Yal yaꞌ Job tato chibꞌelwi yaꞌ yinh istoholal
31
Yalnipaxo yaꞌ Job:«Hanintiꞌan xaꞌinhin hinbꞌahan yebꞌ insatan: ¿Tzet xin chu wilnihan huneꞌ ix qꞌopo?
Chiwilan ix, yaj mach chu insaynihan inmulan yinh ix.
2 Yuxin ¿Tzet chaqꞌ Komam Dios ay yul satkanh inmatanojan?
¿Bꞌaytet inmajulan chaqꞌ Komam Sunil Chisje Yu ayahto yul satkanh?
3 ¿Tzet yinh xin maxhtaj tet anma txꞌoj isbꞌeybꞌal chiꞌaqꞌlax isyaꞌtajil?
¿Tzet yinh maxhtaj anma mulum chichahni takbꞌalkꞌule?
4 ¿Tom mach chil Komam Dios inbꞌehan,
kat isbꞌisni sunil inxalabꞌan?
5 ¿Kinekꞌmihan walaꞌan leqꞌtiꞌal?
¿Mato kinekꞌ lelonan waqꞌaꞌ subꞌchahojan anma?
6 Haꞌojabꞌ Komam Dios chinmalenan yul libra kaw tzꞌajan,
kat yohtanheniloj tato chinbꞌeybꞌalnhehan istoholal.
7 Tato ay bꞌay inhekꞌilo hinbꞌahan yinh bꞌeh aykano yu Komam,
tato wako wanmahan yinh tzet yocheko insatan, makato ay tzet welqꞌahan yu inqꞌabꞌan,
8 haꞌ tzet tzꞌunbꞌil wuhan nanojabꞌ mak chiloni, kat ishokꞌnikanh intzꞌunubꞌan.
9 Tato ay bꞌay subꞌcha wanmahan yu hunu ix ix,
makato ayinayojan majwal iskawilal ispultahil yatut hunu wet anmahilan,a
10 chisje yok wixalan kawno yu hunxa naj,
maka chiway ix yebꞌ hunuxa naj.
11 Yuto haꞌ mak chiwatxꞌen hakaꞌ tuꞌ, kaw txꞌojkanoj,
yilal yay isyaꞌtajil yibꞌanh yu ebꞌnaj juez.
12 Yuto lahan huneꞌ tuꞌ hakaꞌ qꞌa qꞌaꞌ chitzꞌato sunil tzetaj ye tuꞌ yu,
kat istzꞌapaxto sunil tzet ay hinan yu.
13 Yajaꞌ inyahan tzet ischejbꞌanil ebꞌnaj inchejabꞌan, maka ebꞌix inchejabꞌan yet yaqꞌleniko howal winhan,
14 ¿Tzet chiwute hinbꞌahan yet chꞌah lemna Komam Dios insatajan?
¿Hayet chisqꞌambꞌen wetan, tzet chu inpajtzenan tet?
15 Wal xin haꞌ Komam Dios kinaqꞌni pitzkꞌahotijan yinh inmiꞌan.
¿Tom maxhtaj Komam aqꞌnipaxo pitzkꞌahoti naj yinh ismiꞌ? ¿Tom mach huneꞌnhe Komam kinwatxꞌenan yebꞌ naj xin?
16 Hanintiꞌan mach inbꞌejan inkolwahan yinh anma mebꞌaꞌ,
mach tonheho ekꞌ insatan yet yaqꞌlen ebꞌix hunix wahil.
17 Machi bꞌay inchukilan kinwaꞌan,
wal xin wawtehan nixhte mebꞌaꞌ unin waꞌo inkꞌatanhan.
18 (Yuto yettaxtikꞌa yinh intzehalan inyaꞌilnhenan nixhte mebꞌaꞌ unin,
yettaxtikꞌa inchꞌibꞌtijan, inkolan ebꞌix hunix.)
19 Haꞌ mak wilan lanhanxa iskam manh xilqꞌapehal,
haꞌ mak kaw yaꞌta yehi tꞌilan,
20 wal xin haꞌ xil inmeꞌan haꞌ noꞌ waqꞌan xilo isqꞌap,
kaw chitzalahi yaqꞌni yuchꞌandiosal wetan.
21 Ta wikanh inqꞌabꞌan yu inmaqꞌwahan yinh nixhte mebꞌaꞌ unin,
waxanhka wohtajan tato matzet chinutelaxan yu ebꞌnaj juez ayikꞌo bꞌey ispultahil konhobꞌ,
22 ta xin leqꞌtiꞌal chiwaltiꞌan, kꞌulmi ismaqꞌlaxilto inqꞌabꞌan, kat iskankano lokno yinh inwixikꞌanh.
23 Hanintiꞌan chinxiwan tet isyaꞌtajil chiyaqꞌ Komam Dios,
yuto machi welapnojan sata yip Komam.
24 Machi bꞌay wako wanmahan yinh chꞌen melyu,
mach wapaxikojan chꞌen oro iskawxobꞌalo inkꞌulan.b
25 Machi bꞌay wochehan tato chꞌah inqꞌalomalan,
mach wakojan yinh inkꞌulan wiqꞌnihan niman melyu.
26 Wilan isjopla yoj tzꞌayik,
wilnipaxojan iskꞌulchꞌanil istzejtzon ixahaw,
27 yajaꞌ machi bꞌay kinokan wiqꞌayo hinbꞌahan sata hunteqꞌan tuꞌ yinh ewantajil.
Mach intzꞌo inqꞌabꞌan yu inyenilojan tato chiwiyo hinbꞌahan tet.c
28 Ta inwatxꞌehan hunteqꞌan istxꞌojal tuꞌ yilal inchahnihan isyaꞌtajil,
yuto hak tuꞌ yu inyenilojan tato machi Komam Dios,
Komam yahawil yinh sunil tzetaj ye tuꞌ.
29 Machi bꞌay kintzalahan yet ay isyaꞌtajil yibꞌanh mak ayko ishowal winhan,
machi kintzalahan yet apni istxꞌojal yinh.
30 (Machi bꞌay wako inmulan yu intiꞌan,
machi bꞌay inqꞌanan tzꞌaktiꞌ yibꞌanh yanma naj tuꞌ.)
31 Chiꞌah yaw hunu inchejabꞌan chalni hakaꞌ tiꞌ:
“¿Mak hunu hex cheyala ta machi manoh hekꞌul? Machi hunu inchejabꞌan halni hakaꞌ tuꞌ.”
32 (Mach inchah wayojan ebꞌnaj bꞌelwom yulaj bꞌeh;
wal xin inchahan ebꞌnaj chꞌekꞌ yinh isbꞌel wayo yul watutan.)
33 Machi bꞌay chiwako yenhel inmulan hakaꞌ chute ebꞌnaj winaj,
machi bꞌay chiwebꞌato inmulan;
34 yuto chinxiwan tet anma, yu tzetkꞌa yiqꞌni isbꞌa.
Chinxiwan yu chinyahlaxan yu ebꞌnaj wuxhtajan. Intukbꞌanan yel wawan,
inmajchenpaxojan pulta insatajan.
35 Ayxikꞌa ay mak chiꞌabꞌen tzet chiwaltiꞌan,
yajaꞌ chikawxi inkꞌulan tato haꞌ Komam Dios, Komam Sunil Chisje Yu,
haꞌ chaqꞌ isbꞌa winhan, waxanhka xin haꞌ mak ayko ishowal winhan chiꞌok aqꞌokꞌule winhan.d
36 Yinh kaw yeli chiwahtojan tzotiꞌ tuꞌ yibꞌanh inwixikꞌanh,
maka chiwahtojan yinh inwiꞌan hakaꞌ hunu corona,
yuto haꞌ hunteqꞌan tzotiꞌ tuꞌ chꞌok inmayojan.
37 Chimwalan tet Komam Dios yinh sunil inxalabꞌan,
tzet chinwatxꞌehan, matzet chal inkꞌulan wokan sata Komam.
38 Tato haꞌ intxꞌotxꞌan chꞌok aqꞌokꞌule winhan,
yebꞌ xin ta chꞌok istxolal intzꞌunubꞌan oqꞌo yu bꞌiskꞌulal,
39 yebꞌ xin tato ay bꞌay welqꞌahan sat istzꞌunubꞌ anma,
maka tato ay bꞌay mach waqꞌan istohol ebꞌnaj munlawom,
40 chꞌibꞌojabꞌ teꞌ howla telaj sat intxꞌotxꞌan selelo ixim trigo,
kat ischꞌibꞌpaxo teꞌ txꞌix selelo ixim cebada,» xhi yaꞌ Job.
Hak tiꞌ chu iskachnakano tzotiꞌ yal yaꞌ Job yinh tzet yu iskolni isbꞌa.