3 Yuxin isqꞌambꞌe ebꞌnaj chimunla istiꞌ ispultahil palacio tuꞌ tet yaꞌ Mardoqueo: «¿Tzet yinh xin mach chayije chejbꞌanile chal yaꞌ rey?» xhi ebꞌnaj. 4 Hunun tzꞌayik isqꞌambꞌen ebꞌnaj huneꞌ tuꞌ tet yaꞌ Mardoqueo, yajaꞌ xin mach chiyabꞌeto yaꞌ tzet chal ebꞌnaj, yuxin ok ebꞌnaj aqꞌokꞌule yinh yaꞌ Mardoqueo tet naj Amán yu kam yilni naj tato kaw yeli mach chisyije yaꞌ Mardoqueo yay jahno sata naj Amán. Haꞌ yaꞌ Mardoqueo tuꞌ xin xayalilo yaꞌ tet ebꞌnaj tato judío yaꞌ.

5 Haxa yet yilni naj Amán tato yeli mach chiꞌay jahno yaꞌ Mardoqueo sata naj yebꞌ ta mach chiyiyo isbꞌa yaꞌ sata naj, yok ishowal naj yinh yaꞌ Mardoqueo. 6 Yajaꞌ wal naj Amán tuꞌ yohtaxa naj tato judío yaꞌ Mardoqueo tuꞌ, yuxin mach yoche naj tato hanhkꞌanhe yaꞌ Mardoqueo chispotxꞌkamoj, wal xin yoche naj istanhtzelo sunil ebꞌnaj judío ay yulajla nime konhobꞌ ayko yalanh yip naj rey Asuero, ebꞌnaj judío tuꞌ yet konhobꞌ yaꞌ Mardoqueo ebꞌnaj.

7 Haꞌ yinh bꞌabꞌel ixahaw yul habꞌil, haꞌ ton ixahaw chiyij Nisán yet 12 (kabꞌlahonhebꞌxa) habꞌil yok naj Asuero reyal yalaxiko suerte chiyij Pur sata naj Amán, yu yilni naj tzet tzꞌayikal yebꞌ tzet ixahawil yul habꞌil chiyij isbꞌa tzet ayko yinh isnabꞌal naj iswatxꞌeni, yelilo yinh suerte tuꞌ 12 (iskabꞌlahonhebꞌ) ixahaw, haꞌ ton ixahaw Adar. 8 Yalni naj Amán tet naj rey Asuero:

—Mam rey, haꞌ xol sunil konhobꞌ ayko yalanh hawip tiꞌ ay hunteqꞌan anma nan konhobꞌal pujantoj, haꞌ ischejbꞌanil hunteqꞌan anma tuꞌ mach lahano yebꞌ ischejbꞌanil sunil ej konhobꞌ, mach xin chisyije kuybꞌanile chawaliltoj, machi xin tzet chawiqꞌ yinh hunteqꞌan anma tuꞌ ta chitoehikꞌoj. 9 Yuxin ta chischah hawiꞌ watxꞌe huneꞌ chejbꞌanile chalniltoj tato chitanhtzelaxilo hunteqꞌan anma tuꞌ. Haxa hanintiꞌan chiwaqꞌan 10 (lahonhebꞌ) mil talento chꞌen plata yul isqꞌabꞌ ebꞌnaj chiꞌilni tzet ayach, haxa ebꞌnaj xin chiꞌinito chꞌen yul hakꞌuwanbꞌal, xhi naj Amán.

10 Hayet yabꞌen naj rey Asuero yalni naj Amán hakaꞌ tuꞌ, yinilo naj isjolqꞌabꞌ ayko yinh yiximal isqꞌabꞌ yaqꞌni naj tet naj Amán, iskꞌahol naj Hamedata naj agagueo; naj Amán tuꞌ kaw ayko ishowal naj yinh ebꞌnaj judío. 11 Yalni naj rey Asuero tet naj Amán tuꞌ:

—Haꞌ chꞌen plata chawal tiꞌ kanojabꞌkano chꞌen tawet, hakpax tuꞌ xin hunteqꞌan anma chawal tiꞌ, chiwakojan yul haqꞌabꞌ, watxꞌe tzet chawoche yinh, xhi naj rey Asuero tuꞌ.

12 Yawtelax ebꞌnaj istzꞌibꞌlom naj rey yinh 13 (oxlanhebꞌ) tzꞌayik yinh isbꞌabꞌel ixahaw, yu istzꞌibꞌnhenkano ebꞌnaj chejbꞌanile chal naj Amán, kat yalaxto tet ebꞌnaj ay ismunil yu naj rey yebꞌ tet ebꞌnaj iswiꞌehal yeko yinh hunun konhobꞌ, yebꞌ tet ebꞌnaj yahawil hunun nimeta konhobꞌ. Haꞌ huneꞌ chejbꞌanile tuꞌ tzꞌibꞌnhelax yinh yabꞌxubꞌal yebꞌ yinh istzꞌibꞌ hunun konhobꞌ tuꞌ, yok isbꞌi naj rey yinh, yokpaxo issellohal isjolqꞌabꞌ naj yinh hunun carta. 13 Yalaxto carta tuꞌ yinh correo yulajla hunun konhobꞌ ayko yalanh yip naj rey Asuero. Haꞌ yul carta tuꞌ tzꞌibꞌnhelaxtoj tato yilal ispotxꞌlaxkamo kat istanhtzelaxkanilo sunil ebꞌnaj judío; ebꞌnaj tzehtaj yebꞌ ebꞌnaj ichamta winaj, yebꞌ nixhte unin, yebꞌ ebꞌix ix. Yinhnhe xin huneꞌ tzꞌayik bꞌay chitanhtzelaxilo sunil ebꞌnaj Judío tuꞌ, haꞌ ton yinh 13 (yoxlanhebꞌ) tzꞌayik yinh 12 (iskabꞌlahonhebꞌ) ixahaw, haꞌ ton ixahaw Adar, kat xin yokkano tzetaj ay ebꞌnaj judío tuꞌ yu naj Amán, xhihayo chejbꞌanile yul carta tuꞌ. 14 Yalaxto iscopiahil huneꞌ chejbꞌanile tuꞌ sunil yulajla konhobꞌ ayko yul ismajul naj rey, ispujbꞌalaxikꞌo chejbꞌanile tuꞌ xolaj konhobꞌ, yu iswatxꞌen isbꞌa anma yinh huneꞌ tzꞌayik tuꞌ. 15 Yinh anhe xin pujbꞌalaxikꞌo chejbꞌanile ayayo yul carta tuꞌ yinh correo hakaꞌtikꞌa yu ischejni naj rey, haꞌ ton chejbꞌanile watxꞌi bꞌey konhobꞌ Susa, iscapital txꞌotxꞌ konhobꞌ tuꞌ. Haꞌ naj rey Asuero yebꞌ naj Amán ok ebꞌnaj ukꞌu vino, wal anma ay yul konhobꞌ Susa ok xiwkilal yinh yet yabꞌen huneꞌ chejbꞌanile tuꞌ.