Ix Ester istaqꞌwe ix tato chiꞌok tzotelo yinh iskonhobꞌ tet naj rey Asuero
4
Hayet yabꞌen yaꞌ Mardoqueo sunil tuꞌ, istzilnilo yaꞌ xil isqꞌap, yaniko yaꞌ xilqꞌape yet bꞌiskꞌulal yinh, yanahto yaꞌ tanh xol xil iswiꞌ, isbꞌelwikꞌo yaꞌ yul konhobꞌ, chixin el yaw yaꞌ yu bꞌiskꞌulal, yuto yaꞌ yuko yinh yanma yaꞌ. 2 Yapni yaꞌ sata ispultahil ispalacio naj rey, yajaꞌ mach okto yaꞌ yuto mach istzano yaꞌ yokto yul ispultahil ispalacio naj rey yu xilqꞌape yet bꞌiskꞌulal ayko yinh. 3 Hayet yabꞌen ebꞌnaj judío ay yulajla konhobꞌ bꞌay apni huneꞌ chejbꞌanile yalilto naj rey, yok huneꞌ niman bꞌiskꞌulal yinh yanma ebꞌnaj, machi xin waꞌ ebꞌnaj yu istxahli, yok ebꞌnaj oqꞌoj, yuto yaꞌ yuko yinh yanma ebꞌnaj, txꞌiꞌal xin ebꞌnaj way xol tanh yebꞌ xil isqꞌap qꞌaqꞌiꞌ.4 Isto ebꞌix qꞌopo ischejabꞌ ix Ester yebꞌ ebꞌnaj eunuco chitanhen ebꞌix yalno huneꞌ tuꞌ tet ix reina Ester. Hayet yabꞌen ix huneꞌ tuꞌ kaw yaꞌ yuko yinh yanma ix. Yanito ix xilqꞌape kaw kꞌul tet yaꞌ Mardoqueo, yu ishelnilo yaꞌ xilqꞌape yet bꞌiskꞌulal ayko yinh, yajaꞌ xin mach isje yaꞌ yiqꞌalo xilqꞌape yet bꞌiskꞌulal ayko yinh. 5 Yawten ix reina Ester naj eunuco chiyij Hatac ayko ischejabꞌo ix yu naj rey, ischejnito ix naj iskꞌatanh yaꞌ Mardoqueo, yu isqꞌambꞌen naj tet yaꞌ Mardoqueo tzet ye huneꞌ tuꞌ yebꞌ tzet yinh xin ayko xilqꞌape yet bꞌiskꞌulal yinh yaꞌ.
6 Hak tuꞌ yu isto naj Hatac yilno yaꞌ Mardoqueo bꞌey txonhbꞌal yul konhobꞌ ayko sata istiꞌ ispultahil palacio. 7 Yalni yaꞌ Mardoqueo sunil tuꞌ, yalnipaxo yaꞌ yinh chꞌen plata yalte naj Amán tet naj rey yu istanhtzelaxilo sunil ebꞌnaj judío. 8 Yaqꞌnipaxo yaꞌ Mardoqueo tuꞌ iscopiahil chejbꞌanile yalilto naj rey bꞌey Susa bꞌay chala tato chitanhtzelaxilo ebꞌnaj judío; yu yaqꞌni naj Hatac carta tuꞌ tet ix Ester, yu yohtanhenilo ix sunil tuꞌ. Istaqꞌenpaxto yaꞌ Mardoqueo tuꞌ tet ix Ester tato chiꞌok ix tzotelo tet naj rey yinh iskonhobꞌ yu iskolchaloj.
9 Lahwi tuꞌ ismeltzo naj Hatac iskꞌatanh ix Ester yalni naj tet ix sunil tzet yal yaꞌ Mardoqueo.
10 Ischejnipaxto ix Ester naj Hatac yalno tet yaꞌ Mardoqueo hakaꞌ tiꞌ: 11 «Sunil ebꞌnaj ischejabꞌ yaꞌ rey yebꞌ sunil anma ay yul konhobꞌ ayko yalanh yip yaꞌ rey tiꞌ, yohtaj tato makxanhetikꞌa chiꞌapni yamaqꞌil istiꞌ ispultahil bꞌay ay yaꞌ rey yu yok tzotelo tet yaꞌ, tato winaj maka ix, yajaꞌ ta maxhtaj yaꞌ awtenhe, haꞌ huneꞌ mak tuꞌ bꞌay chal chejbꞌanile tato yilal iskami, kachannhe tato chisyehto yaꞌ chꞌen vara oro ayko yul isqꞌabꞌ tet huneꞌ mak tuꞌ, wal tuꞌ machi aqꞌlaxkamoj; yajaꞌ wal hanintiꞌan mach awtebꞌilo hinan wilnihan yaꞌ rey yulbꞌal huneꞌ ixahaw tiꞌ,» xhito ix tet yaꞌ Mardoqueo.
12 Yal-lax tet yaꞌ Mardoqueo sunil tzet yal ix Ester. 13 Yalnipaxto yaꞌ Mardoqueo ispaj istzotiꞌ ix Ester tuꞌ hakaꞌ tiꞌ: «Mach chanah tato chachkolcha tet huneꞌ chejbꞌanile tuꞌ yuto ayachikto yul yatut yaꞌ rey sata sunil ebꞌnaj jet konhobꞌ judío chikami. 14 Tato mach chachok tzotelo yinh konhobꞌ tiꞌ tet yaꞌ rey tinanh ay bꞌay chitit hunu mak chonhkolnihanh, yajaꞌ wal hach xin chachtanhiloj yebꞌ sunil hanoh, yuxin yilal hatxumni ta kꞌuxantaxka chachalaxiko reinahil yu konhhakolnilojanh yul isqꞌabꞌ huneꞌ isyaꞌtajil tiꞌ,» xhito yaꞌ Mardoqueo.a
15 Ispajtzento ix Ester tet yaꞌ Mardoqueo hakaꞌ tiꞌ: 16 «Asiꞌ kat hakutxbꞌaniko sunil ebꞌnaj jet konhobꞌ ay yul konhobꞌ Susa tiꞌ, kat hawalni tato chitxahli ebꞌnaj winhan, mach xin chiwaꞌ ebꞌnaj yu istxahli; mach chexwaꞌi yebꞌ mach cheyukꞌ tzet ye tuꞌ yulbꞌal oxebꞌ tzꞌayik yebꞌ oxebꞌ aqꞌbꞌal. Hakinpax tuꞌan yebꞌ ebꞌix qꞌopo ayko inkꞌatanhan, mach chonhwaꞌanh yu kotxahlihanh. Lahwi tuꞌ, kat woktojan wilnojan yaꞌ rey waxanhka mach hako tuꞌ yalni chejbꞌanile, yajaꞌ ta chinkaman xin, kattikꞌa inkaman,» xhito ix.
17 Hak tuꞌ yu isto yaꞌ Mardoqueo, isyijen yaꞌ sunil tzet yal ix Ester.