—Chonhkolwahanh janikanhanh Yatut Komam Dios tiꞌ teyintaj, yuto hanhonhtiꞌanh chijiyo kobꞌahanh tet Komam Dios, heDiosal hex tiꞌ, chijaqꞌnihanh koxahanbꞌalanh tet Komam yettax konhischejnitijanh naj Esar-hadón, isreyal Asiria bꞌey tiꞌ, xhi ebꞌnaj.

3 Istaqꞌwi yaꞌ Zorobabel yebꞌ naj Jesúa, yebꞌ ebꞌnaj iswiꞌehal xol ebꞌnaj Israel tet ebꞌnaj hakaꞌ tiꞌ:

—Machoj, mach kꞌuloj ta chexkolwa jintajanh janikanhanh Yatut Komam Dios, koDiosalanh, wal xin kochukilnhehanh chijakanhanh Yatut Komam Jahawil, isDiosal Israel, hakaꞌ yu konhischejnihanh naj Ciro, isreyal Persia, xhi ebꞌnaj.

4 Yuxin ok hunteqꞌan ebꞌnaj tuꞌ yaqꞌaꞌ kabꞌkonokanh iskꞌul ebꞌnaj Judá, hak tuꞌ yu isxibꞌtenkanh ebꞌnaj ebꞌnaj Judá tuꞌ, yu isbꞌejni ebꞌnaj yanikanh Yatut Komam. 5 Istohlan ebꞌnaj ebꞌnaj nime ismunil xol ebꞌnaj Persia yu yalni ebꞌnaj ta chilinhbꞌalax iswatxꞌelax Yatut Komam Dios. Hak tuꞌ yute ebꞌnaj yulbꞌal istiempohal ok naj Ciro isreyal Persia, masanta yul istiempohal naj Darío, isreyal Persia. 6 Haxa yet tolto ok naj Asuero reyal yinh Persia, iswatxꞌento ebꞌnaj iscarta tet naj rey, yinh hobꞌ tzotiꞌ yebꞌ yinh leqꞌtiꞌal yinh ebꞌnaj Judá yebꞌ yinh ebꞌnaj Jerusalén. 7 Hakpax tuꞌ xin yinh istiempohal naj Artajerjes, isreyal Persia, haꞌ naj Bislam, yebꞌ naj Mitrídates yebꞌ naj Tabeel yebꞌ hunteqꞌanxa yetbꞌi ebꞌnaj, iswatxꞌeto ebꞌnaj huneꞌ carta tet naj rey Artajerjes. Haꞌ carta yato ebꞌnaj tuꞌ istzꞌibꞌnheto ebꞌnaj yinh abꞌxubꞌal arameo, watxꞌelaxpaxayo yinh hunteqꞌanxa abꞌxubꞌal.^b 8 Hakpax tuꞌ naj gobernador Rehum yebꞌ naj Simsai naj tzꞌibꞌlom, istzꞌibꞌnheto ebꞌnaj carta bꞌay ayko hobꞌ tzotiꞌ yebꞌ leqꞌtiꞌal yinh ebꞌnaj Jerusalén tet naj rey Artajerjes. 9 Istzꞌibꞌnhelax carta tuꞌ yu naj gobernador Rehum, yebꞌ naj Simsai, naj tzꞌibꞌlom, yebꞌ ebꞌnaj yetbꞌi ebꞌnaj, haꞌ ton ebꞌnaj juez, ebꞌnaj gobernador, yebꞌ ebꞌnaj oficial yinh konhobꞌ Persia, konhobꞌ Erec, konhobꞌ Babilonia, yebꞌ konhobꞌ Susa, haꞌ ton ebꞌnaj chihal-lax elamita, 10 yebꞌ hunteqꞌanxa konhobꞌ ilaxilo yul iskonhobꞌ yu naj Asnapar, naj kaw chibꞌinakanoj, yinito naj ebꞌnaj yul konhobꞌ Samaria, haꞌ hunpaxo ok aqꞌokꞌule yinh ebꞌnaj Judá tuꞌ, yebꞌ hunteqꞌanxa konhobꞌ ay isqꞌaxebꞌikꞌto haꞌ Éufrates. 11 Haꞌ carta yato ebꞌnaj tuꞌ, xhi hakaꞌ tiꞌ: «Mam rey Artajerjes, ebꞌnaj hachejabꞌ ay isqꞌaxebꞌikꞌti haꞌ niman Éufrates tiꞌ, chiqꞌambꞌeni hanikꞌ ye hakꞌul.

12 »Mam rey hanhonh hachejabꞌonh tiꞌanh chijaltojanh tato ebꞌnaj judío titna bꞌay ayach, hul ebꞌnaj kokꞌatanhanh bꞌey Jerusalén tiꞌ, lanhan xin iswatxꞌenkanh ebꞌnaj huneꞌ konhobꞌ kaw manhkꞌom, yebꞌ kaw machiswalil, lanhan iswatxꞌenpaxokanh ebꞌnaj iskꞌubꞌal konhobꞌ Jerusalén, chanayto ebꞌnaj xeꞌal kꞌubꞌ. 13 Yuxin hanhonh hachejabꞌonh tiꞌanh chijaltojanh tawet, mam rey, tato chiwatxꞌikanh huneꞌ konhobꞌ tiꞌ, kat yalaxkanh iskꞌubꞌal, matxa chaqꞌ anma istohlabꞌal tawet. 14 Yuto hanhonhtiꞌanh, mam rey, ayonhikojanh koyijenanh tzet chawala, yuxin mach chijochehanh tato chachyintanhekanilto hunteqꞌan anma tuꞌ yinh tzet chawala yuxin chijaltojanh tawet mam rey, 15 tato chisaylax yul hum bꞌay tzꞌibꞌnhebꞌilkano tzet xayu yet aykꞌo ebꞌnaj hawichmam; hayet chawilni yul hum tuꞌ chawohtanheniloj ta haꞌ huneꞌ konhobꞌ tuꞌ kaw manhkꞌomkanoj yu chiswatxꞌe istxꞌojal yinh ebꞌnaj rey, yanipaxiko howal yinh ebꞌnaj rey yet payat, yuxin uchkꞌalaxkantoj. 16 Yuxin chijaltojanh tawet mam rey, tato chiswatxꞌekanh ebꞌnaj iskonhobꞌ tuꞌ, kat iswatxꞌenkanh ebꞌnaj iskꞌubꞌal, haꞌ ej konhobꞌ ayikꞌti isqꞌaxebꞌikꞌti haꞌ Éufrates tiꞌ, chiyiqꞌalo isbꞌa yalanh hawip,» xhito ebꞌnaj yul teꞌ carta tuꞌ.

17 Lahwi tuꞌ yanito naj rey ispaj carta tuꞌ hakaꞌ tiꞌ: «Hach gobernador Rehum, yebꞌ hach tzꞌibꞌlom Simsai, yebꞌ ebꞌnaj ay tekꞌatanh bꞌey Samaria, yebꞌ tet hunteqꞌanxa konhobꞌ ay isqꞌaxebꞌikꞌto haꞌ Éufrates tuꞌ chinqꞌambꞌetojan hanikꞌ ye hekꞌul, chiwochehan ta aqꞌankꞌulalnhe heyehi.

18 »Haꞌ teꞌ carta heyati wetan awtelax teꞌ yinh kaw habꞌan wabꞌehan. 19 Inchejnihan tato chisaylax yul hum, kat yilchaloj tato haꞌ konhobꞌ Israel tuꞌ, kaw manhkꞌom yute isbꞌa tet ebꞌnaj rey yet payat tiempo, yaniko howal yinh ebꞌnaj rey, chꞌah wejnahi, kat yaqꞌlen howal. 20 Haꞌ bꞌey Jerusalén tuꞌ, ay ebꞌnaj rey kaw aykano yip oklena reyal, yok sunil hunteqꞌan konhobꞌ ay isqꞌaxebꞌikꞌto haꞌ Éufrates yalanh yip ebꞌnaj, yaqꞌni hunteqꞌan konhobꞌ tuꞌ istohlabꞌal tet ebꞌnaj. 21 Yuxin wal tinanh, halwe tet ebꞌnaj Judá tuꞌ tato chislinhbꞌa ebꞌnaj iswatxꞌenkanh konhobꞌ tuꞌ masanto yet chiwalnihan, kat yichiko ebꞌnaj ismunla hunelxa. 22 Kaw aweko yinh hekꞌul heyijen tzet chiwaltotiꞌan yul huneꞌ carta tiꞌ, ¿tzet yinh xin chiꞌetaxto yul komajul tiꞌ hanhonh yahawonh tiꞌ?» xhito naj rey.

23 Hayet yawtelax teꞌ carta yato naj rey Artajerjes tuꞌ sata naj Rehum, yebꞌ naj tzꞌibꞌlom Simsai, yebꞌ sata hunteqꞌanxa ebꞌnaj yetbꞌi ebꞌnaj, isto ebꞌnaj yinh anhe bꞌey Jerusalén, yalni ebꞌnaj tet ebꞌnaj judío tato matxa chislah ebꞌnaj munil lanhan iswatxꞌi tuꞌ; kaw yiqꞌ yip ebꞌnaj, yebꞌ kaw lemanti ishowal ebꞌnaj yet iskachwa ebꞌnaj yinh ebꞌnaj judío tuꞌ. 24 Hak tuꞌ yu isbꞌejni ebꞌnaj Judá iswatxꞌen Yatut Komam Dios bꞌey Jerusalén, yokkano linhno munil tuꞌ masanto yet iskabꞌ habꞌil yok naj Darío reyal yinh Persia.