37
»Hayet chijepla kꞌuh, kat isbꞌilikanh wanmahan,yebꞌ xin chꞌah tꞌujla wanmahan yul yehobꞌal.
2 Abꞌewe isnhirla yul isnuqꞌ Komam Dios,
abꞌewe isbꞌili tzotiꞌ chiꞌelti yul istiꞌ Komam.
3 Haꞌ Komam chiꞌaqꞌni jeplaho kꞌuh sunil yul satkanh,
kat issajbꞌipaxilo sunil sat txꞌo txꞌotxꞌ tiꞌ yu.
4 Lahwi tuꞌ kat yabꞌelax isbꞌili yul isnuqꞌ Komam Dios,
haꞌ yul isnuqꞌ tuꞌ kaw aykano ismay.
Hayet chꞌabꞌelax yul isnuqꞌ Komam tuꞌ xin mach chisbꞌej kꞌuh isnhirnhonkanoj.
5 Hayet chinhirnhon yul isnuqꞌ Komam Dios kaw aykano ismay,
Komam chiwatxꞌen tzetaj ye tuꞌ kaw nimankano yelapnoj, mach chonhqꞌoji kotxumni.
6 Yuto haꞌ Komam Dios chihalni tet chꞌen sajbꞌat hakaꞌ tiꞌ: “Aykꞌayanh yibꞌanh txꞌo txꞌotxꞌ.”
Hak tuꞌ yalnipaxo Komam tet haꞌ wexhnhabꞌ yebꞌ tet haꞌ nimeta yaxnhabꞌ.
7 Hak tuꞌ xin matxa chiꞌelti naj winaj yul yatut,
hak tuꞌ chu yohtanhenilo sunil ebꞌnaj winaj tzetaj chiswatxꞌe Komam Dios.
8 Chiyebꞌanpaxto isbꞌa sunil no noqꞌ,
kat ye noꞌ yul yatut.
9 Yinh yetkꞌulal sur chitit nimeta kajtuxkum,
haxa yinh yetkꞌulal norte xin chitit chew yu jaqꞌeqꞌ.
10 Haꞌ xobꞌ istiꞌ Komam chixuniti chꞌen chew,
kat iskawbꞌilo chꞌen chew yibꞌanh haꞌ nimeta haꞌ.
11 Haꞌ Komam Dios chiꞌaniko haꞌ nhabꞌ xol moyan,
kat iskꞌaykanh moyan yu isjepla kꞌuh yu Komam.
12 Haꞌ moyan chꞌekꞌ hoyon bꞌay chal iskꞌul Komam Dios,
chisyijen tzet chiyal Komam yibꞌanh sat sunil txꞌo txꞌotxꞌ tiꞌ.
13 Haꞌ yinh sunil tuꞌ chisyelo Komam Dios ishowal,
maka iskꞌulchꞌanil iskꞌul yinh anma, yebꞌ iskꞌulalo yinh txꞌo txꞌotxꞌ.
14 Mam Job, abꞌe tzet chiwaltiꞌan, okanh tuknoj,
kat istxumni isbꞌa hakꞌul yinh kꞌaybꞌalkꞌule chiswatxꞌe Komam Dios.
15 ¿Chimnachalo hawu tzet chiyu yokniko sunil hunteqꞌan tiꞌ yu Komam Dios? yebꞌ
¿tzet chiyu isjepla kꞌuh xol moyan?
16 ¿Chimtxumcha hawu tzet chiyu islinhbꞌan isbꞌa moyan xol jaqꞌeqꞌ?
Haꞌ chiyenilo ishelanil Komam Dios,
haꞌ ishelanil Komam tuꞌ kaw kꞌaybꞌalkꞌule, kaw kꞌulkanoj.
17 ¿Tzet yinh chachqꞌaxnakanh yu qꞌaꞌ yul xil haqꞌap,
yet chinumikano txꞌo txꞌotxꞌ yu jaqꞌeqꞌ chitit yinh yetkꞌulal sur?
18 ¿Chimyu hakolwa yinh Komam Dios halebꞌanto satkanh tiꞌ,
machi xin chibꞌili, hakaꞌ iswatxꞌelax chꞌen espejo kaw kaw chiyukanikoj?
19 Kuyonhanh yinh tzet chu kotzotelanh tet Komam Dios,
yuto hanhonhtiꞌanh hakaꞌto xol qꞌejholo ayonhikojanh, matzet tzꞌaj jalaꞌanh.
20 Hanintiꞌan mach chiwochehan walaꞌan tato chintzotelan yebꞌ Komam Dios,
yuto chimkinistanhtzelojan.
21 Hayet chiꞌok moyan yinh sat tzꞌayik matxa chijil yoj tzꞌayik tuꞌ,
yajaꞌ hayet chihul jaqꞌeqꞌ kat yijnito moyan, kaw chihajlokanh sunil satkanh yu.
22 Hakaꞌxanhe istzejtzon chꞌen oro, hak tuꞌ chiyu jilni yetkꞌulal norte yu ishajanil,
haxa istzejla isqꞌaqꞌal yip Komam Dios kaw aykano ismay.
23 Machonhqꞌoji kotxumnilo hanta yelapno Komam Dios, Komam Kaw Aykano Yip yebꞌ kaw toholkanoj;
kaw kꞌulkano Komam, machi hunu mak tiꞌ chiyeta Komam.
24 Yuxin kaw chixiw ebꞌnaj winaj tet Komam Dios.
Haꞌ mak chalni tato kaw ay ishelanil yul yet ischukil,
machi xin chitzala Komam yinh,» xhi naj Eliú.