞌnaj soldado tzujan wintajan, mach chijilo xil koqꞌapanh yet aqꞌbꞌalil, kachannhe yet chonhaxhnihanh, kat jinilo xil koqꞌapanh.