Watxꞌelaxkanh mexha bꞌay chꞌaqꞌlax xahanbꞌal tet Komam Jahawil
3
Haꞌ yinh ishuj ixahawa yet ayxa ebꞌnaj Israel yul iskonhobꞌ, iskutxbꞌaniko isbꞌa sunil ebꞌnaj Israel tuꞌ bꞌey Jerusalén, hunxanhe xin yute isnabꞌal, hakaꞌto hunxanhe anmahil eliko ebꞌnaj. 2 Yahwano yaꞌ Jesúa, iskꞌahol yaꞌ Josadac yebꞌ hunteqꞌanxa ebꞌyaꞌ yet sacerdotehal, yebꞌ yaꞌ Zorobabel, iskꞌahol yaꞌ Salatiel, yebꞌ ebꞌnaj yuxhtaj yaꞌ Zorobabel tuꞌ, yok ebꞌnaj iswatxꞌenokanh ismexhahil yet xahanbꞌal yet Komam Dios, isDiosal Israel, yu isnhusni ebꞌnaj isxahanbꞌal yibꞌanh, hakaꞌ yalni chejbꞌanile tzꞌibꞌnhebꞌilkano yu yaꞌ Moisés, yaꞌ ischejabꞌ Komam Dios.b 3 Kaw kꞌul yutekanh ebꞌnaj ismexhahil yet xahanbꞌal bꞌaytikꞌa aykanh yet payxa, yajaꞌ wal ebꞌnaj tuꞌ kaw chixiw ebꞌnaj tet hunteqꞌan konhobꞌ ayayo yinhla ishoyanil. Hunun sakꞌayal yebꞌ hunun qꞌejbꞌiyal isnhusni ebꞌnaj xahanbꞌal tet Komam Jahawil. 4 Yekꞌtzenpaxo ebꞌnaj qꞌinh kaw ay yelapnoj, haꞌ ton qꞌinh yet Lexhpat, hakaꞌ yalni kuybꞌanile tzꞌibꞌnhebꞌilkanoj, chisnhusnipaxo ebꞌnaj noꞌ xahanbꞌal hunun tzꞌayik yinh istxolal hakaꞌtikꞌa chiyute yichmam ebꞌnaj. 5 Yaqꞌnipaxo ebꞌnaj xahanbꞌal chinhuslax hunun tzꞌayik, yebꞌ xahanbꞌal yinh qꞌinh yet unin ixahaw, yebꞌ qꞌinh kaw ay yelapno chiꞌekꞌtzelax tet Komam Jahawil, yaqꞌnipaxo ebꞌnaj isxahanbꞌal tit yinh yanma, yaqꞌnipaxo ebꞌnaj yebꞌalqꞌabꞌe tet Komam Jahawil. 6 Haꞌ yinh bꞌabꞌel tzꞌayik yinh ishuj ixahaw tuꞌ ichiko ebꞌnaj Israel yaqꞌni isxahanbꞌal tet Komam Jahawil, yajaꞌ wal isxihal Yatut Komam maxhto chiꞌichelaxikoj. 7 Yuxin yaqꞌ ebꞌnaj Israel tuꞌ chꞌen melyu tet ebꞌnaj albañil yebꞌ tet ebꞌnaj polom teꞌ; yaqꞌnipaxo ebꞌnaj tzet chilolaxi yebꞌ tzet chiꞌukꞌlaxi, yebꞌ aceite tet ebꞌnaj sidonio yebꞌ tet ebꞌnaj Tiro, yu yiniti ebꞌnaj teꞌ cedro bꞌey Líbano, chiniti ebꞌnaj teꞌ yibꞌanh haꞌ mar masanta Jope, hakaꞌtikꞌa yu yalni naj Ciro, isreyal Persia.Ichelaxiko isxeꞌal Yatut Komam Dios
8 Haꞌ yinh iskabꞌ ixahaw yet kabꞌxa habꞌil yapni ebꞌnaj Israel bꞌey Yatut Komam Dios bꞌey Jerusalén, yichelaxiko iswatxꞌelaxkanh Yatut Komam, yu yaꞌ Zorobabel, iskꞌahol yaꞌ Salatiel, yebꞌ naj Jesúa iskꞌahol yaꞌ Josadac, yebꞌ hunteqꞌanxa yuxhta ebꞌyaꞌ, yebꞌ ebꞌyaꞌ sacerdote, yebꞌ ebꞌnaj levita, yebꞌ sunil ebꞌnaj meltzo bꞌey Jerusalén; yalaxiko ebꞌnaj levita ekꞌbꞌalxa ishabꞌilal yinh 20 (hunkꞌal) habꞌil ijbꞌalomal yinh munil yul Yatut Komam Jahawil tuꞌ. 9 Haꞌ hunpaxo naj Jesúa yebꞌ iskꞌahol yebꞌ yuxhtaj, yebꞌ naj Cadmiel yebꞌ iskꞌahol, ebꞌnaj yikꞌal yaꞌ Judá; huneꞌnhe yute ebꞌnaj isnabꞌal yok ijbꞌalo yinh ebꞌnaj chiwatxꞌen Yatut Komam Dios, yebꞌ ebꞌnaj iskꞌahol naj Henadad, yebꞌ yuxhtaj yet levitahil.
10 Hayet yalaxayto xeꞌal Yatut Komam Jahawil yu ebꞌnaj albañil, haꞌ ebꞌyaꞌ sacerdote ayko xil isqꞌap yet sacerdote yinh, ah linhno ebꞌyaꞌ, yiqꞌni ebꞌyaꞌ istrompeta, yiqꞌnipaxo ebꞌnaj levita yuninal yaꞌ Asaf chꞌen cimbalo, yok ebꞌnaj isbꞌitnheno Komam Jahawil, hakaꞌ yu yalnikano yaꞌ David, isreyal Israel. 11 Chibꞌitni ebꞌnaj, chaniko ebꞌnaj ismay Komam Jahawil, chaqꞌni ebꞌnaj yuchꞌandiosal tet Komam, chalni ebꞌnaj hakaꞌ tiꞌ: «Haꞌ Komam Dios kaw kꞌulkanoj yuto chitzꞌay iskꞌul Komam yinh Israel yinh sunilbꞌal ej tiempo,» xhi ebꞌnaj. Hakpax tuꞌ sunil konhobꞌ chiꞌel yaw yinh kaw ip yu tzalahilal, chisbꞌitnhen ebꞌnaj Komam Jahawil yuto ichelax yalaxayto isxeꞌal Yatut Komam. 12 Txꞌiꞌal xin ebꞌyaꞌ sacerdote yebꞌ ebꞌnaj levita, yebꞌ ebꞌnaj iswiꞌehal yinh hunun majan yikꞌal, yebꞌ ebꞌnaj ichamta winaj ilnhe bꞌabꞌel Yatut Komam yet yalanhtokanoj, kaw yako ebꞌnaj yul isnuqꞌ yoqꞌi yet yilni ebꞌnaj yalaxayto isxeꞌal huneꞌxa akꞌ Yatut Komam tuꞌ, wal hunteqꞌanxa ebꞌnaj xin kaw chiꞌawi ebꞌnaj yinh kaw ip yu tzalahilal. 13 Matxa xin chitxumcha yu konhobꞌ yabꞌeni, yuto ay ebꞌnaj chiꞌel yaw yinh kaw ip, aypaxo ebꞌnaj chiꞌoqꞌ yinh kaw ip, yutoxanhe chiwejcha konhobꞌ yu tzalahilal, kaw xin nahatta chꞌapni yabꞌelax yul isnuqꞌ ebꞌnaj.