2. TZOTEL YAꞌ ESDRAS YIBꞌANHILO ISMUNIL
(7:1–10:44)
Yet yapni yaꞌ Esdras yebꞌ ebꞌnaj yetbꞌi bꞌey Jerusalén
7
Hayet lahwi yekꞌto sunil hunteqꞌan tuꞌ, haꞌ yinh istiempohal yet ayko naj Artajerjes isreyal Persia, ay huneꞌ yaꞌ chiyij Esdras. Yaꞌ Esdras tuꞌ iskꞌahol yaꞌ Seraías ye yaꞌ, haxa yaꞌ Seraías iskꞌahol yaꞌ Azarías ye yaꞌ, haxa yaꞌ Azarías iskꞌahol yaꞌ Hilcías ye yaꞌ, 2 yaꞌ Hilcías iskꞌahol yaꞌ Salum ye yaꞌ, yaꞌ Salum iskꞌahol yaꞌ Sadoc ye yaꞌ, yaꞌ Sadoc iskꞌahol yaꞌ Ahitob ye yaꞌ, 3 yaꞌ Ahitob iskꞌahol yaꞌ Amarías ye yaꞌ, yaꞌ Amarías iskꞌahol yaꞌ Azarías ye yaꞌ, yaꞌ Azarías iskꞌahol yaꞌ Meraiot ye yaꞌ, 4 haxa yaꞌ Meraiot iskꞌahol yaꞌ Zeraías ye yaꞌ, yaꞌ Zeraías iskꞌahol yaꞌ Uzi ye yaꞌ, yaꞌ Uzi iskꞌahol yaꞌ Buqui ye yaꞌ, 5 yaꞌ Buqui iskꞌahol yaꞌ Abisúa ye yaꞌ, yaꞌ Abisúa iskꞌahol yaꞌ Finees ye yaꞌ, yaꞌ Finees iskꞌahol yaꞌ Eleazar ye yaꞌ, haxa yaꞌ Eleazar tuꞌ iskꞌahol yaꞌ Aarón ye yaꞌ, yaꞌ Aarón tuꞌ, haꞌ yaꞌ bꞌabꞌel sacerdote. 6 Yaꞌ Esdras tuꞌ, kuywawom yaꞌ yinh isley Komam Dios, isDiosal Israel, haꞌ ton ley yaqꞌkano Komam Dios tet yaꞌ Moisés. Yaꞌ Esdras tuꞌ meltzoti yaꞌ bꞌey Babilonia, yaqꞌni naj rey sunil tzet isqꞌan yaꞌ, yuto kolwa Komam Dios, isDiosal yaꞌ yinh. 7 Hayet isto yaꞌ Esdras bꞌey Jerusalén tuꞌ ay haywanh ebꞌnaj Israel to yinta yaꞌ yebꞌ ebꞌyaꞌ sacerdote, ebꞌnaj levita yebꞌ ebꞌnaj bꞌitnom, ebꞌnaj tanhem pulta, yebꞌ ebꞌnaj chimunla yul Yatut Komam Dios. Haꞌ huneꞌ tiꞌ yu yet hujebꞌxa habꞌil yok naj Artajerjes reyal. 8 Yapni yaꞌ Esdras yebꞌ ebꞌnaj yetbꞌi tuꞌ yinh ishoꞌ ixahaw yinh ishuj habꞌil tuꞌ bꞌey Jerusalén. 9 Haꞌ yinh bꞌabꞌel tzꞌayik yinh bꞌabꞌel ixahaw el yaꞌ Esdras bꞌey Babilonia, yapni yaꞌ bꞌey Jerusalén. Kaw xin ayko Komam Dios yetbꞌiho yaꞌ Esdras tuꞌ.a 10 Yuto kaw helan yaꞌ istxumni chejbꞌanile yet Komam Jahawil yebꞌ isyijeni, chiskuyni yaꞌ yet Israelal yinh kuybꞌanile yebꞌ chejbꞌanile yet Komam Dios.Iscarta naj rey Artajerjes
11 Haꞌ teꞌ carta tiꞌ yaqꞌ naj rey Artajerjes tet yaꞌ sacerdote Esdras, yaꞌ chikuywa yalni chejbꞌanile yebꞌ kuybꞌanile aqꞌbꞌilkano yu Komam Dios tet ebꞌnaj Israel. Xhi teꞌ hakaꞌ tiꞌ: 12 «Hanin Artajerjes intiꞌan, rey hinan yinh ebꞌnaj rey, chiwochehan ta aqꞌankꞌulal hawehi, hach Esdras, sacerdote yebꞌ kuywawom, hach tiꞌ kaw kuywinaj hach yinh chejbꞌanile yet Komam Jahawil, isDiosal satkanh. 13 Chiwaltojan tet sunil ebꞌnaj Israel ay yulajla konhobꞌ ayko yalanh wipan, ebꞌyaꞌ sacerdote, yebꞌ ebꞌnaj levita, tato chiyoche ebꞌnaj chito tawinta bꞌey Jerusalén, tojabꞌ ebꞌnaj. 14 Yuto hanintiꞌan yebꞌ ebꞌnaj hujwanh wetbꞌihan yinh lahtiꞌ, chachkochejtojanh, hach Esdras, hawilaꞌkꞌo txꞌotxꞌ Judá yebꞌ konhobꞌ Jerusalén, yu hawilni tato lanhan isyijen ebꞌnaj hakaꞌ yalni ischejbꞌanil haDiosal ayko yul haqꞌabꞌ. 15 Chawinipaxto chꞌen oro yebꞌ chꞌen plata el yinh kokꞌulanh jaqꞌnihanh yebꞌalqꞌabꞌo tet Komam Dios, isDiosal Israel, Komam ay Yatut bꞌey Jerusalén. Haꞌ chꞌen yebꞌalqꞌabꞌe tuꞌ, hanin rey intiꞌan yebꞌ ebꞌnaj bꞌay chinlahtinhe hinbꞌahan, hanhonhanh chijatojanh chꞌen. 16 Chawinipaxto sunil chꞌen oro yebꞌ chꞌen plata chiꞌilcha hawu yulajla ismajul txꞌotxꞌ Babilonia, chawinipaxto chꞌen yebꞌalqꞌabꞌe chiꞌel yinh iskꞌul konhobꞌ yaqꞌni yu yokniko yinh Yatut Komam Dios bꞌey Jerusalén, yebꞌ chꞌen chiꞌel yinh iskꞌul ebꞌyaꞌ sacerdote yaqꞌni yebꞌalqꞌabꞌehoj. 17 Chawaniko yinh hakꞌul haloqꞌni noꞌ tzehla wakax yinh chꞌen melyu tuꞌ yebꞌ noꞌ winaj meꞌ, yebꞌ noꞌ tzehla meꞌ yebꞌ sunil tzet chiꞌaqꞌlax xahanbꞌalil yinta noꞌ yebꞌ vino, kat hawalten noꞌ xahanbꞌalil yibꞌanh ismexhahil yet xahanbꞌal ay yul yatut heDiosal ay bꞌey Jerusalén. 18 Haxa chꞌen oro yebꞌ chꞌen plata chikankano xin hach chawila yebꞌ ebꞌnaj hawet konhobꞌ yinh tzet chiꞌokniko chꞌen heyu hakaꞌ chiyal iskꞌul heDiosal. 19 Wal munlabꞌal chiꞌalaxiko yul heqꞌabꞌ yu yokniko yul yatut haDiosal, hach kawach chawaqꞌ sata Komam Dios bꞌey Jerusalén.
20 »Haꞌ sunil tzet yilal chiꞌokniko yinh yatut haDiosal, chawito istohol chaqꞌan tet intesorerohan. 21 Hanin rey Artajerjes intiꞌan, chiwaltojan tet sunil ebꞌnaj tesorero ay bꞌey isqꞌaxebꞌikꞌto haꞌ Éufrates tato chiyaqꞌ ebꞌnaj sunil tzet chisqꞌan yaꞌ Esdras, yaꞌ sacerdote yebꞌ kuywawom yinh kuybꞌanile yet Komam Dios, huneꞌ Dios ay yul satkanh; haꞌ sunil tzet chisqꞌan yaꞌ Esdras tuꞌ, mach chechma yaꞌ ischahni. 22 Chisje heyaqꞌni 75 (holanhebꞌ iskanhwinaj) quintal chꞌen plata tet yaꞌ, yok 300 quintal trigo, 550 litro vino, 550 litrós aceite, cheyaqꞌnipaxo atzꞌam atzꞌam hantatikꞌa chiqꞌanlaxi.
23 »Sunil tzet chisqꞌan Komam, isDiosal satkanh, chꞌokniko yinh yatut, machi nahatli heyaqꞌni, yuxin: ¿Tzet yinh chiꞌaykꞌay ishowal Komam Dios, isDiosal satkanh, wibꞌanhan yebꞌ yibꞌanh wuninalan, yebꞌ yibꞌanh konhobꞌ ayko yalanh wipan? 24 Chijaltojanh heyabꞌeꞌ tato mach cheqꞌan chꞌen tohlabꞌal, maka melyu, maka chꞌen kolwabꞌal, tet ebꞌyaꞌ sacerdote, ebꞌnaj levita, ebꞌnaj bꞌitnom, ebꞌnaj tanhem pulta yebꞌ ebꞌnaj chimunla yul Yatut Komam Dios.
25 »Haxapaxo hach tiꞌ Esdras, hakaꞌtikꞌa hahelanil aqꞌbꞌil yu haDiosal, ako ebꞌnaj juez yebꞌ ebꞌnaj gobernador yahawilo yinh sunil ej konhobꞌ ay isqꞌaxebꞌikꞌto haꞌ Éufrates. Haꞌ sunil konhobꞌla tuꞌ yilal yohtanhenilo chejbꞌanile yet Komam Dios, haꞌ mak mach yohtajo istxolal chejbꞌanile yet Komam xin yilal hakuyni. 26 Haꞌ mak mach chiyijen chejbꞌanile yet haDiosal, yebꞌ mak mach chiyijen chejbꞌanil chiwalan, mach chiꞌekꞌto yet iskami, maka istzumbꞌelaxilo yul iskonhobꞌ, maka chistohlan iskolchaloj, maka chiꞌokto yul preso,» xhi rey Artajerjes yul teꞌ carta tuꞌ.
27 Lahwi tuꞌ, istxahli yaꞌ Esdras hakaꞌ tiꞌ: «Hal-laxojabꞌ kꞌul-la tzotiꞌ yinh Komam Jahawil, isDiosal jichmam, yuto haꞌ Komam aniko sunil tuꞌ yinh isnabꞌal naj rey yu yalaxiko ismay Yatut Komam Jahawil bꞌey Jerusalén. 28 Yu iskꞌulal iskꞌul Komam Dios yuxin kꞌul chiyute iskꞌul naj rey winhan yebꞌ ebꞌnaj bꞌay chislahtiꞌnhe isbꞌa naj, yebꞌ ebꞌnaj winaj kaw niman yelapno chimunla yinta naj. Hak tuꞌ xin kaw chiqꞌkanh yip wanmahan yu ayiniktojan yalanh yip Komam, inkutxbꞌanikojan ebꞌnaj iswiꞌehal yinh ebꞌnaj Israel yu isto ebꞌnaj wintajan bꞌey Jerusalén,» xhi yaꞌ Esdras.