Yilo yaꞌ Nehemías isyaꞌtajil ah xol konhobꞌ
5
Haꞌ yinh hunteqꞌan tiempo tuꞌ, ah yaw ebꞌnaj winaj yebꞌ ebꞌix ix yok yalnoj yinh tzet chiꞌutelax yu yet konhobꞌ Judá.a 2 Ay mak halni hakaꞌ tiꞌ: «Hanhonhtiꞌanh kaw txꞌiꞌal juninalanh, yuxin chikohel kotrigohanh, yu yekꞌ juhanh,» xhi. 3 Aypaxo mak halni hakaꞌ tiꞌ: «Hanhonhtiꞌanh, yunhe mach chijaqꞌlehanh wahil, yuxin jatojanh kotxꞌotxꞌanh yebꞌ juvahanh tzꞌunbꞌil yebꞌ jatutanh selelo chꞌen melyu chiloqꞌni kotrigohanh,» xhi ebꞌnaj. 4 Aypaxo mak halni: «Hanhonhtiꞌanh, kokꞌamnhehanh chꞌen melyu jaqꞌanh tohlabꞌalo tet naj rey, janikantojanh yumal kotxꞌotxꞌanh, yebꞌ juvahanh tzꞌunbꞌil iskꞌambꞌanilo chꞌen melyu, 5 yajaꞌ hanhonhtiꞌanh lahan anmahil honhanh yebꞌ ebꞌnaj jet konhobꞌ tiꞌanh, hakpax tuꞌ juninalanh lahan anmahil yebꞌ yuninal ebꞌnaj, yajaꞌ kotxonhtojanh kokꞌaholanh yebꞌ kokutzꞌinanh chejabꞌo tet ebꞌnaj, matxa xin chonhqꞌojihanh koloqꞌnilojanh juninal tuꞌanh tet ebꞌnaj, yuto kotxꞌotxꞌanh yebꞌ juvahanh nanxa mak ay yet,» xhi ebꞌnaj.6 Hayet wabꞌenan yalni konhobꞌ yinh tzet yeko tuꞌ, istit inhowalan. 7 Wokan intxumnojan yinh tzet chu iswatxꞌayo huneꞌ tuꞌ, inkachnihan ebꞌnaj yahaw konhobꞌ yebꞌ ebꞌnaj oficial, walnihan:
—¿Tom cheqꞌan iskꞌambꞌanil chꞌen melyu tet heyet konhobꞌ tiꞌ? kinchihan; yuxin niman mak inkutxbꞌakojan yunhe kolahtiꞌnhen kobꞌahanh yinh huneꞌ tiꞌ. 8 Walnihan tet ebꞌnaj:
—Hanhonhtiꞌanh jaqꞌ janmahanh kokolnilojanh jet konhobꞌ Judá yalanh yip nime nan konhobꞌal bꞌay txonhbꞌiltoj, haxa hex tiꞌ xin lanhan hetxonhnipaxto jet konhobꞌ tiꞌ, ¿tom xin chonhokpaxojanh koloqꞌoꞌanh jet konhobꞌ tiꞌ teyet? kinchihan.
Hak tuꞌ xin matxa taqꞌwi ebꞌnaj yet walnihan hakaꞌ tuꞌ.
9 Walnipaxojan tet ebꞌnaj:
—Haꞌ tzet cheyu tiꞌ mach kꞌuloj; wal xin yilal heyeniloj tato ay yelapno Komam Dios yul hesat, hak tuꞌ xin mach chibꞌuchwa ebꞌnaj ayko ishowal jinh yulajla konhobꞌ. 10 Hanintiꞌan yebꞌ ebꞌnaj wuxhtajan yebꞌ ebꞌnaj inchejabꞌan ay chꞌen melyu yebꞌ ixim trigo jaqꞌanh kꞌamil tet jet konhobꞌ tiꞌ, yajaꞌ wal tinanh xin matxa chikoqꞌanpaxojanh tet ebꞌnaj. 11 Yuxin wal tinanh chinqꞌanan teyet tato cheyaqꞌ meltzoho istxꞌotxꞌ jet konhobꞌ yul isqꞌabꞌ yebꞌ istzꞌunubꞌ uva yebꞌ teꞌ olivo yebꞌ yatut, kat heyaqꞌnipaxo chꞌen yal xayaqꞌ ebꞌnaj teyet, ishun majan yinh 100 (hokꞌal) majan, iskꞌambꞌanil chꞌen melyu, ixim trigo, vino, yebꞌ aceite heqꞌan tet heyet konhobꞌ tiꞌ, kinchihan tet ebꞌnaj.
12 Istaqꞌwi ebꞌnaj:
—Kꞌultikꞌa, chijaqꞌ meltzohojanh sunil tuꞌ tet ebꞌnaj, machi xin iskꞌambꞌanil chikoqꞌananh, chikoyijehanh tzet chawal tiꞌ, xhi ebꞌnaj.
Hak tuꞌ yu inkutxbꞌanikojan ebꞌyaꞌ sacerdote sata ebꞌnaj tuꞌ, walnihan tato chistaqꞌweko ebꞌnaj yibꞌanh, tato chisyije ebꞌnaj tzet chala. 13 Intziknihan xil inqꞌapan sata ebꞌnaj, walnihan:
—Haktikꞌapax tuꞌ chu kexistziknilti Komam Dios yul heyatut maka xol hemunil tato mach cheyije huneꞌ tiꞌ, chextzikobꞌtanhelaxi, kat hekankano yinh manhtzetal, kinchihan.
Istaqꞌwi sunil ebꞌnaj kutxaniko tuꞌ:
—¡Yubꞌojabꞌ hakaꞌ hawalni tiꞌ! xhi ebꞌnaj.
Yok ebꞌnaj yanoko ismay Komam Jahawil. Hak tuꞌ yu isyijen ebꞌnaj sunil tzet yal tuꞌ.
14 Hanintiꞌan, hataxtikꞌa yet kinyanikojan naj rey Artajerjes gobernadoral yinh txꞌotxꞌ Judá tiꞌ yulbꞌal 12 (kabꞌlahonhebꞌ) habꞌil, yet 20 (hunkꞌalxa) habꞌil yok naj reyal masanto yet 32 (kabꞌlahonhebꞌ iskawinaj) habꞌil, mach inqꞌanan tzet chinlohan tet konhobꞌ hakaꞌ isqꞌanni ebꞌnaj gobernador, mach inqꞌanpaxojan tzet chislo ebꞌnaj wuxhtajan yebꞌ ebꞌnaj inchejabꞌan; 15 yajaꞌ wal ebꞌnaj gobernador ekꞌlena bꞌabꞌel insatajan ok ebꞌnaj yetaꞌ konhobꞌ, isqꞌanni ebꞌnaj 40 (kawinaj) siclo chꞌen plata hunun tzꞌayik yinh tzet chislo yebꞌ yinh isvino. Hakpax tuꞌ ebꞌnaj ischejabꞌ ebꞌnaj yiqꞌkanh yip yibꞌanh konhobꞌ; yajaꞌ wal hanintiꞌan mach wutehan hakaꞌ tuꞌ, yuto chinxiwan tet Komam Dios.b 16 Yebꞌpaxo hunxa, inyijehan inmunlahan yinh hunun majan iskꞌubꞌal konhobꞌ, ismunlapaxo ebꞌnaj inchejabꞌan, machi xin intxꞌotxꞌan inloqꞌan, 17 chiwaꞌpaxo 150 ebꞌnaj Judá wintajan yebꞌ ebꞌnaj oficial, nan xin yepaxo ebꞌnaj chitit yulajla konhobꞌ ayko yinhla ishoyanil Jerusalén kinistukleꞌan. 18 Haninan xin chiwaqꞌan tzet chislo ebꞌnaj; hunun tzꞌayik ispotxꞌlax hunun noꞌ wakax yok wajtakꞌonh noꞌ meꞌ kaw bꞌaqꞌich, nanyepaxo noꞌ chꞌik chiwatxꞌelax kokꞌuxuꞌanh, kat yilaxti niman vino yulbꞌal 10 (lahonhebꞌ) tzꞌayik, yajaꞌ xin mach bꞌay inqꞌanan tzet chinlohan tet konhobꞌ yu inmunilan yinh gobernadoral, waxanhka xin wet ayan inchahnihan, wal xin mach inqꞌanan yuto kaw niman munil ayko yibꞌanh konhobꞌ.
19 Intxahlihan tet Komam Dios hakaꞌ tiꞌ: «Mamin, hach inDiosalan, chinhanatijan, yu sunil iskꞌulal inwatxꞌehan yinh konhobꞌ tiꞌ, chawaqꞌni iskꞌulal ispajo selel wetan,» kinchihan.