Yawte ix Ester naj rey Asuero yebꞌ naj Amán waꞌo yinh huneꞌ qꞌinh
5
Haxa yet yekꞌto oxebꞌ tzꞌayik tuꞌ xin, iswatxꞌen isbꞌa ix Ester, yaniko ix xil isqꞌap yet reina yinh; yokto ix yamaqꞌil palacio sata istiꞌ iskapil naj rey, tzꞌonhanikto naj rey tuꞌ yulikto iskapil tuꞌ, tꞌanhanilti naj yul ispultahil iskapil. 2 Hayet yilni naj ix reina Ester yamaqꞌil ispalacio tuꞌ, kaw kꞌulchꞌan ix yul sat naj, istoholbꞌanhenilti naj isvara oro ayko yul isqꞌabꞌ tet ix Ester. Hak tuꞌ yu ishitziko ix, istzabꞌni ix iswiꞌ chꞌen vara tuꞌ. 3 Isqꞌambꞌen naj rey tuꞌ tet ix:—¿Tzet haweh reina Ester? ¿Tzet hachejbꞌanil? Ta chaqꞌan yikta majan konhobꞌ ayko yalanh wipan, chiwaqꞌan tawet, xhi naj.
4 Istaqꞌwi ix Ester tet naj:
—Mam rey, ta chawoche, titanh yebꞌ naj Amán waꞌo inkꞌatanhan tinanh, yuto ay huneꞌ qꞌinh chiwekꞌtzehan, xhi ix. 5 Yuxin yal naj rey tet ischejabꞌ:
—Awtewe naj Amán yinh anhe, kat isyijelax tzet chiyal ix Ester tiꞌ, xhi naj.
Hak tuꞌ yu isto naj Asuero yebꞌ naj Amán yinh huneꞌ qꞌinh yekꞌtze ix reina Ester.
6 Haxa yet ayko naj rey waꞌo sat mexha yinh qꞌinh tuꞌ, yet lanhan yukꞌni naj vino, isqꞌambꞌen naj tet ix reina Ester:
—Ester, ¿tzet chawoche haqꞌanaꞌ? Tzijxanhe tzet chaqꞌana chiwaqꞌan tawet, waxanhka yikta majan konhobꞌ ayko yalanh wipan chiwaqꞌan tawet, xhi naj.
7 Istaqꞌwi ix Ester tet naj:
—Mam rey, haꞌ tzet chinqꞌanan tawet tinanh haꞌ huneꞌ tiꞌ; 8 ta kꞌul hakꞌul winhan yebꞌ ta hak tuꞌ chꞌel yinh hakꞌul chachhulpaxo hekal yebꞌ naj Amán tiꞌ waꞌo inkꞌatanhan, hekalto xin chiwalan tawet tzet chiwochehan hakaꞌ hawalni tiꞌ, xhi ix Ester.
9 Hayet ispaxto naj Amán yatut, kaw tzalahilal ye yanma naj, yajaꞌ hayet lanhan ispaxto naj tuꞌ, yilni naj yaꞌ Mardoqueo, tzꞌonhanayo yaꞌ istiꞌ ispultahil palacio, kaw xin tit ishowal naj yinh yaꞌ, yuto machi ahwano yaꞌ Mardoqueo tuꞌ yebꞌ mach bꞌili yaꞌ bꞌay ayayo tuꞌ. 10 Ekꞌayo ishowal naj Amán tuꞌ, isto naj yatut, ischejni naj awtelaxo ej yamigo yebꞌ yixal, haꞌ ton ix Zeres. 11 Yok naj Amán yalno yinh sunil iskꞌulchꞌanil isqꞌalomal, yebꞌ ej yuninal, yebꞌ tato yaqꞌ naj rey huneꞌ ismunil naj kaw niman yelapno yul palacio, yaniko naj rey tuꞌ naj yahawilo yinh ebꞌnaj yahaw konhobꞌ yebꞌ yibꞌanh ebꞌnaj ischejabꞌ naj rey. 12 Yalnipaxo naj Amán tuꞌ hakaꞌ tiꞌ:
—Hakpax tuꞌ ix reina Ester haninnhechꞌanan kinyawtehan ix waꞌo yebꞌ naj rey yinh huneꞌ qꞌinh yekꞌtze ix reina, yalnipaxo ix tato chinapnipaxojan yinta naj rey waꞌo yet hekal hunelxa. 13 Yajaꞌ sunil tiꞌ machi yelapno yul insatan yuto hunun tzꞌayik wilnihan ta tzꞌonhanayo naj judío Mardoqueo istiꞌ ispultahil ispalacio naj rey, xhi naj.
14 Yuxin yal ix Zeres, yixal naj, yebꞌ ebꞌnaj yamigo naj tet naj hakaꞌ tiꞌ:
—Watxꞌelaxojabꞌkanh hunu te teꞌ 22 (kabꞌ iskawinaj) metro chukanh istel; haxa yet hekal xin chawal tet naj rey tato chitꞌunhbꞌalaxkanh naj Mardoqueo yinh teꞌ. Lahwi tuꞌ, kat hato yinta naj rey waꞌo yinh tzalahilal, xhi yixal naj yebꞌ ej yamigo naj tet.
Kaw xin ischah iswiꞌ naj Amán yet yabꞌen naj huneꞌ tuꞌ. Hak tuꞌ xin yu iswatxꞌelaxkanh teꞌ.