Naj Eliú chako naj ismay yip Komam Dios
36
Islahniko naj Eliú istzoteli, yalni naj hakaꞌ tiꞌ:2 «Wal tinanh xin echma hinan, kat kach inkuynihan,
ayto tzet chiwochehan walaꞌan yu chiwato hinbꞌahan yinh Komam Dios.
3 Chiwitijan bꞌay nahat tzet wohtajan yu walnihan tato Komam Dios,
Komam kinwatxꞌenan, kaw toholkanoj.
4 Yinh kaw yeli haꞌ tzet chiwaltiꞌan mach leqꞌtiꞌaloj;
haꞌ takꞌatanh ayko huneꞌ mak kaw isyelal chala yet chiyaqꞌni kuybꞌanile.
5 Haꞌ Komam Dios kaw nimankano yelapnoj,
yajaꞌ machi hunu mak tiꞌ chiyintanhelto Komam;
yebꞌ xin kaw aykano yip yitzꞌatil iswiꞌ Komam.
6 Mach chiyaqꞌ Komam iskawil anma txꞌoj,
yajaꞌ wal mak chiꞌekꞌyaꞌ yanma chiswatxꞌeko Komam yinh iskꞌulal.
7 Mach chiyilo Komam ismujlubꞌal yinh anma chiwatxꞌen istoholal,
wal xin chistzꞌonhbꞌako Komam iskꞌatanh ebꞌnaj rey yul istzꞌonhobꞌal,
yinh sunilbꞌal tiempo kat yalaxiko ismay.
8 Ta xin chikꞌal-laxayo ebꞌnaj yu chꞌen cadena,
kat yaqꞌlax ekꞌoyaꞌ yanma ebꞌnaj yu isyaꞌtajil;
9 haꞌ Komam chiyenilo tet ebꞌnaj tato mach kꞌulo tzet chiswatxꞌe ebꞌnaj,
yebꞌ ta meltzoko ebꞌnaj manhkꞌomal tet Komam,
10 chitzotel Komam tet ebꞌnaj, chiskachni Komam ebꞌnaj,
chalni Komam tato chisbꞌejkano ebꞌnaj istxꞌojal.
11 Ta xin chiyabꞌe ebꞌnaj tzet chiyal Komam,
chisyijen ebꞌnaj, chiyaqꞌ meltzo Komam iskꞌulal
yebꞌ tzalahilal tet ebꞌnaj sunilbꞌal tzꞌayik,
yebꞌ istiempohal chiꞌekꞌ ebꞌnaj yul sat yibꞌanhqꞌinal tiꞌ.
12 Yajaꞌ ta machi yabꞌe ebꞌnaj tzet chiyal Komam xin,
chiqꞌaxpolaxikꞌto ebꞌnaj yu chꞌen espada,
kat iskam ebꞌnaj yu manhnabꞌalehal.
13 Wal ebꞌnaj chal isbꞌa kꞌulal chitit ishowal Komam Dios yinh ebꞌnaj,
hayet chikꞌal-laxayo ebꞌnaj yu Komam, matxa chu yah yaw ebꞌnaj tet Komam.
14 Hayet ayko ebꞌnaj yinh istzehal, kat yul kamikal yinh ebꞌnaj,
kat islahwikano iskawil ebꞌnaj yinh txꞌixwilal.a
15 Haꞌ anma mebꞌaꞌ chiskolilo Komam xol mebꞌaꞌil;
haꞌ mak chꞌay isyaꞌtajil yibꞌanh, haꞌ isyaꞌtajil tuꞌ chiꞌaqꞌni istxumuꞌ isbꞌa.
16 Hak tuꞌ xin chu kaxhiskolnilo Komam Dios yul isqꞌabꞌ isyaꞌtajil,
kat kach yinito bꞌay kaw haman bꞌay machi isyaꞌtajil,
kat kach yaniko yinh mexha bꞌay ay itah kaw kꞌul.
17 Mahul tawinh sunil kamikal chitit yibꞌanh anma txꞌoj,
mach chu hamanhkꞌonilo isyaꞌtajil tawibꞌanh yu yil-lax tzet chachelikoj.
18 Yuxin xiwanh tet Komam Dios, haxinwal mach chitit ishowal tawinh,
kat kach istanhtzeniloj; wal xin matxa chu hamanhkꞌoni,
waxanhka chawaqꞌ huntenano melyu yu hakolnilo habꞌa.
19 ¿Tom ay yelapno haqꞌalomal maka chꞌen oro ay yul haqꞌabꞌ yul sat Komam?
Maka ¿tom ay yelapno sunil hawip yul sat?
20 Machojabꞌ chawako yinh hakꞌul hawocheniko hunu aqꞌbꞌal chuli,
yuto yinh aqꞌbꞌalil chikꞌaytzelaxilo konhobꞌ yul yehobꞌal.
21 Kaw chawil habꞌa matxahojabꞌ chachmeltzo yinh istxꞌojal,
hach tiꞌ xakaxhilwelax yu isyaꞌtajil.
22 Haꞌ Komam Dios kaw nimankano yelapno yip,
¿tom ay hunu naj kuywawom chu kolahbꞌan yebꞌ Komam?
23 ¿Tom ay hunu mak tiꞌ chihalni tet Komam Dios yinh tzet chiswatxꞌe? maka
¿tom ay hunuxa mak tiꞌ chalni: “Haꞌ tzet maxawatxꞌe tiꞌ mach kꞌuloj?” mach xhihoj.
24 Mach chanahulnheto hawinikanh Komam yinh tzet iswatxꞌe.
Huneꞌ bꞌay chiꞌokkano tꞌanhno ebꞌnaj winaj.
25 Haꞌ iskꞌulal chiswatxꞌe tuꞌ sunil ebꞌnaj winaj chitꞌanhxiko yinh,
waxanhka nahat, masanta chꞌapni ismujlubꞌal ebꞌnaj yinh.
26 Haꞌ Komam Dios kaw niman yelapnoj, hanhonh tiꞌ mach johtajo Komam,
mach chonhqꞌoji kobꞌisni istiempohal Komam.
27 Haꞌ Komam chiꞌinahto hunun tꞌuhan yoj haꞌ nhabꞌ,
chismeltzoniko Komam xobꞌ ha haꞌ nhabꞌil.
28 Kat yay wexhwon nhabꞌ yinh moyan,
kat yay nime yaxnhabꞌ yibꞌanh anma yu Komam.
29 ¿Mak hunu mak tiꞌ chitxumni hanta yeko sat nimeta moyan leyantoj? yebꞌ xin
¿Mak chitxumnilo tzet yinh xin chinhirla kꞌuh yul satkanh bꞌay ay Komam Dios?
30 Haꞌ Komam Dios chiꞌaqꞌni tzejlaho yibꞌanh haꞌ mar yet chimaqꞌwa kꞌuh,
wal yich haꞌ xin qꞌejholonhe.
31 Hak tuꞌ chu yaqꞌni Komam isyaꞌtajil yibꞌanh ej konhobꞌ;
chaqꞌni Komam tzet chislo sunil anma.
32 Chako Komam moyan yinh sat tzꞌayik yunhe matxa chimujli yoj tzꞌayik.
33 Hayet chinhirla kꞌuh, chisyenilo Komam bꞌiskꞌulal,
hayet chimaqꞌwa kꞌuh tuꞌ, kat isyenilo Komam Dios ishowal tet istxꞌojal.