Ichelaxpaxo watxꞌelaxokanh Yatut Komam Dios
5
Haꞌ ebꞌyaꞌ ischejabꞌ Komam Dios, haꞌ ton yaꞌ Hageo yebꞌ yaꞌ Zacarías, iskꞌahol yaꞌ Iddo, ok ebꞌyaꞌ ischilbꞌa yalni tet ebꞌnaj judío yebꞌ Jerusalén tzet chiyal Komam Dios, isDiosal Israel, Komam ayko iskꞌatanh ebꞌnaj.a 2 Yuxin ok yaꞌ Zorobabel, iskꞌahol yaꞌ Salatiel, yebꞌ naj Jesúa, iskꞌahol yaꞌ Josadac yicheko munil hunelxa iswatxꞌenkanh Yatut Komam Dios bꞌey Jerusalén, haꞌ xin ebꞌyaꞌ ischejabꞌ Komam Dios tuꞌ ok iptzeno ebꞌnaj.3 Yajaꞌ yinh huneꞌ tiempohal tuꞌ apni naj Tatnai, gobernador yinh konhobꞌ ay isqꞌaxebꞌikꞌto haꞌ niman Éufrates, yebꞌ naj Setar-boznai, yebꞌ ebꞌnaj yetbꞌi, yalni ebꞌnaj tet ebꞌnaj Judá: «¿Mak makexchejni hewatxꞌenkanh huneꞌ nha tiꞌ yebꞌ iskꞌubꞌal konhobꞌ Jerusalén tiꞌ?» xhi ebꞌnaj. 4 Isqꞌambꞌenpaxo ebꞌnaj: «¿Tzet isbꞌi ebꞌnaj chiwatxꞌenkanh huneꞌ nha tiꞌ?» xhi ebꞌnaj. 5 Yajaꞌ mach yilo ismujlubꞌal Komam Dios istanhen ebꞌnaj icham winaj yinh ebꞌnaj judío yinh munil tuꞌ, yuxin mach ok linhnoj, masanto yet chahnito naj gobernador huneꞌ carta tet naj rey Darío, kat ispajtzen naj rey iscarta naj gobernador tuꞌ.
6 Haꞌ huneꞌ tiꞌ iscopiahil carta yato naj gobernador Tatnai yebꞌ naj Setar-boznai yebꞌ ebꞌnaj yetbꞌi ay isqꞌaxebꞌikꞌto haꞌ Éufrates tet naj rey Darío. 7 Huneꞌ carta tuꞌ xhi hakaꞌ tiꞌ: «Mam rey Darío, chijochehanh tato aqꞌankꞌulalnhe hawehi.
8 »Mamin, chijaqꞌanh hawohtanheloj tato konhbꞌeyanh bꞌey txꞌotxꞌ Judea, jilnihanh tato lanhan iswatxꞌenkanh ebꞌnaj yatut isDios, huneꞌ Dios kaw aykano yelapnoj. Lanhan yaniko ebꞌnaj chꞌen nimeta chꞌen xeꞌoj, chaniko ebꞌnaj teꞌ aqꞌinteꞌ yinhla iskꞌul isbꞌitzꞌabꞌil, kaw xin lahbꞌiliko yu ebꞌnaj ismunlahi, yuxin lanhanxa islahwi munil tuꞌ yu ebꞌnaj. 9 Koqꞌambꞌenanh tet ebꞌnaj ichamta winaj ayko ijbꞌalo yinh munil tuꞌ hakaꞌ tiꞌ: “¿Mak chejnhe hex hewatxꞌen huneꞌ nha tiꞌ yebꞌ heyanikanh iskꞌubꞌal konhobꞌ?” konhchihanh. 10 Koqꞌambꞌenpaxojanh isbꞌi ebꞌnaj ayko ijbꞌalo yinh munil tuꞌ, yu kotzꞌibꞌnhentojanh tawet, yu hawohtanheniloj. 11 Istaqꞌwi ebꞌnaj jetanh hakaꞌ tiꞌ: “Hanhonhtiꞌanh ischejabꞌ Komam Dios jehanh, Komam watxꞌenhe satkanh yebꞌ txꞌo txꞌotxꞌ, tinanh xin lanhan kowatxꞌenkanhanh Yatut Komam Dios yinh yakꞌtohal, huneꞌ watxꞌebꞌilkano yettax payat yu isreyal Israel, naj rey kaw bꞌinabꞌilkanoj. 12 Haꞌ ebꞌnaj jichmamanh, yaqꞌtij ebꞌnaj ishowal Komam Dios, isDiosal yul satkanh, yaniko Komam ebꞌnaj yul isqꞌabꞌ naj rey Nabucodonosor, isreyal Babilonia, yebꞌ yul isqꞌabꞌ ebꞌnaj caldeo, yuchkꞌanto ebꞌnaj Yatut Komam Dios tiꞌ, yinito ebꞌnaj konhobꞌ preso bꞌey Babilonia. 13 Yajaꞌ haxa yet tzujanxa, yet bꞌabꞌel habꞌil yok naj Ciro isreyalo Babilonia, yalni naj ta chiwatxꞌelaxkanh Yatut Komam Dios tiꞌ.
14 »”Yaqꞌnipaxo meltzoho naj rey Ciro tuꞌ sunil munlabꞌal oro yebꞌ plata yilti naj rey Nabucodonosor yul Yatut Komam Dios bꞌey Jerusalén tiꞌ, yinito naj bꞌey Babilonia, yanikto naj yul yatut istioxh, yajaꞌ haꞌ kaw naj rey Ciro tuꞌ inilti yul yatut tioxh bꞌey Babilonia, yaniko naj sunil munlabꞌal tuꞌ yul isqꞌabꞌ naj Sesbasar, naj ayko gobernadoral. 15 Yalni naj rey Ciro tuꞌ tet naj Sesbasar hakaꞌ tiꞌ:
»”‘Asiꞌ bꞌey Judá kat hawinito sunil munlabꞌal tiꞌ bꞌey Yatut Komam Dios bꞌey Jerusalén, kat xin hawatxꞌenkanh Yatut Komam Dios bꞌaytikꞌa aykanh,’ xhi naj. 16 Hak tuꞌ yu yapni naj Sesbasar, yanayto naj isxeꞌal Yatut Komam Dios bꞌey Jerusalén tiꞌ; hataxtikꞌa tuꞌ xin yichiko iswatxꞌi Yatut Komam, maxhto xin chilahwi iswatxꞌikanoj,” xhi ebꞌnaj judío jetanh.
17 »Yuxin wal tinanh, Mam rey, chikoqꞌambꞌehanh tawet tato chasay yulaj libro yet acta ay yul palacio bꞌey Babilonia, tato yeli ischej naj rey Ciro ebꞌnaj Judá iswatxꞌenokanh Yatut Komam Dios bꞌey Jerusalén, kat hawalniti jetanh yunhe johtanhenilojanh tzet chawute hawalni yinh huneꞌ tiꞌ,» xhito ebꞌnaj yul carta tuꞌ.