Alaxiko ix Ester reinahil
2
Hayet yekꞌto hunteqꞌan tuꞌ, yet xaꞌekꞌayo ishowal naj rey Asuero, isnahniti naj ix Vasti yebꞌ yet ismanhkꞌon ix tzet yal naj, isnahnipaxti naj chejbꞌanile halbꞌilkano yibꞌanhilo ix. 2 Lahwi tuꞌ yalni ebꞌnaj ischejabꞌ naj rey Asuero tuꞌ tet, yebꞌ tet ebꞌnaj yahaw konhobꞌ chikolwa yinta hakaꞌ tiꞌ: «Saylaxojabꞌ ebꞌix qꞌopo kaw kawla ix, kat yul ebꞌix sata yaꞌ rey tiꞌ, 3 yaqꞌabꞌiko yaꞌ ebꞌnaj winaj yul hunun konhobꞌ ayko yalanh yip tiꞌ, yunhe yiniti ebꞌnaj ebꞌix qꞌopo kaw kawla ix, maxhto winaj chiqꞌle, kat yilaxti ebꞌix yatut yaꞌ rey bꞌey Susa tiꞌ. Kat yokkano ebꞌix yul isqꞌabꞌ naj eunuco Hegai, naj chitanhen ebꞌix ix ay bꞌey palacio, kat istzantelax ebꞌix, yunhe kaw kꞌulchꞌan chiꞌelkaniko ebꞌix. 4 Haꞌ xin ix qꞌopo chischah iskꞌul yaꞌ rey, haꞌ ix chꞌok reinahil selelo ix reina Vasti,» xhi ebꞌnaj. Haꞌ tzet yal ebꞌnaj tuꞌ ischah iswiꞌ naj rey, isyijen naj hakaꞌ yu yalni ebꞌnaj tuꞌ.5 Haꞌ bꞌey konhobꞌ Susa bꞌay ay naj rey, haꞌ tuꞌ ay huneꞌ yaꞌ judío chiyij Mardoqueo, iskꞌahol yaꞌ Jair, haxa yaꞌ Jair iskꞌahol naj Simei, haxa naj Simei iskꞌahol naj Cis, haxa naj Cis titna naj yinh yuninal yaꞌ Benjamín. 6 Yaꞌ Mardoqueo tuꞌ ilaxto yaꞌ xol ebꞌnaj ilaxilo bꞌey Jerusalén, yilaxto preso yinta yaꞌ rey Jeconías, isreyal Judá, bꞌey Babilonia yu naj rey Nabucodonosor. 7 Haꞌ xin yaꞌ Mardoqueo aqꞌni chꞌibꞌo ix Hadasa, chihal-laxpaxo Ester, yuto mebꞌaꞌ unin ix. Haꞌ ix Ester tuꞌ iskutzꞌin yuxhta ismam yaꞌ Mardoqueo ye ix; yajaꞌ hayet iskam ismam ix yebꞌ ismiꞌ ix yokkano ix iskutzꞌino yaꞌ Mardoqueo tuꞌ, kaw xin kawla ix ix Ester.
8 Hayet pujbꞌalaxikꞌo huneꞌ chejbꞌanile yalilto naj rey Asuero xolaj konhobꞌ ayko yul ismajul txꞌotxꞌ konhobꞌ tuꞌ, iskutxbꞌalaxiko ebꞌix qꞌopota bꞌey Susa bꞌey ispalacio naj rey Asuero, yok naj Hegai istanhen ebꞌix. Yilaxpaxto ix Ester bꞌey ispalacio naj rey, haꞌ xin naj Hegai tanhen ix. 9 Haꞌ ix Ester tuꞌ kaw kawla ix ix yul sat naj Hegai, yuxin kaw kꞌul yute iskꞌul naj yinh ix, kaw yinh anhe ischej naj watxꞌelaxoko xil isqꞌap ix, yunhe kaw kꞌulchꞌan chꞌeliko ix, ischejni naj yaqꞌlaxpaxo tzet chislo ix kaw kꞌul. Yaniko naj hujwanh ebꞌix qꞌopotaj kaw helan ay bꞌey ispalacio naj rey yetbꞌiho ix, yilaxto ix Ester tuꞌ yebꞌ ebꞌix hujwanh bꞌey huneꞌ cuarto ekꞌbꞌalkano iskꞌulal sata hunteqꞌanxa cuarto bꞌay ay ebꞌix ix ay bꞌey ispalacio naj rey.
10 Haꞌ ix Ester tuꞌ mach yalilo ix mak yichmam ix yebꞌ tzet konhobꞌal ix, yuto hak tuꞌ yu yalni yaꞌ Mardoqueo tet ix ta mach chalilo ix. 11 Wal yaꞌ Mardoqueo xin, hunun tzꞌayik isbꞌeykꞌo yaꞌ yamaqꞌil nha bꞌay ay ebꞌix ix tuꞌ, yu yilni yaꞌ hanikꞌ ye ix Ester yebꞌ ta kꞌul chiꞌil-lax ix.
12 Sunil hunteqꞌan ebꞌix qꞌopo tuꞌ, huneꞌ habꞌil chiwatxꞌelax ebꞌix yu kam iskꞌulchꞌanbꞌikanilo ebꞌix; haꞌ yinh bꞌabꞌel wajebꞌ ixahaw chitzantelax ebꞌix, chimaslaxiko aceite yet mirra yinh isnimanil ebꞌix, haxa yinh wajebꞌxa ixahaw chiꞌalaxiko anh xuqꞌ sam yinh ebꞌix yebꞌ sunil tzet chiꞌokniko yu ebꞌix yinh sat yu iskꞌulchꞌanbꞌiloj. Haxa yet chilahwi istiempohal iswatxꞌelax ebꞌix tuꞌ xin kat isyeni isbꞌa ebꞌix yinh hununtajil sata naj rey Asuero. 13 Hayet chisyeni isbꞌa ebꞌix tuꞌ sata naj rey, chiꞌaqꞌlax sunil tzet chiyoche ebꞌix yelawiloj, ayko xin yelawil ebꞌix tuꞌ yet chiꞌel ebꞌix bꞌay aya, kat yapni ebꞌix bꞌey yatut naj rey. 14 Chito hunun ebꞌix tuꞌ isyebꞌ isbꞌa sata naj rey yinh qꞌejbꞌiyalil, haxa yet sakꞌayal xin, kat ismeltzo ebꞌix bꞌey hunxa nha bꞌay ay ebꞌix iskabꞌ yixal naj rey, bꞌay ay naj eunuco Saasgaz, yilomal ebꞌix yu naj rey tuꞌ, matxa xin chiꞌapni ebꞌix sata naj rey, kachanta xin ta choche naj hunu ix, kat yawten naj isbꞌi ix, kat yapni ix.
15 Haxa yet yok ix Ester, iskutzꞌin naj Abihail isyeno isbꞌa sata naj rey Asuero, machi hunu tzet ye tuꞌ isqꞌan ix, wal xin tonhe isyije ix sunil tzet yal naj Hegai, naj ayko yilomalo ebꞌix qꞌopo yu naj rey. Sunil anma ilni ix Ester tuꞌ kaw kꞌulchꞌan ix yul sat. Haꞌ naj Abihail, ismam ix Ester tuꞌ, yuxhta ismam yaꞌ Mardoqueo ye naj, haꞌ xin yaꞌ Mardoqueo tuꞌ aqꞌni chꞌibꞌo ix, yuxin iskutzꞌin yaꞌ tuꞌ yeko ix. 16 Hayet 10 (lahonhebꞌ) ixahaw yulbꞌal huneꞌ habꞌil tuꞌ, haꞌ ton ixahaw chiyij Tebet yet hujebꞌxa habꞌil yok naj Asuero reyal, yilaxto ix Ester isyeno isbꞌa sata naj rey bꞌey ispalacio. 17 Wal naj rey ekꞌbꞌal yako yanma naj yinh ix Ester sata hunteqꞌanxa ebꞌix qꞌopo ilaxto sata naj, yuto kaw kꞌulchꞌan ix yul sat naj. Haꞌ yinh ix Ester tuꞌ bꞌay tzala naj, yanahto naj rey Asuero corona yet ebꞌix reina yinh iswiꞌ ix, yokkano ix reinahil selelo ix Vasti. 18 Lahwi tuꞌ yekꞌtzen naj huneꞌ qꞌinh yu yalaxiko ismay ix Ester, yawtelax sunil ebꞌnaj yahaw konhobꞌ yebꞌ ebꞌnaj chimunla yinta naj rey yinh qꞌinh tuꞌ. Yiyti naj yip chꞌen tohlabꞌal yibꞌanh anma ay yul ismajul isnación tuꞌ, yebꞌ xin txꞌiꞌal tzet ispohkanh naj sabꞌehalil tet anma, hatatikꞌa iskꞌulal iskꞌul ebꞌnaj rey.
Yalilo yaꞌ Mardoqueo tato ay hunteqꞌan ebꞌnaj ayko ishowal yinh naj rey Asuero
19 Hayet iskutxbꞌalaxiko ebꞌix qꞌopo yet iskayel, tzꞌonhanayo yaꞌ Mardoqueo bꞌey ispultahil yatut naj rey. 20 Wal ix Ester machi hunu mak bꞌay yal ix tzet konhobꞌal ix yebꞌ mak yichmam ix, yuto hak tuꞌ yu yalni yaꞌ Mardoqueo tet ix. Ix Ester tuꞌ kaw yijem ix tet yaꞌ Mardoqueo tuꞌ, yuto hak tuꞌ yu iskuyni yaꞌ ix. 21 Haꞌ yinh hunteqꞌan tzꞌayik yet tzꞌonhanayo yaꞌ Mardoqueo bꞌey ispultahil yatut naj rey, yabꞌen yaꞌ tato yako ishowal kawanh ebꞌnaj eunuco chitanhen pulta tuꞌ yinh naj rey Asuero, yoche ebꞌnaj ispotxꞌoꞌkamo naj. Haꞌ ebꞌnaj kawanh eunuco tuꞌ, haꞌ ton naj Bigtán yebꞌ naj Teres. 22 Hayet yabꞌen yaꞌ Mardoqueo huneꞌ tuꞌ yalnilo yaꞌ tet ix Ester, haxa ix Ester tuꞌ halni tet naj rey Asuero yinh isbꞌi yaꞌ Mardoqueo. 23 Haxa yet yabꞌen naj rey huneꞌ tuꞌ, isqꞌambꞌenilo naj tato yeli, haxa yet yabꞌchaloj tato yeli, ischejni naj tꞌunhbꞌalaxokanh ebꞌnaj kawanh eunuco tuꞌ yinh te teꞌ. Istzꞌibꞌnhelaxkano huneꞌ tuꞌ yul libro chitzotel yinh tzetaj chiswatxꞌe ebꞌnaj rey.