Ok ebꞌnaj ayko ishowal yinh yaꞌ Nehemías istxumuꞌ iswatxꞌen istxꞌojal yinh yaꞌ
6
Hayet yabꞌen naj Sanbalat yebꞌ naj Tobías yebꞌ naj Gesem, naj árabe, yebꞌ hunteqꞌanxa ebꞌnaj ayko ishowal jinhanh tato xalahwi kowatxꞌenkanhanh kꞌubꞌ, yebꞌ matxa bꞌay chu yokti ebꞌnaj yul kꞌubꞌ, (waxanhka xin maxhto chiꞌok ispultahil.) 2 Ischejni naj Sanbalat yebꞌ naj Gesem ischejabꞌ yalno wetan hakaꞌ tiꞌ: «Titanh kat kokutxbꞌaniko kobꞌa bꞌey yaldeahil Ono,» xhiti ebꞌnaj wetan. Yajaꞌ xin txꞌoj lanhan isnahni ebꞌnaj winhan, yuxin yal ebꞌnaj huneꞌ tuꞌ wetan. 3 Yuxin inchejto inchejabꞌan yalaꞌ tet ebꞌnaj: «Hanintiꞌan mach chu inbꞌejnikanojan huneꞌ munil kaw ay yelapno tiꞌ, yuto ta chintohan tekꞌatanh tuꞌ chiꞌok linhnoj, yuxin mach chu intohan,» kinchihan tet ebꞌnaj. 4 Kanhel yati ebꞌnaj ischejabꞌ yalno huneꞌ tuꞌ wetan, yajaꞌ xin hakaꞌtikꞌa yu walnitojan yet bꞌabꞌelal haktikꞌapax tuꞌ yu inpajtzentojan tet ebꞌnaj. 5 Haxa yinh ishowelal xin ischejni naj Sanbalat huneꞌ ischejabꞌ yalno huneꞌ tuꞌ wetan yinh huneꞌ carta tzꞌibꞌnhebꞌil yu naj, huneꞌ carta tuꞌ hajan. 6 Xhi huneꞌ carta tuꞌ hakaꞌ tiꞌ: «Chiwabꞌehan yal-lax yulajla nime konhobꞌ, hak tuꞌ yalnipaxo naj Gasmu tato hach tiꞌ yebꞌ ebꞌnaj hawet judiosal cheyoche heyiqꞌalo hebꞌa yalanh yip naj rey, yuxin lanhan hewatxꞌen iskꞌubꞌal konhobꞌ Jerusalén yunhe hawok reyal. 7 Chiwabꞌenpaxojan isqꞌumal ta chachejikoj ebꞌnaj profeta yalnokꞌo tawinh bꞌey Jerusalén hakaꞌ tiꞌ: ¡Ayxa isreyal Judá! xhi. Haꞌ tzet chibꞌina teyinh tuꞌ xayabꞌelo naj rey, yuxin wal tinanh titanh inkꞌatanhan, kat kolahtiꞌnhen kobꞌa,» xhi huneꞌ carta tuꞌ.8 Yuxin inpajtzetojan yul carta hakaꞌ tiꞌ: «Haꞌ tzet chawal tiꞌ mach chiꞌekꞌ yinh konabꞌalanh, wal xin hach chiꞌekꞌ huneꞌ tuꞌ yinh hawanma,» kinchitojan. 9 Haꞌ ebꞌnaj tuꞌ yal ebꞌnaj hakaꞌ tuꞌ yu konhisxibꞌtenkanhanh ebꞌnaj, istxumni ebꞌnaj jinhanh: «Chipaxo yip hunteqꞌan ebꞌnaj tuꞌ, matxa xin chilawi huneꞌ munil tzabꞌiliko yu ebꞌnaj tuꞌ,» xhi ebꞌnaj jinhanh. Yajaꞌ xin kintxahlihan hakaꞌ tiꞌ: «Mamin, hach inDiosalan, wal tinanh chinqꞌanan tawet tato chawaqꞌ wipan,» kinchihan.
10 Lahwi tuꞌ intohan bꞌey yatut naj Semaías, iskꞌahol naj Delaía, iskꞌahol naj Mehetabel, naj tuꞌ majchebꞌilikto isbꞌa yul yatut. Yalni naj wetan:
—Tonh jebꞌa kobꞌa yul Yatut Komam Dios kat kopebꞌanilti pulta, yuto haꞌ yinh huneꞌ aqꞌbꞌal tiꞌ chul ebꞌnaj ayko ishowal tawinh kach ispotxꞌoꞌkamoj, xhi naj wetan.
11 Intaqꞌwihan tet naj xin:
—Ebꞌnaj winaj hakaꞌ intiꞌan, ¿tom chiyebꞌa isbꞌa ebꞌnaj, kat yokto ebꞌnaj yul Yatut Komam Dios yunhe iskolni isbꞌa? Wal xin mach chinoktojan yul Yatut Komam yu inkolni hinbꞌahan, kinchihan.
12 Wal hinan, intxuman tato maxhtaj Komam Dios halni huneꞌ tuꞌ tet naj, wal xin yal naj huneꞌ tuꞌ, yuto tohlalax naj yu naj Tobías yebꞌ naj Sanbalat yu yaniko naj leqꞌtiꞌal wetan. 13 Istohla ebꞌnaj naj Semaías tuꞌ yu yok naj kinisxibꞌtenkanan, yu waniko inmulan, yu inkanan txꞌojal, kat yel inpixanan yalni ebꞌnaj.
14 Yuxin kintxahlihan tet Komam Dios, walnihan: «Mamin, hach inDiosalan nati tzet chinyutehan naj Tobías yebꞌ naj Sanbalat tiꞌ, chananipaxti tzet chinyutehan ix Noadías, ix chal isbꞌa hachejabꞌoj yebꞌ hunteqꞌanxa ebꞌnaj chinxibꞌtenkanhan, ebꞌnaj chal isbꞌa hachejabꞌoj,» kinchihan yinh intxahan.
15 Islahwi iswatxꞌikano kꞌubꞌ tuꞌ yinh 25 (howebꞌ iskawinaj) tzꞌayik yinh ixahaw Elul, 52 (kabꞌlahonhebꞌ yoxkꞌal) tzꞌayik yitoj yet iswatxꞌikanoj. 16 Hayet lahwi yabꞌen ebꞌnaj ayko ishowal jinhanh tato xalahwi munil tuꞌ juhanh, yebꞌ yet yabꞌen ej konhobꞌ ayko yinhla ishoyanil konhobꞌ bꞌay ayonhanh, isxiwkanh, yohtanheniloj tato haꞌ Komam Dios kolwa jinhanh yinh munil tiꞌ.
17 Haꞌ yulbꞌal hunteqꞌan tzꞌayik tuꞌ kaw txꞌiꞌal carta istzꞌibꞌnheto ebꞌnaj iswiꞌehal Judá tet naj Tobías, ispajtzenpaxo naj hunteqꞌan carta tuꞌ. 18 Yuto ay hunteqꞌan ebꞌnaj Judá kꞌul chiyil isbꞌa yebꞌ naj Tobías, yuto haꞌ iskutzꞌin naj Secanías iqꞌbꞌil yu naj Tobías. Wal naj Secanías, iskꞌahol naj Ara ye naj. Haxa naj Johanán, iskꞌahol naj Tobías, iqꞌnikanh iskutzꞌin naj Mesulam. Wal naj Mesulam, iskꞌahol naj Berequías ye naj. 19 Yuxin kaw kꞌul istzotel ebꞌnaj Judá tuꞌ yinh naj Tobías yinh insatan, chalni ebꞌnaj tet naj tzetaj chiwalan, chaniti naj Tobías tuꞌ carta wetan yunhe inxiwkanhan.