«Tzet nabꞌilkanoj:

3 »Haꞌ yinh bꞌabꞌel habꞌil yet yok naj Ciro reyal, ischejni naj watxꞌelaxokanh Yatut Komam Dios bꞌey Jerusalén bꞌay chinhuslax xahanbꞌal tet Komam Dios. Haꞌ huneꞌ nha tuꞌ kaw ay yip chu isbꞌitzꞌabꞌil, 27 (hujebꞌ iskawinaj) metro chukanh istel, 27 (hujebꞌ iskawinaj) metro yul istxikin, 4 oxebꞌ txol chꞌen nime chꞌen paqꞌbꞌil chiꞌok yinh, kat isto hun txol teꞌ aqꞌinteꞌ akꞌto yibꞌanh, haꞌ sunil melyu chitanhiko yinh munil tuꞌ, haꞌ istesorero naj rey chꞌaqꞌni. 5 Hakpax tuꞌ sunil ismunlabꞌal Yatut Komam Dios hunteqꞌan oro yebꞌ plata yilti naj rey Nabucodonosor yul Yatut Komam bꞌey Jerusalén, yiniti naj bꞌey Babilonia tiꞌ, chiꞌaqꞌlax meltzo bꞌey Jerusalén, kat yalaxikto yul Yatut Komam Dios,» xhi yul libro tuꞌ.

6 Yalnipaxo naj rey Darío: «Yuxin wal tinanh hach gobernador Tatnai yebꞌ hach Setar-boznai yebꞌ ebꞌnaj heyet gobernadoral ay isqꞌaxebꞌikꞌto haꞌ Éufrates, chiwaltojan teyet ta chexhitzilo bꞌey tuꞌ. 7 Mach chexkachwahi yinh munil chiwatxꞌi yinh Yatut Komam Dios tuꞌ; wal xin iswatxꞌehabꞌkanh naj isgobernador ebꞌnaj judío yebꞌ ebꞌnaj icham winaj Israel Yatut Komam Dios bꞌaytikꞌa aykanh.^a 8 Haninan chiwaltojan tato chexkolwa yinh ebꞌnaj Israel ijbꞌalom yinh yalaxkanh Yatut Komam Dios. Haꞌ chꞌen tohlabꞌal chꞌah texol hex ay hex bꞌey isqꞌaxebꞌikꞌto haꞌ Éufrates tuꞌ, haꞌ chꞌen cheyaqꞌ istohol ebꞌnaj chiwatxꞌen munil tuꞌ; machi xin chexnahatli hetohlan ebꞌnaj, haxinwal mach chiꞌok linhno munil tuꞌ. 9 Cheyaqꞌnipaxo sunil tzet chisqꞌan ebꞌyaꞌ sacerdote ay bꞌey Jerusalén tuꞌ, hunun tzꞌayik heyaqꞌni tzet chiꞌokniko yu ebꞌyaꞌ, mach xin chiꞌekꞌto yet heyaqꞌni; cheyaqꞌnipaxo noꞌ tzehla wakax, noꞌ winaj meꞌ, yebꞌ noꞌ tzehla meꞌ, yu isnhusni ebꞌyaꞌ noꞌ xahanbꞌalil tet Komam Dios, isDiosal satkanh, cheyaqꞌnipaxo ixim trigo, atzꞌam atzꞌam, vino yebꞌ aceite tet ebꞌyaꞌ. 10 Yu yaqꞌni ebꞌyaꞌ isxahanbꞌal tet Komam Dios, isDiosal satkanh, haꞌ ton xahanbꞌal bꞌay kaw chitzala Komam Dios, yu istxahli ebꞌyaꞌ winhan, hanin rey intiꞌan yebꞌ yinh wuninalan.

11 »Chiwalnitojan huneꞌxa chejbꞌanile tiꞌ: Tato ay mak chiꞌok kachwal yinh tzet chiwaltotiꞌan, chiꞌilaxayti hunu ispatzabꞌil yatut, kat xin yahkano lokno yinh isxixiꞌal iswiꞌ teꞌ, haxa yatut tuꞌ chiꞌokkano yeto qꞌalem. 12 Yebꞌ xin tato ay hunu konhobꞌ maka hunu naj rey chiyoche ishelaꞌ maka yuchkꞌato Yatut Komam Dios bꞌey Jerusalén tuꞌ, haꞌojabꞌ Komam Dios chitanhtzeniloj, yuto haꞌ Komam sikꞌlenkano yatut tuꞌ, yu isbꞌina isbꞌi bꞌey tuꞌ. Hanin Darío intiꞌan chiwaltojan huneꞌ chejbꞌanile tiꞌ; yilal yijni isbꞌa yinh hakaꞌ kaw yehi,» xhi naj rey Darío tuꞌ.

13 Hak tuꞌ yu isyijen naj Tatnai naj gobernador, yebꞌ naj Setar-boznai yebꞌ ebꞌnaj yetbꞌi ay isqꞌaxebꞌikꞌto haꞌ Éufrates sunil tzet ischej naj rey Darío iswatxꞌi. 14 Yuxin islah ebꞌnaj judío, ebꞌnaj chiꞌijbꞌali yinh munil yinh Yatut Komam Dios, masanto watxꞌikanoj, hakaꞌ yu yalnikano ebꞌyaꞌ ischejabꞌ Komam, haꞌ ton yaꞌ Hageo yebꞌ yaꞌ Zacarías, iskꞌahol yaꞌ Iddo. Hak tuꞌ yu islahwikano iswatxꞌi Yatut Komam hakaꞌ yu yalni Komam Dios, isDiosal Israel, yebꞌ hakaꞌ yu ischejni naj Ciro, naj Darío yebꞌ naj Artajerjes, ebꞌnaj isreyal Persia. 15 Haꞌ yinh yox tzꞌayik yinh ixahaw Adar yet wajebꞌxa habꞌil yok naj Darío reyal, islahwi iswatxꞌikano Yatut Komam Dios.

16 Yekꞌtzen ebꞌnaj Israel tuꞌ isqꞌinhal Yatut Komam Dios yinh tzalahilal yebꞌ ebꞌyaꞌ sacerdote, yebꞌ ebꞌnaj levita yebꞌ hunteqꞌanxa ebꞌnaj Israel paxti bꞌey Babilonia. 17 Hayet yekꞌtzelax isqꞌinhal Yatut Komam Dios tuꞌ, yaqꞌni ebꞌnaj 100 (hokꞌal) noꞌ tzehla wakax yinh xahanbꞌalil, yok 200 noꞌ icham meꞌ, yok 400 noꞌ tzehla meꞌ; yaqꞌlax 12 (kabꞌlahonhkꞌonh) noꞌ winaj chiw xahanbꞌalil, chiꞌaqꞌni tanho ismul konhobꞌ, hunun noꞌ yinh hunun majan ebꞌnaj Israel. 18 Yalaxiko ebꞌyaꞌ sacerdote yebꞌ ebꞌnaj levita yinh istxolal yinh ismunil yul Yatut Komam Dios bꞌey Jerusalén hakaꞌ yalni chejbꞌanile tzꞌibꞌnhebꞌilkano yinh isley yaꞌ Moisés.

19 Yekꞌtzenpaxo ebꞌnaj Israel meltzoti bꞌey Babilonia tuꞌ qꞌinh pascua yinh 14 (iskanhlahonhebꞌ) tzꞌayik, yinh bꞌabꞌel ixahaw. 20 Haꞌ ebꞌyaꞌ sacerdote yebꞌ ebꞌnaj levita issajnhe isbꞌa ebꞌnaj, yalten ebꞌnaj noꞌ xahanbꞌal yet qꞌinh Pascua yinh ismul sunil ebꞌnaj Israel meltzoti bꞌey Babilonia, haꞌ ton ebꞌnaj yet konhobꞌ ebꞌnaj yebꞌ ebꞌyaꞌ sacerdote yebꞌ ebꞌnaj levita. 21 Sunil ebꞌnaj Israel meltzoti bꞌey Babilonia kꞌuxni noꞌ xahanbꞌal yet qꞌinh Pascua tuꞌ, yebꞌ sunil mak ispohilo isbꞌa yinh istxꞌojal chilaiswatxꞌe nime konhobꞌ ayko yinhla ishoyanil Israel, ok issayaꞌ Komam Jahawil, isDiosal Israel. 22 Yekꞌtzenpaxo ebꞌnaj yinh tzalahilal qꞌinh kaw ay yelapnoj yet chiwalax ixim pan machi yanhal yulbꞌal hujebꞌ tzꞌayik, yuto haꞌ Komam Dios aniko tzalahilal yinh yanma ebꞌnaj, yuto kꞌul yute naj rey Asiria, iskꞌul yinh ebꞌnaj, iskolwa naj yinh ebꞌnaj yanikanh Yatut Komam Dios, isDiosal Israel.