Yal naj Eliú tato hanhe Komam Dios kaw toholkanoj
34
Yalnipaxo naj Eliú hakaꞌ tiꞌ:2 «Hex ay hehelanil abꞌewe tzotiꞌ chiwalan,
kat heyabꞌenpaxo hex kaw ay henabꞌal.
3 Yuto haꞌ kotxikin chiꞌabꞌeni ta kꞌul maka ta mach kꞌulo tzet chihal-laxi,
hakaꞌ yabꞌen ishomal kotiꞌ isxuqꞌal tzet chikolo.
4 Kosayaꞌwelo istoholal,
johtanhewelo iskꞌulal koxol.
5 Yaꞌ Job yal yaꞌ hakaꞌ tiꞌ: “Hanintiꞌan machi inmulan,
yajaꞌ mach isje Komam Dios iswatxꞌeꞌ istoholal winhan.
6 Tinanh xin, ¿chimwalan ta ay inmulan? Yaj ta chiwalan hakaꞌ tuꞌ,
leqꞌtiꞌ hinan. Wal xin machi inmulan, yajaꞌ kaw chiwabꞌehan isyaꞌil inlahwilalan,” xhi yaꞌ Job.
7 ¿Tom ay mak hakaꞌ yaꞌ Job tiꞌ, kaw naunhe chibꞌuchwa yinh Komam Dios hakaꞌ yukꞌlax ha haꞌ?
8 Kaw choche yetbꞌinhe isbꞌa yaꞌ yebꞌ ebꞌnaj txꞌoj, kat yekꞌpaxo yaꞌ yebꞌ anma mulum.
9 Yuto chal yaꞌ: “Matzet chiyiqꞌ naj winaj yinh yu iswatxꞌen naj tzet chal iskꞌul Komam Dios,” xhi yaꞌ.
10 Yuxin hex ay henabꞌal tiꞌ abꞌewe tzet chiwalan: Haꞌ istxꞌojal nahat yehilo yinh Komam Dios,
haꞌ ismachiswalilal mach chihitziko iskꞌatanh Komam Sunil Chisje Yu.
11 Yuto hatatikꞌa tzet chiswatxꞌe naj winaj haꞌ chiyaqꞌ Komam Dios ispajo selel tet naj;
kat istohlan Komam tet hunun anma hatatikꞌa isbꞌeybꞌal sata Komam.
12 Hoꞌ, yinh kaw yeli machi istxꞌojal tiꞌ chiswatxꞌe Komam Dios,
haꞌ mak chiwatxꞌen istoholal mach chiꞌok Komam Sunil Chisje Yu yetaꞌtoj.
13 ¿Mak ischej Komam ilno txꞌo txꞌotxꞌ seleloj?
¿Mak aniko sunil tzet ay sat yibꞌanhqꞌinal tiꞌ yinh istxolal?
14 Qꞌinalo tato chꞌel yinh iskꞌul Komam Dios yinilo yespíritu,
yebꞌ iskawil anma aqꞌbꞌil yu,
15 hunlahannhe chu iskamilo anma sunil,
kat ismeltzoko pojojal hunelxa.
16 Mam Job, yaj tato ay hanabꞌal,
abꞌe huneꞌ tiꞌ, okanh tuknoj hawabꞌen tzet chiwalan.
17 ¿Chimyu yaqꞌni yahawilal hunu mak mach chiꞌochen istoholal?
¿Chimyu haqꞌannayo isyaꞌtajil yibꞌanh anma tzꞌajan?
18 ¿Chimyu yalni Komam tet naj rey, “kaw machi hawelapnoj”? Maka xin, ¿chimyu yalni Komam tet ebꞌnaj yahaw konhobꞌ, “kaw txꞌoj hex”?
19 Machi hunu ebꞌnaj yahaw konhobꞌ tiꞌ ekꞌbꞌal yelapno sata hunuxa yet anmahil yul sat Komam,
mach ekꞌbꞌalpaxo ebꞌnaj qꞌalom sata ebꞌnaj mebꞌaꞌ yul sat,
yuto lahannhe yu iswatxꞌen Komam sunil anma.
20 Yinh kaw hunepchꞌan chikamilo anma,
hayet chuman aqꞌbꞌal chiꞌahwejna konhobꞌ kat istanhiloj.
Haꞌ ebꞌnaj winaj kaw ay yip, tonhe chipáxilo yip,
waxanhka machi mak chiꞌaniko howal yinh ebꞌnaj.
21 Yuto chiyil Komam Dios tzetaj chiswatxꞌe naj winaj,
yebꞌ xin sunil isxalabꞌ naj bꞌay chilaekꞌi.
22 Machi qꞌejholo maka machi yenhel kamikal bꞌay chu yebꞌanto isbꞌa ebꞌnaj chiwatxꞌen istxꞌojal.
23 Mach yilalo chiꞌok Komam Dios yalaꞌ tet naj winaj bꞌaqꞌinh chul naj sata Komam,
kat yilni Komam tzet chꞌeliko naj.
24 Mach yilalo chito ok Komam isqꞌambꞌeꞌ,
katto istanhtzenilo Komam ebꞌnaj winaj kaw ay yelapno,
kat iskan ismunil ebꞌnaj tet hunteqꞌanxa ebꞌnaj.
25 Haꞌ Komam Dios yohtaj tzet chiswatxꞌe ebꞌnaj,
chiꞌapni Komam yet aqꞌbꞌalil kat issomchato isnabꞌal ebꞌnaj,
kat iskꞌaytzenilo Komam ebꞌnaj.
26 Chiꞌaqꞌlax ekꞌoyaꞌ yanma ebꞌnaj sata sunil anma yu istxꞌojal chu ebꞌnaj.
27 Yuto ispohilo isbꞌa ebꞌnaj yinh Komam,
yu mach chiyako yinh iskꞌul ebꞌnaj yinh chejbꞌanile chal Komam.
28 Yahapno yel yaw anma mebꞌaꞌ,
yebꞌ anma ayko yinh manhtzetal yul sat Komam yu etalax yu ebꞌnaj.
29 Ta haꞌ Komam Dios chꞌaqꞌni bꞌay chixewi,
¿mak hunu tiꞌ chisje iskachwa yinh Komam?
Tato chiyebꞌalo sat Komam, ¿mak hunu tiꞌ chiꞌilni yinh Komam?
Lahannhe chu istanhen Komam hunun konhobꞌ yebꞌ hunun anma.
30 Mach chisje iskꞌul Komam tato haꞌ ebꞌnaj txꞌoj chiꞌok yahawo konhobꞌ,
yunhe mach chiyeta ebꞌnaj konhobꞌ.
31 Mam Job, yinh kaw yeli yilal hawalni hakaꞌ tiꞌ tet Komam:
“Xaꞌok inmulan, yajaꞌ tinanh xin matxa chinlahikojan waniko inmulan.
32 Kuyinan yinh tzet mach chitxumcha wuhan,
yunhe wohtanhenilojan tato ay istxꞌojal inwatxꞌehan,
matxa chinwatxꞌehan hunelxa,” kachi.
33 ¿Tom kꞌul chawoche chispajtze Komam Dios tawet hakaꞌ chal hakꞌul,
yajaꞌ mach xin chayije tzet chala? Hach chawala tzet chawute habꞌa,
maxhtaj hinan; hal tzet hawohtaj.
34 Haꞌ ebꞌnaj winaj ay ishelanil chiꞌabꞌen tzet chiwalan,
yebꞌ anma ay isnabꞌal chimyal wetan hakaꞌ tiꞌ:
35 “Mach yohtajo yaꞌ Job tiꞌ tzet chiyala,
machi yelapno tzotiꞌ chiyal yaꞌ,” xhim ebꞌnaj wetan.
36 Kaw ilwelaxojabꞌ yaꞌ Job tiꞌ,
yuto haꞌ tzotiꞌ chiyal yaꞌ hanhe anma txꞌoj isbꞌeybꞌal chihalni hak tuꞌ.
37 Haꞌ yaꞌ Job tiꞌ kaw mulum yaꞌ yebꞌ xin kaw manhkꞌom yaꞌ,
chiꞌok yaꞌ bꞌuchwal yinh Komam yinh kosat,
chispoqꞌni isqꞌabꞌ yaꞌ jinh,» xhi naj Eliú.