—¿Tzet aqꞌlax tet naj Mardoqueo yebꞌ tzet utelax naj yu huneꞌ tiꞌ? xhi naj. Istaqꞌwi ebꞌnaj ischejabꞌ naj rey yebꞌ ebꞌnaj oficial:

—Machi hunu tzet ye tuꞌ aqꞌlax tet naj yu huneꞌ tuꞌ, xhi ebꞌnaj.

4 Isqꞌambꞌen naj rey tuꞌ:

—¿Mak aykꞌo bꞌey amaqꞌ tiꞌ? xhi naj. Hayet yalni naj rey hakaꞌ tuꞌ, lanhan yapni naj Amán bꞌey yamaqꞌil palacio yu yalni naj tet naj rey tato chitꞌunhbꞌalaxkanh yaꞌ Mardoqueo yinh te teꞌ watxꞌelaxkanh yu naj.

5 Yalni ebꞌnaj ischejabꞌ naj rey hakaꞌ tiꞌ:

—Haꞌ naj Amán aykꞌo bꞌey amaqꞌ tiꞌ, xhi ebꞌnaj. Yalni naj rey tuꞌ:

—Okojabꞌti naj, xhi naj.

6 Hak tuꞌ yu yokto naj Amán sata naj rey, yalni naj rey hakaꞌ tiꞌ:

—Tato ay hunu naj kaw ay yelapno yul insatan, ¿tzettaxka chu wanikojan ismay naj chawute hawalni? xhi naj rey tuꞌ.

Hayet yabꞌen naj Amán hakaꞌ tuꞌ, istxumni naj yinh isnabꞌal hakaꞌ tiꞌ: «¿Maktaxka hunuxa mak kaw ay yelapno yul sat naj rey tiꞌ wibꞌanhan? Wal xin haninnhechꞌanan,» xhi naj yul iswiꞌ.

7 Istaqꞌwi naj Amán tet naj rey tuꞌ:

—Mam rey, haꞌ naj winaj chawoche hawaqꞌako ismay tuꞌ, 8 ilaxojabꞌti xil haqꞌap chawako tawinh, kat yilaxpaxti hacheh bꞌay chachahtoj, kat yilaxpaxti huneꞌ corona chꞌahto yinh iswiꞌ noꞌ, noꞌ yettikꞌa ebꞌnaj rey yehi, 9 kat yalaxiko xilqꞌape tuꞌ yebꞌ hacheh yul isqꞌabꞌ hunu naj yahaw konhobꞌ kaw ay yelapno yul hasat, kat yaniko naj xil haqꞌap tuꞌ yinh naj chawoche chiꞌok ismay tuꞌ, kat yahto naj yibꞌanh cheh, kat isxeklaxikꞌo noꞌ yalanh naj yulaj txonhbꞌal yul konhobꞌ, kat yahwi naj chixeknikꞌo noꞌ cheh tuꞌ, chalni naj: “Hak tiꞌ chiꞌutelax naj winaj chiꞌalaxiko ismay yu naj rey,” xhi naj Amán.

10 Yalni naj rey tet naj Amán tuꞌ:

—Asiꞌ yinh anhe, kat hawiniti xilqꞌape yebꞌ noꞌ cheh chawal tiꞌ, kat hawatxꞌen sunil tzet maxawal tiꞌ yinh naj judío chiyij Mardoqueo, naj chiꞌay tzꞌonhno istiꞌ ispultahil palacio. Haꞌ sunil tzet maxawal tiꞌ machi hunu tzet tiꞌ chamanhkꞌo, xhi naj rey tet naj Amán.

11 Yiniti naj Amán xilqꞌape tuꞌ yebꞌ noꞌ cheh, yaniko naj qꞌap yinh yaꞌ Mardoqueo, isxeknikꞌo naj noꞌ cheh yalanh yaꞌ Mardoqueo yul txonhbꞌal yul konhobꞌ, chixin el yaw naj Amán yinh kaw ip sata yaꞌ Mardoqueo, chalni naj hakaꞌ tiꞌ: «¡Hak tiꞌ chiꞌutelax naj winaj choche naj rey yaqꞌaꞌko ismay!» xhi naj.

12 Lahwi tuꞌ isto yaꞌ Mardoqueo istzꞌonhbꞌano isbꞌa istiꞌ ispultahil palacio, wal naj Amán xin yinh anhe to naj yatut yaniko naj yenhel sat yu txꞌixwilal. 13 Yalni naj sunil tzet yu tuꞌ tet ix Zeres yixal, yebꞌ tet ebꞌnaj yamigo. Yalni ebꞌnaj yamigo naj kaw ay isnabꞌal, yebꞌ ix Zeres tet naj Amán hakaꞌ tiꞌ:

—Tato makaxhok hawiqꞌayo habꞌa sata naj Mardoqueo ah Judá, chal yelapnoj tato mach chachqꞌojwi yinh naj, wal xin hach chaxhtanhilo yu naj, xhi ebꞌnaj.

14 Lanhan xin yalni ebꞌnaj huneꞌ tuꞌ tet naj yet yapni ebꞌnaj eunuco, ischejabꞌ naj rey yinh anhe awo yinh naj Amán tuꞌ, yu isto naj yinta naj rey waꞌo iskꞌatanh ix Ester yinh qꞌinh lanhan yekꞌtzen ix.