Isqꞌan yaꞌ Esdras nimankꞌulal yinh ismul ebꞌnaj Israel yinh istxah
9
Lahwi yekꞌkanto hunteqꞌan tuꞌ, yapni ebꞌnaj iswiꞌehal konhobꞌ inkꞌatanhan, yalni ebꞌnaj wetan: «Haꞌ konhobꞌ Israel yebꞌ ebꞌyaꞌ sacerdote yebꞌ ebꞌnaj levita mach chispohilo isbꞌa xol anma nan konhobꞌal ay bꞌey tiꞌ, haꞌ ton anma cananeo, heteo, ferezeo, jebuseo, amonita, moabita, egipcio, yebꞌ anma amorreo, chisbꞌeybꞌalnhe ebꞌnaj istxꞌojal chiswatxꞌe anma tuꞌ. 2 Haꞌ ebꞌnaj tuꞌ yiqꞌkanh ebꞌnaj ebꞌix nan konhobꞌal yixaloj, yaqꞌnipaxo mohyo ebꞌnaj iskꞌahol yebꞌ ebꞌix, yuxin haꞌ iskonhobꞌ Komam Dios xaꞌissomto isbꞌa yebꞌ hunteqꞌan anma nan konhobꞌal. Haꞌ xin ebꞌnaj iswiꞌehal konhobꞌ Israel yebꞌ ebꞌnaj gobernador, haꞌ ebꞌnaj bꞌabꞌel yako ismul,» xhi ebꞌnaj.3 Hayet wabꞌenan huneꞌ tuꞌ, intzilnitojan xil inqꞌapan, intzilnipaxtojan huneꞌ qꞌap hukaniko winhan, inchꞌimnilojan xil inwiꞌan yebꞌ xil intiꞌan; way tzꞌonhnojan, yok huneꞌ niman bꞌiskꞌulal yinh wanmahan. 4 Iskutxbꞌaniko isbꞌa sunil ebꞌnaj Israel chixiw tet Istzotiꞌ Komam Dios inkꞌatanhan, yu ismul ebꞌnaj meltzo preso bꞌey Babilonia, yajaꞌ wal hinan kaw okkano niman bꞌiskꞌulal yinh wanmahan masanto yet yorahil yet chiꞌaqꞌlax xahanbꞌal yinh qꞌejbꞌiyalil.a 5 Haxa yet yorahil yaqꞌlax xahanbꞌal yet qꞌejbꞌiyal, wahwanojan bꞌay tzꞌonhan hinan, yiqꞌni yip wanmahan yet xaꞌintzꞌiltojan xil inqꞌapan, wokan txahloj way jahnojan wanikanh inqꞌabꞌan satkanh tet Komam, inDiosalan, 6 walnihan yinh intxahan tet Komam: «Mamin, hach inDiosalan kaw machi txumcha wuhan tzet chiwalan tawet yebꞌ xin chintxꞌixwihan intꞌanhxikanhan tawinh, yuto hanhonhtiꞌanh kaw maꞌahkanokanh komulanh jibꞌanhanh, xaꞌahapno komulanh tiꞌ tasataj yul satkanh. 7 Hataxtikꞌa yinh istiempohal ebꞌyaꞌ komam ichamanh ichikanti komulanh masanta tinanh, yuxin yu komulanh yebꞌ yu ismul ebꞌyaꞌ koreyalanh, yebꞌ yu ismul ebꞌyaꞌ kosacerdotehanh, yuxin konhhawakojanh yul isqꞌabꞌ ebꞌnaj isreyal hunteqꞌanxa nime konhobꞌ, konhhawanikojanh yul isqꞌabꞌ kamikal tet chꞌen espada, jilaxtojanh preso, yelqꞌalaxto tzetaj ayonhanh, konhhawanikanikojanh yinh txꞌixwilal hakaꞌ jekojanh tinanh. 8 Yajaꞌ wal tinanh xin, hach koDiosalanh yu iskꞌulchꞌanil hakꞌul yuxin ayto haywanhxa honhanh konhkananh, konhhakolnihanh, yel yinh hakꞌul Mamin konhhawaqꞌni meltzohojanh, yunhe hawaqꞌni bꞌay chonhehanh bꞌay ay hawatut yunhe tꞌinhan chijukanojanh bꞌey tiꞌ, chawaqꞌni sajilqꞌinal jilaꞌanh, chonhhawaqꞌni xewojanh hanikꞌ tiempohal yet ayonhikojanh chejabꞌoj. 9 Yuto hanhonhtiꞌanh chejabꞌ jekojanh, yajaꞌ mach bꞌejbꞌilhonhkanojanh hawu, Mamin, hach koDiosalanh. Wal xin hayelo iskꞌulchꞌanil hakꞌul jinhanh sata ebꞌnaj isreyal Persia, hawaqꞌni kokawilanh, kotitanh kowatxꞌenokanhanh hawatut uchkꞌanaxato tiꞌ, chonhhatanhenanh bꞌey Judá yebꞌ bꞌey Jerusalén tiꞌ.
10 »Yajaꞌ wal tinanh Mamin, hach koDiosalanh, ¿tzet tzꞌaj jalaꞌanh tawet yu komulanh jako tuꞌanh? yuto hanhonhtiꞌanh xakobꞌejkanojanh chejbꞌanile aykano hawu, 11 yalkano ebꞌyaꞌ hachejabꞌ yet payxa bꞌay hawal hakaꞌ tiꞌ: “Haꞌ txꞌo txꞌotxꞌ bꞌay chexapni, txꞌotxꞌ chiꞌok heyu, xaꞌetaxto txꞌotxꞌ yu isyahbꞌetajil chiswatxꞌe hunteqꞌan konhobꞌ ay sat txꞌotxꞌ, nohnaxalo sat txꞌotxꞌ yu ismachiswalilal chiswatxꞌe hunteqꞌan anma ay sat txꞌotxꞌ. 12 Yuxin mach chu heyaqꞌni ebꞌix hekutzꞌin yixaloj iskꞌahol ebꞌnaj, mach cheyaqꞌpaxo mohyo ebꞌnaj hekꞌahol yebꞌ ebꞌix iskutzꞌin ebꞌnaj, mach chexokpaxo yinh aqꞌankꞌulal yebꞌi, mach cheyochepaxiko isqꞌalomal, hak tuꞌ xin cheyiqꞌkanh heyip kat heloni tzetaj chiꞌel sat txꞌotxꞌ kat heyanikano txꞌotxꞌ ismajulo heyuninal yinh sunilbꞌal ej tiempo,” kachikanoj.
13 »Yajaꞌ wal yinh islahobꞌalxa tiꞌ Mamin mahul sunil isyaꞌtajil tiꞌ jibꞌanhanh yu kotxꞌojalanh yebꞌ yu komulanh kaw howkano yul hasat, yajaꞌ xin wal hach tiꞌ Mamin, hach koDiosalanh mach chawaqꞌ isyaꞌtajil jetanh hakaꞌ komulanh, hawanikano haywanh honhxa hanhonh kutxanonhiko tiꞌanh. 14 ¿Tom kꞌul ta chikomanhkꞌohanh tzet chawala, kat kohunbꞌan kobꞌahanh yebꞌ hunteqꞌan anma chiwatxꞌen isyahbꞌetajil? ¿Tom mach chitit hahowal jinhanh, kat konhhatanhtzenilojanh, matxa hunujonh tiꞌanh xin chonhkolchalojanh yul haqꞌabꞌ?
15 »Mam Wahawil, hach isDiosal Israel, hach tiꞌ kaw tohol hachkanoj, yuto ay haywanh honhanh konhkolchahanh, konhkankanojanh hanhonh kutxanonhikojanh yinh huneꞌ tzꞌayik tiꞌ. Hanhonhtiꞌanh kaw mulum honhanh, yuxin chijalatijanh komulanh tawet, waxanhka mach kotzanojanh jokanh tasataj yu komulanh, kinchihan tet Komam yinh intxahan,» xhi yaꞌ Esdras.