5. HAꞌ TZET YE TUꞌ YAL NAJ ELIÚ
(32:1–37:24)
Ispaj istzotiꞌ yaꞌ Job yaqꞌ naj Eliú
32
Isbꞌejni ebꞌnaj oxwanh winaj yaqꞌwi kꞌule yinh yaꞌ Job, yuto yil ebꞌnaj tato mach ismul yaꞌ. 2 Wal naj Eliú, iskꞌahol naj Baraquel, buzita, titna yinh yikꞌal naj Ram, kaw tit ishowal naj yinh yaꞌ Job, yuto yal yaꞌ Job tuꞌ tato machi ismul yaꞌ, yebꞌ xin yu yal yaꞌ Job ta Komam Dios aniti sunil isyaꞌtajil yibꞌanh yaꞌ. 3 Istitpaxo ishowal naj Eliú tuꞌ yinh ebꞌnaj oxwanh yamigo, yuto waxanhka ok ebꞌnaj aqꞌokꞌule yinh yaꞌ Job matxa yu ispajtzen ebꞌnaj tet yaꞌ tato mulum yaꞌ. 4 Naj Eliú tuꞌ ekꞌna tzehto naj sata ebꞌnaj oxwanh tuꞌ, yuxin mach isje naj yaqꞌaꞌko isbꞌa xol ebꞌnaj yet iskajlen isbꞌa ebꞌnaj yebꞌ yaꞌ Job, yuxin yechma naj. 5 Yajaꞌ hayet yilni naj tato mach chiyu yu ebꞌnaj ispajtzen tzet yal yaꞌ Job, istit ishowal naj yinh ebꞌnaj.6 Yalni naj Eliú iskꞌahol naj Baraquel, buzita, hakaꞌ tiꞌ:
«Hanintiꞌan ekꞌna tzeh intohan tesataj,
wal hex xin icham winaj hexxa, yuxin kinxiwan walnihan tzet chꞌekꞌ yinh innabꞌalan teyinh,
7 yuto innahan hakaꞌ tiꞌ: “Tzotelojabꞌ ebꞌnaj ichamta winaj tiꞌ,
yuto ekꞌna tzet yohta ebꞌnaj yu ishabꞌilal, isyebꞌabꞌilo ebꞌnaj ishelanil,” kinchihan.
8 Yajaꞌ yinh kaw yeli sunil anma ay yespíritu yuto haꞌ Komam Dios,
Komam Sunil Chisje Yu aqꞌni isnabꞌal anma istxumchalo yu.
9 Maxhtaj yu txꞌiꞌalxa kohabꞌilal yuxin ay kohelanil,
maxhtaj yu icham winajonh yuxin chitxumchalo tzetaj ye tuꞌ ju.
10 Abꞌewe tzet chiwalan, kat inyenilojan yitzꞌatil inwiꞌan teyet.
11 Hanintiꞌan kaw echmabꞌil wuhan heyalni tzet heyohtaj,
kaw ayinikojan wabꞌenan tzet chetxumu yu yitzꞌatil hewiꞌ yet chesayni tzotiꞌ cheyala.
12 Kaw ayinikojan wabꞌenan tzet cheyala,
yajaꞌ mach hunujex tiꞌ chexqꞌoji hekachni yaꞌ Job, mach chupaxo heyu heyaqꞌni ispaj tzet chiyal yaꞌ.
13 Yajaꞌ xin mach kꞌulo chu heyalni: “Kaw ay yitzꞌatil kowiꞌanh, yuto haꞌ Komam Dios chipajtzen tzet chiyal yaꞌ Job tiꞌ, maxhtaj anma,” kexchimi.
14 Yajaꞌ xin maxhtaj wetan tzotel yaꞌ Job tiꞌ,
yuxin mach tajinan chinpajtzehan tet yaꞌ hakaꞌ tzet heyal tuꞌ.
15 Wal tinanh mam Job, haꞌ ebꞌnaj oxwanh tiꞌ maxiwkanh ebꞌnaj,
matxa mayaqꞌ ebꞌnaj ispaj hatzotiꞌ, yuxin okkano ebꞌnaj yinh sukal.
16 Hanintiꞌan kaw echmabꞌil wuhan waqꞌnihan ispaj hatzotiꞌ,
yuto haꞌ ebꞌnaj hawamigo tiꞌ maꞌok tukno ebꞌnaj,
matxa chiyu yaqꞌni ebꞌnaj ispaj hatzotiꞌ.
17 Wal hinan xin chiwako hinbꞌahan yinh huneꞌ tiꞌ,
chiwalnihan tzet chꞌekꞌ yinh innabꞌalan.
18 Kaw txꞌiꞌal tzotiꞌ tiꞌ chiwochehan walaꞌan,
yu helanile chaqꞌ espíritu ayko yul wanmahan chiniptzenan.
19 Kochnhe chilinhmo wanmahan chiwabꞌehan,
hakaꞌ chu islinhmo noꞌ tzꞌum yu akꞌla vino ayayto yul noꞌ.
20 Chintzotelan tinanh, inhiqꞌnixa inhaqꞌohan.
Inhajnixa intiꞌan, kat inpajtzenan tawet.
21 Machi hunu mak tiꞌ ekꞌbꞌal yelapno yibꞌanh hunuxa yet anmahil yul insatan,
wal xin lahannhe sunil anma.
22 Hanintiꞌan, manqꞌaynajojan wanikojan ismay anma,
yuto ta ay bꞌay chiwakojan ismay naj winaj,
chimkintanhilojan yinh anhe yu Komam Dios, Komam kinwatxꞌenan,» xhi naj Eliú.