35
Islahni naj Eliú istzoteli, yalnipaxo naj hakaꞌ tiꞌ:2 «“Mam Job, ¿tom chanah tato kꞌul maxawala yet maxawalni tato kꞌulach sata Komam Dios?”
3 Yebꞌ yet hawalni hakaꞌ tiꞌ: “¿Tzet chiyaqꞌ hunteqꞌan tiꞌ wetan? maka ¿tzet chiwiqꞌpaxojan yinh,
yu machi inmulan chiwakojan?” kachi.
4 Yajaꞌ wal tinanh chinokan inpajtzeꞌan tawet yebꞌ tet ebꞌnaj hawamigo ayko takꞌatanh,
chiwalnihan tzet chꞌekꞌ yinh innabꞌalan.
5 Ahanhtꞌanhno satkanh, kat kam hawilnitoj,
chawilni tato ekꞌbꞌal nahat yekanh moyan tasataj.
6 Tato chawako hamul, ¿tzet istxꞌojal chawatxꞌe yinh Komam Dios?
Ta xin kaw nimankano hamul tuꞌ, ¿tzet chaqꞌ huneꞌ hamul tuꞌ yinh Komam?
7 Ta xin machi hamul, ¿tzet iskꞌulal chawaqꞌ tet Komam Dios? maka
¿tzet chischah Komam tet haqꞌabꞌ?
8 Wal xin haꞌ hawet anmahil bꞌay chiꞌok hamul tuꞌ haꞌ chaweta,
haxa hakꞌulal xin haꞌ hawet anmahil chiꞌocheni.
9 Hayet chiꞌaqꞌlax isyaꞌtajil tet anma kat yah yaw,
chisqꞌanni iskol-laxilo yul isqꞌabꞌ ebꞌnaj winaj kaw ay yip.
10 Yajaꞌ xin machi hunu mak chalni hakaꞌ tiꞌ:
“¿Bꞌaytuꞌwal ay Komam Dios, Komam kinwatxꞌenan,
Komam chꞌaqꞌni bꞌitno anma aqꞌbꞌalil.
11 Komam ekꞌbꞌal chonhiskuyu sata no noqꞌ ay sat txꞌo txꞌotxꞌ tiꞌ;
chaqꞌnipaxo helanile jet sata noꞌ chꞌik chꞌekꞌ purla satkanh?” mach xhihoj.
12 Chiꞌel yaw anma chiꞌetalax tuꞌ,
yajaꞌ mach chabꞌe Komam yet chiꞌawi, yu isloloꞌal anma txꞌoj.
13 Yinh kaw yeli, haꞌ Komam Dios mach chiyoche yabꞌeꞌ leqꞌtiꞌal,
Komam Aykano Sunil Yip machi tꞌanhxiko yinh.
14 Waxanhka chawala tato mach chawil yinh Komam Dios,
yajaꞌ echma Komam, yuto yul isqꞌabꞌ Komam ayko tzetaj chawaqꞌle tiꞌ.
15 Hach tiꞌ chawala tato machi tit ishowal Komam,
mach chahpaxti isyaꞌtajil, yebꞌ ta machi yok yinh ismul naj winaj chakoj.
16 Yajaꞌ hach tiꞌ mam Job, tonhe chahaj hatiꞌ,
matzet chal yelapno huneꞌ chawal tiꞌ, kaw txꞌiꞌal tzotiꞌ chawala,
yajaꞌ chayeloj tato machi hanabꞌal yinh sunil tzet chawala,» xhi naj Eliú.