2 Naj Gersón, naj titna yinh yuninal yaꞌ Finees, yaꞌ Daniel yaꞌ titna yinh yuninal naj Itamar, naj Hatús, naj titna yinh yuninal yaꞌ David. 3 Naj Zacarías, titna yinh yuninal naj Secanías, yebꞌ ebꞌnaj winaj titna yinh yuninal naj Paros, 150 ebꞌnaj tzꞌunbꞌil isbꞌi tzujan yinta ebꞌnaj tuꞌ. 4 Naj Elioenai iskꞌahol naj Zeraías, naj titna yinh yuninal naj Pahat-moab, 200 ebꞌnaj tzujan yinta naj. 5 Ebꞌnaj iskꞌahol naj Jahaziel naj titna yinh yuninal naj Secanías, 300 ebꞌnaj tzujan yinta naj. 6 Naj Ebed iskꞌahol naj Jonatán, naj titna yinh yuninal naj Adín, 50 (lahonh yoxkꞌalwanh) ebꞌnaj tzujan yinta naj. 7 Naj Jesaías iskꞌahol naj Atalías, naj titna yinh yuninal naj Elam, 70 (lahonhebꞌ iskanhwinaj) ebꞌnaj tzujan yinta naj. 8 Naj Zebadías iskꞌahol naj Micael, naj titna yinh yuninal naj Sefatías, 80 (kanhwinaj) ebꞌnaj tzujan yinta naj. 9 Naj Obadías, iskꞌahol naj Jehiel titna yinh yuninal naj Joab, 218 ebꞌnaj tzujan yinta naj. 10 Ebꞌnaj iskꞌahol naj Josifías, ebꞌnaj titna yinh yuninal naj Selomit 160 ebꞌnaj tzujan yinta naj. 11 Naj Zacarías iskꞌahol naj Bebai titna yinh yuninal naj Bebai, 28 (waxajebꞌ iskawinaj) ebꞌnaj tzujan yinta naj. 12 Naj Johanán iskꞌahol naj Hacatán titna yinh yuninal naj Azgad, 110 ebꞌnaj tzujan yinta naj. 13 Haxa ebꞌnaj islahobꞌal haꞌ ton ebꞌnaj tiꞌ; naj Elifelet, naj Jeiel yebꞌ naj Semaías ebꞌnaj tuꞌ titna ebꞌnaj yinh yuninal naj Adonicam, 60 (oxkꞌalwanh) ebꞌnaj tzujan yinta naj. 14 Naj Utai yebꞌ naj Zabud ebꞌnaj titna yinh naj Bigvai, 70 (lahonhebꞌ iskanhwinaj) ebꞌnaj tzujan yinta naj.

15 Haꞌ sunil ebꞌnaj tuꞌ inkutxbꞌakojan ebꞌnaj istiꞌ ha haꞌ chiꞌekꞌ bꞌey Ahava, oxebꞌ tzꞌayik konhehayojanh bꞌey tuꞌ. Hayet insaynihan xol ebꞌnaj tuꞌ yebꞌ xol ebꞌyaꞌ sacerdote machi hunu ebꞌnaj iskꞌahol ebꞌnaj levita ilcha wuhan. 16 Yuxin inchejtojan hunteqꞌan ebꞌnaj iswiꞌehal yekoj, haꞌ ton naj Eliezer, naj Ariel, naj Semaías, naj Elnatán, naj Jarib, naj Elnatán, naj Natán, naj Zacarías, yebꞌ naj Mesulam yebꞌ kawanh ebꞌnaj kuywawom, haꞌ ton yaꞌ Joiarib yebꞌ naj Elnatán, 17 inchejnitojan ebꞌnaj iskꞌatanh naj Iddo, yahaw yeko yinh konhobꞌ Casifia, walnihan chejbꞌanile chiyal ebꞌnaj tet naj Iddo tuꞌ yebꞌ chejbꞌanile chiyal ebꞌnaj tet yet konhobꞌ, haꞌ ton ebꞌnaj aqꞌbꞌil ismunil yul Yatut Komam Dios ay bꞌey Casifia tuꞌ, yu yiniti ebꞌnaj ebꞌnaj, yu ismunla ebꞌnaj yul Yatut Komam Dios, koDiosal. 18 Kaw xin ayayo iskꞌulal Komam Dios jibꞌanhanh yuxin yiti ebꞌnaj huneꞌ naj kaw helan chiyij Serebías iskꞌahol naj Mahli, naj Mahli iskꞌahol yaꞌ Leví, haxa yaꞌ Leví iskꞌahol yaꞌ Israel. Haꞌ hun ebꞌnaj iskꞌahol naj Serebías tuꞌ yebꞌ yuxhtaj tit yintaj, 18 (waxajlahonhwanh) isbꞌisil ebꞌnaj. 19 Istitpaxo naj Hasabías yebꞌ naj Jesaías yinta naj, ebꞌnaj tuꞌ iskꞌahol ebꞌnaj iskꞌahol naj Merari ye ebꞌnaj, tit ebꞌnaj yebꞌ yuninal yebꞌ yuxhtaj, 20 (hunkꞌalwanh) ebꞌnaj yinh sunil.

20 Yapnipaxo 220 ebꞌnaj yikꞌal ebꞌnaj levita munla yul Yatut Komam Dios, ebꞌnaj alaxiko yinh ismunil yu yaꞌ rey David yebꞌ yu ebꞌnaj iswiꞌehal konhobꞌ; sunil ebꞌnaj tuꞌ, tzꞌibꞌnhelax isbꞌi ebꞌnaj yinh istxolal.

21 Lahwi tuꞌ xin, walnihan tato mach chonhwaꞌanh yu kotxahlihanh tet Komam Dios istiꞌ haꞌ Ahava yu jinayo kobꞌahanh sata Komam Dios. Koqꞌannihanh tet Komam tato kꞌul chu konhyinitojanh yebꞌ juninalanh yebꞌ tzetaj ayonhanh yinh kobꞌelanh. 22 Yuto hanintiꞌan kintxꞌixwihan inqꞌannihan ebꞌnaj soldado tet naj rey yebꞌ ebꞌnaj chiꞌekꞌ yibꞌanh cheh yu konhyilnihanh ebꞌnaj yulaj bꞌeh tet anma ayko ishowal jinhanh, yuto xatikꞌa konhtzotelanh tet naj rey, jalnihanh tet naj hakaꞌ tiꞌ: «Haꞌ mak chisayni Komam Dios chiyayo Komam iskꞌulal yibꞌanh, wal mak chibꞌejnikano Komam xin, chiyati Komam ishowal yibꞌanh,» konhchihanh tet naj. 23 Hak tuꞌ xin jokanh txahlo tet Komam Dios yinh kobꞌelanh mach xin konhwaꞌanh yu kotxahlihanh, ispajtzen Komam Dios kotxahanh.

24 Lahwi tuꞌ xin inpohnilojan 12 (kabꞌlahonhwanh) ebꞌyaꞌ iswiꞌehal sacerdote xol ebꞌyaꞌ sacerdote haꞌ ton yaꞌ Serebías yebꞌ yaꞌ Hasabías yok 10 (lahonhwanhxa) yuxhta ebꞌyaꞌ. 25 Inmalenan chꞌen oro yebꞌ chꞌen plata yebꞌ chꞌen munlabꞌal, haꞌ ton chꞌen yaqꞌ naj rey yebꞌ ebꞌnaj bꞌay chislahtiꞌnhe isbꞌa naj, yebꞌ ebꞌnaj iswiꞌehal konhobꞌ chimunla yintaj, yebꞌ sunil anma Israel ayko bꞌey tuꞌ yebꞌalqꞌabꞌehal yu yokniko yinh Yatut Komam Dios. 26 Wanikojan sunil tuꞌ yul isqꞌabꞌ ebꞌyaꞌ 12 (kabꞌlahonhwanh) iswiꞌehal sacerdote tuꞌ. Inmalenan 500 quintal chꞌen plata, yok hunteqꞌanxa munlabꞌal plata 75 (holahonhebꞌ iskanhwinaj) quintal yalil, yok 75 (holahonhebꞌ iskanhwinaj) quintal chꞌen oro, 27 yok 20 (hunkꞌal) chꞌen nime sekꞌ oro, 17 (hujlahonhebꞌ) libra yalil, yok kabꞌebꞌ vaso bronce, chꞌen kaw kꞌul, lahan istohol hakaꞌ chꞌen oro.

28 Walnihan tet ebꞌyaꞌ iswiꞌehal sacerdote: «Hex tiꞌ xakexispohilo Komam Dios yu hemunla yinh ismunil, yebꞌ xin yetxa Komam ye chꞌen oro, chꞌen plata yebꞌ munlabꞌal el yinh iskꞌul anma yaqꞌni yebꞌalqꞌabꞌo tet Komam Dios, isDiosal jichmam.^a 29 Yuxin chiwakojan chꞌen yul heqꞌabꞌ yu hekꞌubꞌantoj kat heyilni masanta yet chemalenkano chꞌen sata ebꞌyaꞌ iswiꞌehal sacerdote yebꞌ tet ebꞌnaj levita yebꞌ tet ebꞌnaj iswiꞌehal Israel bꞌey Jerusalén yul iscuartohal Yatut Komam Dios,» kinchihan. 30 Hak tuꞌ yu ischahnikano ebꞌyaꞌ sacerdote yebꞌ ebꞌnaj levita chꞌen oro, chꞌen plata yebꞌ chꞌen munlabꞌal tuꞌ yu yinito ebꞌnaj bꞌey Jerusalén yul Yatut Komam Dios, koDiosal.

31 Haꞌ yinh 12 (iskabꞌlahonhebꞌ) tzꞌayik yinh bꞌabꞌel ixahaw jelanh istiꞌ haꞌ Ahava, kotitanh bꞌey Jerusalén, kaw xin yayo Komam Dios iskꞌulal jibꞌanhanh, konhiskolnilojanh tet ebꞌnaj ayko ishowal jinhanh, konhiskolnipaxojanh tet ebꞌnaj elqꞌom yulaj bꞌeh. 32 Lahwi tuꞌ japnihanh bꞌey Jerusalén, koxewanh oxebꞌ tzꞌayik. 33 Haxa yinh iskanh tzꞌayik xin, kotohanh Yatut Komam Dios koDiosal, yunhe ismalelaxkano chꞌen oro, chꞌen plata yebꞌ chꞌen munlabꞌal, yalaxkaniko yul isqꞌabꞌ yaꞌ sacerdote Meremot, iskꞌahol yaꞌ Urías, aypaxiko yaꞌ Eleazar iskꞌahol yaꞌ Finees iskꞌatanh yaꞌ yebꞌ naj Jozabad iskꞌahol naj Jesúa, yebꞌ naj Noadías iskꞌahol naj Binúi, ebꞌnaj tuꞌ levita ebꞌnaj. 34 Haꞌ yinh huneꞌ tzꞌayik tuꞌ bꞌislaxkanoj, ismalelaxkano chꞌen oro yebꞌ chꞌen plata yebꞌ chꞌen munlabꞌal tuꞌ sunil, istzꞌibꞌnhelaxkano hanta yalil chꞌen yinh kaw tzꞌajan.

35 Sunil ebꞌnaj meltzoti preso bꞌey Babilonia, yaqꞌ ebꞌnaj no noqꞌ chinhuslax xahanbꞌalil tet Komam Dios, isDiosal Israel, aqꞌlax 12 (kabꞌlahonhkꞌonh) noꞌ tzehla wakax xahanbꞌalil yinh ismul sunil konhobꞌ Israel, yok 96 (wajlahonhebꞌ ishokꞌal) noꞌ winaj meꞌ yok 77 (hujlahonhebꞌ iskanhwinaj) noꞌ tzehla meꞌ. Yaqꞌlax 12 (kabꞌlahonhkꞌonh) noꞌ winaj chiw xahanbꞌalil chiꞌaqꞌni tanho ismul konhobꞌ Israel. Haꞌ sunil no noqꞌ tuꞌ, nhuslax xahanbꞌalil tet Komam Dios. 36 Lahwi tuꞌ yaqꞌlax teꞌ carta yati naj rey tet ebꞌnaj yahawil yinh ej konhobꞌ ay isqꞌaxebꞌikꞌti haꞌ Éufrates, iskolwa ebꞌnaj yinh konhobꞌ Israel yebꞌ yinh iswatxꞌebꞌanil Yatut Komam Dios.