—Reina Ester, ¿tzet chawoche haqꞌanaꞌ? Haꞌ tzet chaqꞌana chiꞌaqꞌlax tawet, waxanhka chaqꞌan yikta majan konhobꞌ ayko yalanh wipan, chiwaqꞌan tawet, xhi naj tet ix.

3 Istaqꞌwi ix reina Ester, yalni ix:

—Mam rey, tato kꞌul hakꞌul winhan yebꞌ ta chischah hawiꞌ, chinqꞌanan tawet tato chawaqꞌ nimankꞌulal winhan yebꞌ yinh inkonhobꞌan, 4 yuto hanhonhtiꞌanh txonhbꞌilonhxatojanh tawet yu komaqꞌlaxkamojanh, kat kotanhtzelaxkanilojanh. Ta chonhtxonhlaxanh tawet yu jokanh hachejabꞌoj, machim tzet chiwalan tawet yinh huneꞌ tuꞌ, wal xin kokamikal tuꞌanh niman tzet chach kꞌaywahi, xhi ix Ester tet naj rey.

5 Istaqꞌwi naj rey Asuero, isqꞌambꞌen naj tet ix reina Ester:

—¿Mak anmahil huneꞌ tuꞌ? ¿Bꞌaytuꞌwal ay naj nani huneꞌ istxꞌojal tuꞌ yinh yanma yu isloloꞌal? xhi naj.

6 Istaqꞌwi ix Ester:

—Haꞌ huneꞌ naj txꞌoj isnabꞌal tuꞌ, haꞌ ton naj Amán, xhi ix. Hak tuꞌ yu iskabꞌkonkanh iskꞌul naj Amán sata naj rey Asuero yebꞌ sata ix Ester.

7 Lahwi tuꞌ yah lemna naj rey Asuero bꞌay tzꞌonhan bꞌay lanhan iswaꞌ tuꞌ, istit lemna ishowal naj, yelto naj yamaqꞌil palacio bꞌay ay teꞌ kaj; wal naj Amán kankano naj isqꞌanno nimankꞌulal yinh tet ix reina Ester, yuto yil naj tato ay ismay istit kamikal yibꞌanh naj yu naj rey yu huneꞌ tuꞌ. 8 Lahwi tuꞌ xin ismeltzopaxo naj rey bꞌey cuarto bꞌay ay huneꞌ qꞌinh tuꞌ, yilni naj naj Amán tato aykꞌayti naj sat ischem ix reina Ester. Yalni naj rey tuꞌ:

—¿Tom chawoche chach ipiko yinh ix reina tiꞌ yul watutan? xhi naj rey. Hayet yalni naj rey hakaꞌ tuꞌ yalaxiko yenhel sat naj Amán. 9 Ay xin huneꞌ naj eunuco ischejabꞌ naj rey, chiyij isbꞌi Harbona halni hakaꞌ tiꞌ:

—Haꞌ bꞌey yatut naj Amán tiꞌ, ay huneꞌ teꞌ tꞌunhbꞌabꞌal 22 (kabꞌ iskawinaj) metro yekanh istel, haꞌ naj Amán tiꞌ, haꞌ naj aqꞌnhe watxꞌe teꞌ yu istꞌunhbꞌalax naj Mardoqueo chiyute istxumni naj; yajaꞌ naj Mardoqueo tuꞌ, haꞌ naj watxꞌen huneꞌ iskꞌulal tawinh, xhi naj chejabꞌ tet naj rey tuꞌ. Yuxin yal naj rey hakaꞌ tiꞌ:

—Iweto naj Amán tiꞌ, kat hetꞌunhbꞌankanh naj yinh teꞌ, xhi naj rey.

10 Hak tuꞌ yu istꞌunhbꞌalaxkanh naj Amán, ishojlaxkamo naj. Haꞌ huneꞌ te teꞌ bꞌay tꞌunhbꞌalaxkanh naj Amán tuꞌ, haꞌtikꞌa naj aqꞌnhe watxꞌe teꞌ yu istꞌunhbꞌalaxkanh yaꞌ Mardoqueo. Lahwi tuꞌ yekꞌayo ishowal naj rey Asuero.