Ilaxilo ebꞌix ix nan konhobꞌal xol ebꞌnaj Israel
10
Hayet lanhan yoqꞌ yaꞌ Esdras chalni yaꞌ ismul konhobꞌ Israel tet Komam Dios yinh istxah yet jahanayo yaꞌ sata Yatut Komam Dios, iskutxbꞌaniko isbꞌa ebꞌnaj winaj, yebꞌ ebꞌix ix, yebꞌ nixhte unin, yokpaxo huneꞌ niman oqꞌil, kaw nanxa yoki. 2 Istzotel naj Secanías, iskꞌahol naj Jehiel, naj titna yinh yuninal naj Elam, tet yaꞌ Esdras, yalni naj: «Hanhonhtiꞌanh majako komulanh sata Komam Dios, koDiosalanh, yuto jiqꞌanh ebꞌix ix nan konhobꞌal ay bꞌey tiꞌ jixalojanh, waxanhka jako komul tuꞌanh, yajaꞌ ayto iskꞌulal chu kowatxꞌenanh, chiꞌok yipo iskꞌul konhobꞌ Israel. 3 Wal tinanh xin chikotꞌinhbꞌahan kotratohanh yebꞌ Komam Dios, chijaqꞌni meltzohojanh ebꞌix ix nan konhobꞌal jiqꞌkanhanh jixalojanh, chiyaqꞌnipaxo meltzohojanh yunin ebꞌix yintaj, yu koyijenanh tzet chawala, yebꞌ tzet chal ebꞌnaj chiyijen ischejbꞌanil Komam Dios, koDiosal, yu yijni isbꞌa hakaꞌ yalni chejbꞌanile. 4 Yuxin ahanhwanoj hach kawach chawatxꞌe huneꞌ tiꞌ kat jokanh hawetbꞌihoj, ako yip hawanma kat hawok hawatxꞌenoj,» xhi naj tet yaꞌ.5 Hak tuꞌ yu yahwano yaꞌ Esdras, yalni yaꞌ ta chistaqꞌwekano ebꞌnaj iswiꞌehal konhobꞌ yebꞌ ebꞌnaj levita yebꞌ sunil konhobꞌ Israel isyijen huneꞌ tuꞌ, hakpax tuꞌ konhobꞌ istaqꞌwekano yinh isyijeni. 6 Lahwi tuꞌ yel yaꞌ Esdras sata Yatut Komam Dios, isto yaꞌ yul iscuarto naj Johanán, iskꞌahol yaꞌ Eliasib, haxa yet ay yaꞌ bꞌey tuꞌ mach waꞌ yaꞌ, mach yukꞌpaxo yaꞌ haꞌ yu bꞌiskꞌulal, yinh ismul ebꞌnaj meltzo bꞌey Judá, ebꞌnaj bꞌeylekꞌo presohal.
7 Lahwi tuꞌ isto hal-laxo tet sunil anma ay bꞌey Judá yebꞌ Jerusalén tato chiskutxbꞌako isbꞌa bꞌey Jerusalén, haꞌ ton sunil anma bꞌeykꞌo presohal. 8 Yal-laxi tato ay mak mach chiꞌapni yinh yox tzꞌayik hakaꞌ yu yalni ebꞌnaj iswiꞌehal konhobꞌ yebꞌ ebꞌnaj ichamta winaj, chiꞌilaxilo istxꞌotxꞌ kat yilaxilo xol ebꞌnaj bꞌeylenakꞌo preso. 9 Hak tuꞌ yu iskutxbꞌaniko isbꞌa sunil ebꞌnaj Judá yebꞌ ebꞌnaj Benjamín bꞌey Jerusalén yulbꞌal oxebꞌ tzꞌayik, yinh ishunkꞌal tzꞌayik yinh isbꞌalonhebꞌ ixahaw, yay tzꞌonhno ebꞌnaj bꞌey txonhbꞌal bꞌey Yatut Komam Dios, chixin luylun ebꞌnaj yu xiwkilal yinh tzet chiꞌeliko huneꞌ tuꞌ yebꞌ yu chiyaqꞌ haꞌ nhabꞌ.a 10 Yah linhno yaꞌ sacerdote Esdras, yalni yaꞌ tet ebꞌnaj:
—Hex tiꞌ xaheyako hemul yuto heyiqꞌkanh ebꞌix ix nan konhobꞌal heyixaloj, heyaniko yaqꞌbꞌil ismul konhobꞌ Israel yibꞌanh. 11 Wal tinanh xin aweko ismay Komam Dios, isDiosal jichmam, kat hewatxꞌen tzet chal iskꞌul Komam, kat hepohnilo hebꞌa xol anma nan konhobꞌal ayayo kokawilal tiꞌ, chebꞌejnikano ebꞌix ix nan konhobꞌal heyiqꞌle heyixaloj, xhi yaꞌ Esdras.
12 Istaqꞌwi sunil ebꞌnaj kutxaniko tuꞌ, yalni ebꞌnaj yinh kaw ip hakaꞌ tiꞌ:
—Kꞌultikꞌa, yubꞌojabꞌ hakaꞌ hawalni tiꞌ, 13 yajaꞌ hanhonh kutxanonhiko tiꞌanh kaw txꞌiꞌal honhanh, yuxin mach chu kokankanojanh yulaj bꞌeh, yebꞌ xol haꞌ nhabꞌ, yuto haꞌ huneꞌ tiꞌ mach chiwatxꞌayo yinh huneꞌ tzꞌayik maka yinh kabꞌ tzꞌayik, yuto kaw niman honhanh jako komulanh. 14 Wal xin kꞌulmi iskankano ebꞌnaj iswiꞌehal koxolanh koselelojanh yu iswatxꞌenilo ebꞌnaj huneꞌ tiꞌ. Haxa sunil ebꞌnaj ay yulajla konhobꞌ, ebꞌnaj yiqꞌ ebꞌix ix nan konhobꞌal, hex cheyalto bꞌaqꞌinh chihul ebꞌnaj, kat istit ebꞌnaj ichamta winaj yebꞌ ebꞌnaj juez ay yul iskonhobꞌ ebꞌnaj yintaj masanto chiwatxꞌi hunteqꞌan tiꞌ, kat ishekꞌnilo ishowal Komam Dios, koDiosal, jinh yinh huneꞌ tiꞌ, xhi ebꞌnaj.
15 Kachannhe naj Jonatán iskꞌahol naj Asael, yebꞌ naj Jahazías iskꞌahol naj Ticva mach ischah iswiꞌ huneꞌ tuꞌ, yebꞌ kawanh ebꞌnaj levita haꞌ ton naj Mesulam yebꞌ naj Sabetai. 16 Wal sunil ebꞌnaj meltzoti yinh presohal tuꞌ ischah iswiꞌ ebꞌnaj tzet hal-laxi. Yalaxiko yaꞌ sacerdote Esdras yebꞌ hunteqꞌanxa ebꞌnaj yahaw ye xol yikꞌal yok iswatxꞌeno huneꞌ tuꞌ. Yok tzꞌonhno ebꞌnaj iswatxꞌeno yinh bꞌabꞌel tzꞌayik yinh islahobꞌal ixahaw. 17 Haxa yinh bꞌabꞌel tzꞌayik yinh bꞌabꞌel ixahaw yulbꞌal huneꞌxa habꞌil iswatxꞌikano yinh tzet chiꞌeliko ebꞌnaj yiqꞌ yixal xol anma nan konhobꞌal.
18 Haꞌ ebꞌnaj iskꞌahol ebꞌyaꞌ sacerdote, ebꞌnaj iqꞌnikanh ebꞌix ix nan konhobꞌal yixaloj, haꞌ ebꞌnaj tiꞌ:
Haꞌ xol ebꞌnaj titna yinh naj Jesúa iskꞌahol yaꞌ Josadac, yebꞌ ebꞌnaj yuxhtaj: naj Maasías, naj Eliezer, naj Jarib, yebꞌ naj Gedalías. 19 Haꞌ ebꞌnaj tuꞌ, istaqꞌweko yibꞌanh ischejnitopaxo ebꞌix ix yiqꞌlena tuꞌ, yaqꞌni ebꞌnaj hunun noꞌ icham meꞌ isyebꞌalqꞌabꞌoj yu yaqꞌlax xahanbꞌalil, kat yaqꞌlax nimankꞌulal yinh ismul yu Komam.
20 Xol ebꞌnaj titna yinh naj Imer, haꞌ ebꞌnaj tiꞌ: naj Hanani yebꞌ naj Zebadías.
21 Xol ebꞌnaj titna yinh naj Harim, haꞌ ebꞌnaj tiꞌ: naj Maasías, naj Elías, naj Semaías, naj Jehiel yebꞌ naj Uzías.
22 Xol ebꞌnaj titna yinh naj Pasur, haꞌ ebꞌnaj tiꞌ: naj Elioenai, naj Maasías, naj Ismael, naj Natanael, naj Jozabad, yebꞌ naj Elasa.
23 Xol ebꞌnaj levita, haꞌ ebꞌnaj tiꞌ: naj Jozabad, naj Simei, naj Kelaía, naj Petaías, naj Judá, yebꞌ naj Eliezer.
24 Haxa xol ebꞌnaj bꞌitnom: yaꞌ Eliasib; haxa xol ebꞌnaj tanhem pulta haꞌ ebꞌnaj tiꞌ: naj Salum, naj Telem yebꞌ naj Uri.
25 Haxa xol ebꞌnaj Israel, ebꞌnaj titna yinh naj Paros, haꞌ ebꞌnaj tiꞌ: naj Ramía, naj Jezías, naj Malquías, naj Mijamín, yaꞌ Eleazar, naj Malquías yebꞌ naj Benaía.
26 Haxa xol ebꞌnaj titna yinh naj Elam, haꞌ ebꞌnaj tiꞌ: naj Matanías, naj Zacarías, naj Jehiel, naj Abdi, naj Jeremot yebꞌ naj Elías.
27 Xol ebꞌnaj titna yinh naj Zatu haꞌ ebꞌnaj tiꞌ: naj Elioenai, yaꞌ Eliasib, naj Matanías, naj Jeremot, naj Zabad, yebꞌ naj Aziza.
28 Xol ebꞌnaj titna yinh naj Bebai haꞌ ebꞌnaj tiꞌ: naj Johanán, naj Hananías, naj Zabai, yebꞌ naj Atlai.
29 Xol ebꞌnaj titna yinh naj Bani, haꞌ ebꞌnaj tiꞌ: naj Mesulam, naj Maluc, naj Adaía, naj Jasub, naj Seal, yebꞌ naj Ramot.
30 Xol ebꞌnaj titna yinh naj Pahat-moab, haꞌ ebꞌnaj tiꞌ: naj Adna, naj Quelal, naj Benaía, naj Maasías, naj Matanías, naj Bezaleel, naj Binúi yebꞌ yaꞌ Manasés.
31 Xol ebꞌnaj titna yinh naj Harim, haꞌ ebꞌnaj tiꞌ: naj Eliezer, naj Isías, naj Malquías, naj Semaías, naj Simeón, 32 naj Benjamín, naj Maluc, yebꞌ naj Semarías.
33 Xol ebꞌnaj titna yinh naj Hasum, haꞌ ebꞌnaj tiꞌ: naj Matenai, naj Matata, naj Zabad, naj Elifelet, naj Jeremai, yaꞌ Manasés, yebꞌ naj Simei.
34 Xol ebꞌnaj titna yinh naj Bani, haꞌ ebꞌnaj tiꞌ: naj Madai, naj Amram, naj Uel, 35 naj Benaía, naj Bedías, naj Quelúhi, 36 naj Vanías, yaꞌ Meremot, yaꞌ Eliasib, 37 naj Matanías, naj Matenai, naj Jaasai, 38 naj Bani, naj Binúi, naj Simei, 39 naj Selemías, naj Natán, naj Adaía, 40 naj Macnadebai, naj Sasai, naj Sarai, 41 naj Azareel, naj Selemías, yebꞌ naj Semarías. 42 Naj Salum, naj Amarías, naj José.
43 Xol ebꞌnaj titna yinh naj Nebo, haꞌ ebꞌnaj tiꞌ: naj Jeiel, naj Matatías, naj Zabad, naj Zebina, naj Jadau, naj Joel yebꞌ naj Benaía.
44 Haꞌ sunil ebꞌnaj tuꞌ yiqꞌ ebꞌnaj ebꞌix ix nan konhobꞌal yixaloj, ay xin ebꞌix pitzkꞌa yunin.