Ispajtze naj Eliú tzotiꞌ yal yaꞌ Job
33
Yalnipaxo naj Eliú:«Wal tinanh xin mam Job, abꞌe tzet chꞌekꞌ yinh innabꞌalan,
kat hawabꞌenpaxo sunil tzotiꞌ chiwalan.
2 Wal tinanh chinhaj intiꞌan,
kat istzotel waqꞌan yebꞌ yul innuqꞌan.
3 Chiwalilojan tzet chꞌekꞌ yinh innabꞌalan yinh sunil istoholal wanmahan,
haꞌ tzotiꞌ chꞌelpaxti yul intiꞌan chiwalan yinh isyelal.
4 Haꞌ Yespíritu Komam Dios watxꞌenhe hinan, yaqꞌni Komam,
Komam Sunil Chisje Yu jaqꞌeqꞌ inhiqꞌaꞌan yuxin itzitz hinan.
5 Pajtze wetan, ta chuhi.
Ako tzet chawal tuꞌ yinh istxolal, kat hawah linhnoj.
6 Hanintiꞌan lahan anma hinan yebꞌ hach yul sat Komam Dios;
txꞌo txꞌotxꞌ okniko yet inwatxꞌelaxan hakaꞌ hach tiꞌ.
7 Machojabꞌ chachxiwkanh yu tzet chiwalan,
machi isyaꞌtajil chinqꞌanayojan tawibꞌanh.
8 Yinh kaw yeli, hach tiꞌ hawal yinh intxikinan,
wabꞌenan tzotiꞌ hawala yet hawalni hakaꞌ tiꞌ:
9 “Hanintiꞌan kaw saj wanmahan yebꞌ xin machi intxꞌojalan, machi inmulan, machi istxꞌojal chinwatxꞌehan.
10 Yajaꞌ haꞌ Komam Dios sayni inmulan yu yaniko howal winhan.
11 Yanikto wojan yul teꞌ cepo, yok yilno bꞌayejtuꞌwal kinekꞌan,” kachi.
12 Haꞌ yinh sunil tzet maxawal tiꞌ mach istoholalo chawala.
Hanintiꞌan chinpajtzehan tzet chawala,
chiwalnihan tawet tato haꞌ Komam Dios ekꞌbꞌal yibꞌanh naj winaj.
13 Yuxin, ¿tzet yinh xin chakajle habꞌa yebꞌ Komam Dios,
yuto mach chispajtze Komam tzetaj chawala?
14 Yajaꞌ wal Komam Dios txꞌiꞌal tzet chu istzoteli,
yajaꞌ wal anma xin mach chitxumchalo yu.
15 Chitzotel Komam Dios yinh wayike yet chiyilni naj winaj tzetaj ye tuꞌ yinh iswayik yinh aqꞌbꞌalil,
yet chiwaykanh naj, yet kamna naj iswayi.
16 Hayet chiway tuꞌ kat istzotel Komam yinh isnabꞌal naj,
chaqꞌni Komam kuybꞌanile tet,
17 yu yinilo Komam yinh istxꞌojal chiswatxꞌe,
kat ispohnilo isbꞌa yinh isloloꞌal.
18 Hak tuꞌ chu iskolni Komam yanma ebꞌnaj tet kamikal,
chiskolni Komam ebꞌnaj tet chꞌen espada yu machi tanhilo ebꞌnaj.
19 Chiꞌalaxpaxayo isyaꞌtajil yibꞌanh naj winaj yet chiway naj sat istxꞌat,
chiyabꞌen naj isyaꞌil isbꞌajil isnimanil.
20 Hak tuꞌ xin matxa chisje iskꞌul waꞌoj, chisyahnikanh tzetaj chilolaxi,
waxanhka kaw xuqꞌ itah tuꞌ, yebꞌ xin kaw labꞌan.
21 Kat isbꞌajbꞌayoj matxa chijil ischibꞌehal isnimanil,
kat yixtanhwipaxilti isbꞌajil, maxhtaj hakaꞌ yet yalanhtokanoj, mach ixtanho isbꞌajil.
22 Lanhan ishitziko yanma bꞌay chimuji,
lanhan yalaxiko iskawil yul isqꞌabꞌ kamikal.
23 Yajaꞌ ta ay hunu ischejabꞌ Komam Dios sikꞌbꞌiliko yok tzotelo yinh naj,
kat yalni tet naj yinh istoholal tzet chiswatxꞌe,
24 chalni naj tet naj tato haꞌ Komam Dios chitzꞌay iskꞌul yinh naj,
chiskolnilo Komam naj yul isqꞌabꞌ kamikal yuto xaꞌilchalo tzet chu iskolcha naj.
25 Haꞌ naj winaj tuꞌ chimeltzoko ischibꞌehal isnimanil naj hakaꞌ isnimanil nixhte unin,
kat ismeltzo tzꞌayik yilaꞌ naj hakaꞌ hunteqꞌan tzꞌayik yet yekꞌ naj yinh istzehal.
26 Chitxahli naj tet Komam Dios, kat xin istzala Komam yinh naj,
yinh tzalahilal chiyil naj sat Komam Dios, haxa Komam chiꞌaniko naj yinh iskꞌulal hunelxa.
27 Chalni naj hakaꞌ tiꞌ: “Wako inmulan, inwatxꞌenan tzetaj ye tuꞌ mach toholoj, machi xin tzet yaqꞌ wetan,” xhi naj.
28 Yajaꞌ xin chiskolilo Komam Dios naj yul isqꞌabꞌ kamikal,
chiyilni naj issajilqꞌinal hunelxa yu Komam.
29 Haꞌ sunil hunteqꞌan tiꞌ iswatxꞌe Komam Dios kayel oxel yinh naj winaj,
30 yu iskolnilo Komam yanma naj winaj tet kamikal,
chaqꞌni Komam sajilqꞌinal tet naj hunelxa.
31 Mam Job, kam abꞌe tzet chiwalan,
kat hawok tukno yet chintzoteltiꞌan.
32 Ta haꞌ ye hawu pajtze tzet chiwalan, tzotelanh,
yuto hanintiꞌan chiwochehan chiwilan tzet chachelikoj.
33 Taka mach xin, abꞌe tzet chiwalan,
kat hawok tukno, chachinkuynihan yinh yitzꞌatil wiꞌe,» xhi naj Eliú.