6. YAQꞌ KOMAM DIOS JAHAWIL ISPAJ TET YAꞌ JOB
(38:1–42:6)
Komam Jahawil pajtzen sunil hunteqꞌan tzet tzotenhelaxi
38
Lahwi tuꞌ istaqꞌwi Komam Jahawil tet yaꞌ Job xol huneꞌ niman kajtuxkum, yalni hakaꞌ tiꞌ:2 «¿Makach anmahil chawebꞌalo nabꞌale yu tzotiꞌ machi yelapno chawal tiꞌ?a
3 Wal tinanh kawxe habꞌa, kꞌul chawute hakꞌalni hawiktaj yu hatxꞌambꞌal hakaꞌ hunu naj winaj,
yuto ay tzet chinqꞌambꞌehan tawet, kat hawaqꞌni ispaj wetan.
4 ¿Bꞌaytuꞌwal ayachikoj yet inwatxꞌenan txꞌo txꞌotxꞌ tiꞌ? Halilo wetan tato ay hanabꞌal.
5 ¿Hawohtami mak txumni hanta yuko sat txꞌo txꞌotxꞌ tiꞌ,
yebꞌ xin mak anmahil malen txꞌotxꞌ yu txꞌanh txꞌanh?
6 ¿Hawohtami bꞌaytet bꞌatxnhe xeꞌ txꞌo txꞌotxꞌ tiꞌ,
yebꞌ xin mak anayo chꞌen bꞌabꞌel chꞌen xeꞌo txꞌotxꞌ,
7 yet isbꞌitni txꞌumel yet lanhanxa issajbꞌiloj,
yet istzalapaxo sunil ebꞌnaj iskꞌahol Komam Dios?
8 ¿Mak majchen bꞌay kachan yekꞌ haꞌ mar yet tixhanto haꞌ sat txꞌo txꞌotxꞌ?
9 Hanintiꞌan waqꞌan moyan xilo isqꞌap ha haꞌ yebꞌ qꞌejholo yenheloj.
10 Hanintiꞌan wakojan yechel bꞌay kachan yekꞌ haꞌ mar,
wanikanikojan ispultahil haꞌ yebꞌ islawehal kaw kꞌul.
11 Walnikanojan tet haꞌ: “Hanhe bꞌey tiꞌ chaxhkachnakanoj,
matxa chachpalkꞌonikꞌto tasataj; haꞌ bꞌay chaxkachnakanapno xin,
haꞌ tuꞌ chitanhayo yekꞌ jobꞌla haloloꞌal,” kinchihan.
12 ¿Xam hachej issajbꞌilo hunelo yulbꞌal tiempohal itzitz hach?
¿Yebꞌilmi hawu bꞌay chꞌekꞌ tzꞌayik yul yehobꞌal,
13 yu yapni sajilqꞌinal sunil sat txꞌo txꞌotxꞌ tiꞌ,
kat xin istzikobꞌtanhelax ebꞌnaj txꞌoj isbꞌeybꞌal?
14 Haꞌ txꞌo txꞌotxꞌ tuꞌ chishel isbꞌa yilot txꞌotxꞌ yu yoj tzꞌayik,
hakaꞌ yilot yelawil xilqꞌape, maka hakaꞌ yokkano yechel hunu sello yinh txꞌotxꞌ qꞌantxꞌotxꞌ.
15 Haꞌ istzejtah ebꞌnaj txꞌoj chiꞌilaxilo tet ebꞌnaj,
kat yilaxilo yip isqꞌabꞌ ebꞌnaj kaw aykanh chiyute isbꞌa, kat istanhilo yip ebꞌnaj.
16 ¿Hawohtaxam bꞌay chipitzkꞌati isnuqꞌ haꞌ mar,
xam xin kach ekꞌ hawilaꞌ tzet yelapno ye yulayto isnuqꞌ haꞌ bꞌay kaw nahat yekanayto?b
17 ¿Xam hawil bꞌay ay ispultahil kamikal,
xam hawilpaxo yechel kamikal?
18 ¿Hawohtami hanta yeko sat sunil txꞌo txꞌotxꞌ tiꞌ?
Halilo wetan tato hawohta sunil.
19 ¿Hawohtami bꞌeh chiꞌapni bꞌay chiꞌehikꞌo yoj tzꞌayik,
yebꞌ bꞌay chiꞌehikꞌo qꞌejholo?
20 ¿Chimisje hawu hachejnito yoj tzꞌayik bꞌay chikachnakan apno txꞌo txꞌotxꞌ,
kat hawinipaxti bꞌay aya?
21 ¡Etza hawohtaxa! yuxin xakaxhpitzkꞌa yet iswatxꞌi sunil tuꞌ, chal tuꞌ.
Chal yelapnoj tato kaw matxa chibꞌischa isbꞌisil hahabꞌilal.
22 ¿Xam kach qꞌojapno bꞌay kꞌuwan chꞌen chew,
yebꞌ xam hawil bꞌay kꞌuwan chꞌen sajbꞌat?
23 Haꞌ chꞌen tuꞌ kꞌuwan chꞌen wuhan,
kat yokniko yinh istzꞌayikal isyaꞌtajil yet chihul istzꞌayikal yok howal.
24 ¿Hawohtami tzet bꞌehal chischahto issajilqꞌinal yet chispohnito isbꞌa?
maka ¿tzet chiyu ispohlen isbꞌa jaqꞌeqꞌ chitit yinh yetkꞌulal bꞌay chiꞌahilo tzꞌayik yibꞌanh txꞌo txꞌotxꞌ?
25 ¿Mak chihajni bꞌeh tet haꞌ nime nhabꞌ,
yebꞌ mak chiyeni bꞌeh bꞌay chꞌekꞌ jepla kꞌuh yet chimaqꞌwa kꞌuh
26 yet chiyaqꞌni nhabꞌ bꞌay machi anma,
sat txꞌotxꞌ desierto bꞌay machi mak ayah
27 yu ischakꞌanbꞌi sat txꞌotxꞌ desierto,
aykano ischukil, kat yahilo iswol teꞌ telaj?
28 ¿Aymi ismam haꞌ nhabꞌ?
¿Mak chiꞌaqꞌni pitzkꞌaho yal chew chꞌay yet aqꞌbꞌalil?
29 ¿Aymipaxo ismiꞌ chꞌen chew? Haxa yal chew chitit yul satkanh,
¿mak yinh chipitzkꞌatij?
30 Haꞌ yojomal ha haꞌ chikawbꞌilo hakaꞌ chꞌen chꞌen yu chꞌen chew tuꞌ,
kat iskawbꞌipaxilo haꞌ mar yu chꞌen chew.
31 ¿Tom hach chahunbꞌako hunmajan txꞌumel chiyij Pléyades?
¿tom hach chapoh xol hunmajan txꞌumel chiyij Orión?
32 ¿Tom hach chawilti ej txꞌumel yul yehobꞌal yunhe ismujli yinh istiempohal?
maka ¿tom chawijbꞌa hunteqꞌan txꞌumel chiyij Osa Mayor yebꞌ nixhte txꞌumel ayko iskꞌatanh?
33 ¿Hawohtami hunteqꞌan chejbꞌanile chiꞌokniko satkanh? ¿chimyu yokniko hawu hunteqꞌan chejbꞌanile tuꞌ sat txꞌo txꞌotxꞌ tiꞌ?
34 ¿Chimisje hawaniko yul hanuqꞌ hawawi yu hachejni moyan,
yunhe yaniti nime nhabꞌ tawibꞌanh?
35 ¿Tom chachejto hunteqꞌan kꞌuh chijeplahi, kat istohi,
tom chiyal tawet? “Ay honhanh lah,” tom xhi.
36 ¿Mak aqꞌni helanile yul yanma?
¿Mak aqꞌni yitzꞌatil wiꞌe tet nabꞌale?
37 ¿Mak chibꞌisni tzetaj ay yul satkanh yu ishelanil?
¿Mak chichejniti moyan yanoyo nhabꞌ?
38 ¿Hak tuꞌ xin haꞌ pojoj chishunbꞌakano isbꞌa yet chꞌok tzꞌotzꞌewal,
hunxanhe niman kꞌolan chute isbꞌa?
39 ¿Tom hach chasay ischibꞌe noꞌ bꞌalam?
¿Tom hach chawaqꞌ noho iskꞌul noꞌ nixhte yunin noꞌ miꞌe bꞌalam,
40 yet hilanayo noꞌ yul isnhachꞌen maka yet ayko noꞌ yebꞌan isbꞌa xolaj telaj yechman ischibꞌe?
41 ¿Mak chiꞌaqꞌni islobꞌe noꞌ miꞌe hoh yebꞌ nixhte yunin,
yet chiꞌekꞌ noꞌ issayno islobꞌe yu nhochahilal,
chisqꞌanni noꞌ nixhte yunin tuꞌ tzet chislo wetan?» xhi Komam.